Shyogwe:Abanyeshuri bakubise mugenzi wabo ajyanwa mu bitaro

Yanditswe na Kanamugire Emmanuel
Kuya 18 Ukwakira 2016 saa 04:51
Yasuwe :
0 0

Bamwe mu banyeshuri b’abakobwa biga mu mwaka wa gatatu mu Rwunge rw’Amashuri i Shyogwe mu Karere ka Muhanga, bakubise mugenzi wabo wiga mu mwaka wa mbere bimuviramo kujyanwa mu bitaro.

Ahagana saa yine z’ijoro ryo kuri uyu wa Mbere tariki ya 17 Ukwakira 2016, abanyeshuri biga mu mwaka wa gatatu bakubise abiga mu wa mbere bamwe bariruka barabacika, umwe muri bo bashinja kuvogera aho baryama baramusigarana baramuhondagura bimuviramo kujyanwa mu bitaro igitaraganya.

Mugeniwayesu Jeanne, umunyeshuri uhagarariye abandi muri iki kigo avuga uwakubiswe bamushinja kuvogera uburyamo bwabo no kugenda abavuga.

Yagize ati « Bambwiye ko abanyeshuri biga mu mwaka wa gatatu baje bagasohora bamwe mu biga mu mwaka wa mbere, bakabajyana hanze bakabakubita, noneho bamwe bakabacika. Umwe bamusigaranye baramukubita cyane aravunika bamujyanye kwa muganga mu gicuku ababara umutwe cyane. »

Uwimbabazi Vestine, ushinzwe imyitwarire y’abanyeshuri avuga ko iyi nkuru yayimenye saa yine n’igice za nijoro.

Yagize ati «Umunyeshuri uyobora abandi yampamagaye nka saa yine n’igice ambwira ko hari umwana wiga mu wa mbere urimo kurira. Umwe mu biga mu wa gatatu ngo ni we wamukubise cyane, akaba yamuhoye ko ngo yashakaga kwinjira aho barara kandi ngo hari n’amagambo ajya abavuga. »

Uyu muyobozi yakomeje avuga ko uyu mwana wakubiswe yaje kwitura hasi. Ati «Nyuma yo kumukubita yituye hasi, twamujyanye ku Kigo Nderabuzima cya Shyogwe avuga ko ababara umutwe cyane. Ubu yaraye kwa muganga nta nubwo yabashije gukora ikizamini. »

Nk’uko akomeza abivuga ngo abanyeshuri biga mu wa mbere n’abiga mu wa gatatu aho baryama haratandukanye. Ati « Nubwo hatandukanye ariko ntibivuze ko uwajya aho abandi barara akubitwa. »

Umuyobozi w’Urwunge rw’Amashuri rwa Shyogwe, Paul Nyabyenda, yatangarije IGIHE ko umunyeshuri ushyirwa mu majwi ko ari we wakubise uwajyanwe mu bitaro asanzwe afite imyitwarire idahwitse.

Yagize ati « Uwo munyeshuri wamukubise asanzwe afite imyitwarire idahwitse. Umwaka ushize nabwo yagaragaweho imyitwarire mibi tumuhanisha kwiga ataba mu kigo. »

Nyabyenda yakomeje avuga ko ikibazo nk’iki ari ubwa mbere kibaye mu kigo ayoboye, aho abanyeshuri barwana bikagera aho umwe muri bo ajyanwa mu bitaro.Asaba abanyeshuri kubana mu bwumvikane n’ubworoherane, ugize icyo apfa na mugenzi we akabimenyesha ubuyobozi. Ababyeyi na bo abasaba kubaba hafi bakabafasha kurera no guhana abana babo.

Paul Nyabyenda, Umuyobozi w'Urwunge rw'Amashuri rwa Shyogwe
Zimwe mu nyubako z'Urwunge rw'Amashuri rwa Shyogwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza