Kwamamaza

Sosiyete sivile yasabye Leta kuvugurura uburyo umuganda ukorwamo

Yanditswe kuya 29-10-2016 saa 13:58' na Ntakirutimana Deus


Abayobozi b’amadini ndetse n’imiryango itagengwa na Leta basabye leta y’u Rwanda gusubiramo ibijyanye n’itegeko rigenga umuganda, kugira ngo wongere umusaruro ariko unarushaho kwitabirwa.

Abagize sosiyete sivile babisabye ku wa Kane tariki ya 27 Ukwakira 2016, ubwo bahuraga na leta mu nama nsuzumabikorwa yabahuje n’abahagarariye Minisiteri y’Ubutegetsi bw’igihugu mu karere ka Burera.

Bavuze ko igenamigambi ry’umuganda rigomba gukorwa mu buryo abaturage bemeranywa ibikorwa bizawukorwamo mu gihe runaka.

Ibyo ngo bizatuma hategurwa neza ibijyanye n’ibizakorwa ndetse n’uburyo byagira uruhare rufatika mu iterambere ry’ubukungu bw’abaturage, nk’uko inkuru ya The New Times ibivuga.

Musenyeri Jean Faustin Gapira, Umuyobozi w’amatorero y’abapentekote avuguruye mu Rwanda, yavuze ko hari ikintu cyo kutita ku muganda kigaragara mu baturage, cyane mu rubyiruko rusa n’urugaragaza ko rutazi igisobanuro cyawo.

Yatanze urugero ko nko mu byago biherutse kugwirira abanyagakenke, ubwo inkangu yahitanye abantu 30 abagera ku 1300 bagasigara nta cumbi bafite, hari icyari gukorwa mu rwego rw’umuganda.

Ati “Mu bihe nka biriya ubwo abaturage bagirwagaho ingaruka n’ibiza, nk’igihugu twagombye guhagurukira hamwe mu buryo buhoraho tugatanga inkunga yo gufasha abo bantu. Ariko kandi byagerwaho mu gihe umuganda ngarukakwezi n’udasanzwe biteguwe mbere kandi binajyanye n’igihe.”

Yasabye kandi ko abatitabira umuganda bajya bahanwa mu buryo bukomeye, asaba na leta gushyiraho ingamba zo kugenzura uko umuganda ushyirwa mu bikorwa.

Mufti w’Abayisilamu mu Rwanda, Sheikh Salim Hitimana, yavuze ko hari aho bigaragara ko abaturage bakora umuganda kubera ubwoba birinda ko bahanwa, asaba ko hakwitonderwa ibijyanye n’inyito yawo.

Yavuze ko abaturage bakwiye gushishikarizwa gukora uwo muganda, bagasobanurirwa uruhare ugira ku iterambre n’ubukungu bihindura igihugu.

Umunyamabanga wa Leta muri Minisiteri y’Ubutegetsi bw’Igihugu Ushinzwe Iterambere ry’Abaturage, Vincent Munyeshyaka yavuze ko guhura n’abagize sosiyete sivile bifasha abafata ibyemezo kubona amakuru akwiye aturuka ku bafatanyabikorwa agaragaza igenamigambi rikwiye ndetse no gushyira mu bikorwa uko umuganda ukwiye gukorwa.

Yagize ati “Ni igihe cyiza cyo gushyira ibintu mu buryo dufatanyije n’abafatanyabikorwa bose; ubu ni igihe abashyiraho ingamba tugomba kwisuzuma ubwacu tukareba uko twategura neza, tukaba twakongera kugena uburyo bwiza bwo kubishyira mu bikorwa.”

Ku bijyanye no kuvugurura umuganda ngo hagomba kwibanda ku byiciro by’baturage, ndetse abantu bakiyumvisha ko mu muganda hadakorwa imirimo y’amaboko gusa, ahubwo ko hari n’ibindi byakorwamo. Urugero ni uko nk’abaganga bashobora kuwukora bavura abaturage.

Yavuze ko buri muturage wese agomba gukora umuganda kuko ngo uba n’umwanya mwiza wo kunguka ibitekerezo by’abaturage kuri politiki zitandukanye zigenwa na leta zituma abaturage bagira uruhare mu miyoborere yabo.

Munyeshyaka kandi yasabye abatuye mu mujyi nabo kwitabira umuganda uko bikwiye nk’abatuye mu cyaro.

Ati “ Twumvise ko hari bamwe bashaka abajya kubakorera mu muganda, ni amakosa! Abantu bagomba gufata iki gikorwa nk’ikigamije impinduka z’abaturage.”

Umuganda ni igikorwa kiba buri kwezi, ku wa Gatandatu wa nyuma, n’ubwo hari bamwe mu bayoboke b’amadini bawukora ku cyumweru. Ukorwa n’abari hagati y’imyaka 18-65.

Mu mwaka ushize, ibikorwa byakozwe mu muganda bifite agaciro ka miliyari 19, uyu mwaka ngo ako gaciro kakaziyongera kakagera byibura kuri miliyari 20 bitewe no kunoza imikorerwe yawo.

Amategeko agena ko uwasibye umuganda acibwa amafaranga y’u Rwanda ibihumbi bitanu. Mu mwaka ushize witabiriwe kuri 91%.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved