Sosiyete ya Nestlé yahuje imbaraga na Sucafina mu masezerano azafasha ingo 8000

Yanditswe na Mukwaya Olivier
Kuya 12 Kamena 2019 saa 08:30
Yasuwe :
0 0

Sosiyete ya Nestlé na Sucafina yo mu Busuwisi izwi mu Bucuruzi bw’ikawa byongereye amasezerano y’imikoranire y’imyaka itatu yitezweho guhindura ubuzima bw’ingo zirenga 8000.

Abaturage bazungukira muri iyi mikoranire ni abakorana n’inganda eshanu zitunganya ikawa zirimo urwa Musasa, Mushonyi, Nyamyumba, Rwinyoni na Ngororero ziherereye mu Burengerazuba bw’u Rwanda.

Nestlé na Sucafina zahuje imbaraga mu 2015, hagamijwe gushyira mu bikorwa gahunda yahariwe kwinjiza abagore mu gutunganya kawa izwi nka "Café des femmes" iri mu mugambi wa Nescafé.

Ni gahunda igamije kuzamura imibereho myiza y’abahinzi n’abatunganya ikawa mu Rwanda hagamijwe kubafasha kugeza ku isoko ifite ubuziranenge.

Imbuto z’ikawa zitunganyirizwa mu Rwanda zirakarangwa ndetse zigakoreshwa muri kimwe mu bicuruzwa bya Nestlé cyamamaye muri Suède nka Zoégas.

Inganda zitunganyirizwamo ikawa zigenzurwa n’Ikompanyi Nyarwanda iyigurisha mu mahanga (RWACOF) ihagarariye Sucafina.

Mu myaka isaga itatu, iyi gahunda imaze kugera ku batunganya ikawa 5 053, barimo abagore 37% n’urubyiruko rungana na 24%.

Muri iki cyiciro cya kabiri, Nestlé na Sucafina byihaye intego yo kugera ku bagore 3,057.

Ubwo hashyirwaga umukono kuri ayo masezerano, Hans Nilsson, yavuze ko iki gikorwa kitagamije gutunganya ikawa ifite umwimerere ahubwo kigomba no kugirira akamaro ubuzima bw’abahinzi.

Yagize ati “Tugomba kugira ikawa ifite ubwiza bwo ku rwego rwo hejuru, dukeneye ubufatanye bwa buri wese. Gushyiramo abagore n’urubyiruko binyuze mu kwigisha, ntabwo duteganyirije gusa ahazaza h’ikawa ahubwo dushaka ko binagirira akamaro abahinzi b’ikawa, imiryango yabo na sosiyete muri rusange.”

Umuyobozi Mukuru wa Rwacof, Max Veglio, we yavuze icyiciro cya kabiri cya ‘Coffee by Women’ kizateza imbere abagore n’ingo zabo, gucunga umutungo no gutinyura bamwe kugira uruhare rwo gufata inshingano z’ubuyobozi aho baturuka.

Yakomeje agira ati “Abagore bagira akamaro mu bikorwa byo guhinga ikawa, ndetse bagatanga umusanzu mu miryango yabo no muri sosiyete, ariko ntibakunze kugira amahirwe yo kubona amahugurwa cyangwa kuyobora mu bigo baba bakoramo. Uyu mushinga uzafasha mu bijyanye n’uburinganire no kongerera abagore ubushobozi.”

Muri iyi gahunda abahinzi bazakomeza guhugurwa no guhabwa ubufasha bugendanye na tekiniki ndetse banahabwe impamyabushobozi ziri kuri rwego mpuzamahanga.

Sucafina iheruka gutangaza ko iteganya gushora miliyoni $5 mu myaka itanu mu mishinga igamije guhanga udushya yaba mu gutunganya no gukwirakwiza umusaruro w’ubuhinzi burimo n’ubw’ikawa mu gikorwa izafatanya na Equity Bank Rwanda Ltd.

Abahinzi bahawe ibikoresho byifashishwa mu gukorera ikawa ngo umusaruro uzaze umeze neza
Abahinzi bahuguwe banahabwa ibikoresho bitandukanye bizabafasha mu kazi kabo ko kwita kuri kawa
Abahuguwe mu Murenge wa Nyamyumba mu Karere ka Rubavu bahawe umwanya wo gushyira mu ngiro ubumenyi bahawe
Abaturage bahawe impamba y'ubumenyi bwo gukorera ikawa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza