Kwamamaza

Sosiyete Sivile mu rugamba rwo gufasha Leta kurandura Sida

Yanditswe kuya 12-10-2016 saa 12:57' na Niyonsenga Schadrack


Imiryango yose itegamiye kuri Leta ifite aho ihurira n’ubuzima iteraniye mu nama yiga ku ngamba zo gufasha Leta y’u Rwanda mu mugambi wo kurandura icyorezo cya Sida mu gihugu.

Abahagarariye Sosiyete sivile mu Rwanda batangaza ko uru rwego nka rumwe mu ruhura n’abaturage cyane rugiye gushyira imbaraga mu guhangana n’icyorezo cya Sida, ibi ngo bikazajyana no gukomeza kwigisha abantu mu buryo bubafasha guhindura imyumvire bakamenya kandi bakirinda impamvu zose zituma habaho ikwirakwizwa ry’ubwandu bushya.

Ibi byatangarijwe mu nama y’iminsi ibiri iteraniye mu Mujyi wa Kigali guhera kuri uyu wa 12 Ukwakira 2016, ihuje MINISANTE, UNAIDS na RBC ndetse n’imiryango itegamiye kuri leta irwanya Sida mu Karere ka Afurika y’Uburasirazuba (East Africa National Networks of AIDS Service Organization-EANNASO) hagamijwe guhuza imyumvire kugira ngo ibihugu byose bifatane urunana mu rugamba rwo kurwanya Sida.

Ubuyobozi bwa EANNASO buvuga ko yanejejwe no kwisanga mu Rwanda aho ngo biteze kwigira byinshi bizafasha mu gukangurira ibindi bihugu kwigira ku Rwanda ibyo kwihutira gufata ingamba zifatika mu guhangana na virusi itera Sida mu karere.

Umuyobozi uhagarariye ihuriro rya sosiyete Sivile mu Rwanda, Félicité Rwemarika yatangaje ko iyi nama izafasha mu kungurana ibitekerezo bijyanye no kugaragaza ahakeneye gushyirwa imbaraga mu gufasha leta gukomeza guhangana n’icyorezo cya Sida.

Yagize ati “Ibyo twakora byose n’amafaranga twaba dufite yose ntacyo yadufasha hatarimo guhindura imyumvire, abantu bakeneye kumenya ububi bwa Sida, uko yandura ndetse n’uko yirindwa.”

Rwemarika avuga ko atari imyumvire ikwiye umunyarwanda wo muri iki gihe kwiyumvisha ko Sida ari indwara nk’izindi bikamubuza gukoresha agakingirizo cyangwa ubundi bwirinzi.

Bimwe mu byo Sosiyete Sivile mu Rwanda yifuza gushyiramo imbaraga mu guhangana na Sida harimo gutanga ubufasha mu ikorwa ry’igenamigambi rigamije guhashya Sida, gutanga amafaranga, ndetse n’ubujyanama bwo kwirinda Sida ku baturage, gufasha mu buryo bw’amategeko mu gihe hari abashobora kubuzwa uburenganzira bwaho bitewe na Sida, ndetse no gufasha mu bushakashatsi butandukanye bufitanye isano n’iki cyorezo.

Minisiteri y’Ubuzima mu Rwanda yashimiye iyi nama ivuga ko ubufasha bwiza bwiyongera ku bundi sosiyete sivile idahwema kugaragaza mu rwego rw’ubuzima nk’uko byagarutsweho n’Umunyamabanga Uhoraho muri Minisante, Dr Nyemazi Jean Pierre.

Ati “Imikorere ya Sosiyete Sivile mu Rwanda ihagaze neza, dukorera hamwe igenamigambi ndetse tukanakorera hamwe igenzura ry’ibyo twagezeho, icyo tubasaba ni ukurushaho gukorera hamwe kugira ngo duhangane n’ubwandu bushya bwa Sida .”

Kuri ubu mu Rwanda abantu 3% babana n’ubwandu bw’agakoko gatera Sida ,kuva muri 2005 uyu mubare nturajya hejuru cyangwa hasi, muri abo banduye Sida abenshi babarizwa mu Mujyi wa Kigali.

Amafoto:Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved