Perezida wa Sena asanga u Rwanda rwari gutera imbere kurushaho iyo umutungo wa leta utanyerezwa

Yanditswe na Ndayishimye Jean Claude
Kuya 26 Mata 2018 saa 10:55
Yasuwe :
0 0

Perezida w’Umutwe wa Sena, Makuza Bernard, yavuze ko u Rwanda rwari kuba rwarateye imbere iyo amafaranga menshi atanyerezwa cyangwa ngo umutungo w’igihugu ukoreshwe nabi.

Yabitangaje kuri uyu wa Kane, tariki ya 26 Mata 2018, mu nama nyunguranabitekerezo yabereye muri Sena ivuga ku micungire y’umutungo wa leta.

Ni inama igamije kurebera hamwe ingamba zo gukemura ibibazo bikomeje kugaragazwa n’Umugenzuzi Mukuru w’Imari ya Leta, ikaba yahuje inzego zitandukanye zirimo za Minisiteri zitandukanye, inzego za leta zihabwa ingengo y’imari nini kurusha izindi, Ubushinjacyaha Bukuru, Urwego rw’Igihugu rw’Ubugenzacyaha n’izindi.

Afungura iyi nama, Perezida wa Sena, Makuza Bernard, yavuze ko nubwo u Rwanda hari intambwe rumaze gutera mu iterambere, rwakabaye rwarageze kure iyo amafaranga menshi atanyerezwa, ashimangira ko bikwiye gucika.

Yagize ati “Intambwe yatewe yari kwikuba inshuro nyinshi iyo umutungo wa leta ukoreshwa icyo wagenewe ndetse no ku gihe.”

Yavuze ko Umugenzuzi Mukuru w’Imari ya Leta buri mwaka akora raporo ku ikoreshwa ry’ingengo y’imari ariko hakagaruka buri gihe inzego zisesagura, zinyereza umutungo wa leta kandi ntizikosore.

Yavuze ko hari inzego zamaze gutera intambwe yo gucunga neza umutungo wa leta zikabona raporo ntamakemwa ariko hakaba izindi zihora zigaragaramo ibibazo; avuga ko bitumvikana mu gihe buri hose hari abakozi babifitiye ubumenyi, ashimangira ko imicungire mibi nta sano bifitanye no kuba abantu badafite ubumenyi.

Yagize ati “Umugenzi Mukuru w’Imari ya Leta, PAC, bakora isesengura bakabaza ababishinzwe ariko kuki hari abahora bagarukana ibisobanuro bimwe ku bintu bimwe bidashira?”

Yatanze ingero zitandukanye zirimo amafaranga ya VUP yagiye anyerezwa ntagere ku baturage yari agenewe, imishinga yagiye idindizwa, indi ikigwa nabi, imishinga yagiye isiga ibibazo n’ibindi.

Uyu muyobozi yashimangiye ko gucunga nabi umutungo wa leta bituma igihugu kitagera ku cyerekezo kiyemeje ndetse bikanagira ingaruka zikomeye ku muturage.

Yavuze ko u Rwanda rutazigera rwihanganira ko hari abantu bakomeza kunyereza cyangwa gucunga nabi umutungo wa leta bigahora byitwa amakosa.

Imibare y’Ubushinjacyaha igaragaza ko amadosiye ya ruswa n’ibyaha bifitanye isano nayo, kuva mu 2013 kugeza mu gihembwe cya mbere cya 2017, hinjiye 924, ayakozwe akaba ari 877.

Ku bayobozi bagiye batungwa agatoki ku ikoreshwa nabi ry’umutungo muri Raporo y’Umugenzuzi Mukuru w’Imari ya Leta, kuva mu 2011 kugeza mu gihembwe cya mbere 2015, ibigo bisaga 360 byakozwemo iperereza, amadosiye 293 afatwaho umwanzuro hagaruzwa 175 290 302 Frw; Amadolari ya Amerika 9100 n’Amayero 3726.

Ku bakurikiranyweho kunyereza no gukoresha nabi inkunga igenewe kuzamura imibereho y’abaturage bunyuze mu mishinga ya leta nka VUP, Ubudehe, Ubwisungane mu kwivuza, Girinka, Ifumbire, FARG, SACCO n’indi, kuva mu 2014 kugeza mu gihembwe cya mbere cya 2017 hakiriwe amadosiye 173 yakurikiranywemo abantu 329, bakekwaho kunyereza 1 901 398 614 Frw.

Perezida wa Sena asanga u Rwanda rwari gutera imbere kurushaho iyo za miliyari zitanyerezwa
Minisitiri w'Ubutabera akaba n'Intumwa Nkuru ya Leta, Busingye Johnston, na we yitabiriye iyi nama
Minisitiri w'Imari n'Igenamigambi, Dr Ndagijimana Uzziel

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza