Sous-Lieutenant Seyoboka yongerewe iminsi y’igifungo cy’agateganyo

Yanditswe na Rabbi Malo Umucunguzi
Kuya 30 Mutarama 2017 saa 10:50
Yasuwe :
1 0

Urukiko rwa Gisirikare rwa Nyamirambo, rwongereye ukwezi kumwe ku minsi 30 y’igifungo cy’agateganyo cyari cyarahawe Sous-Lieutenant Seyoboka, nkuko byari byasabwe n’ubushinjacyaha mu iburanisha riheruka.

Ni umwanzuro wafashwe n’urukiko mu gitondo cyo kuri uyu wa Mbere, gusa yaba uregwa cyangwa Me Albert Nkundabatware uri kumwunganira ntibagaragaye mu rukiko.

Mu iburanisha riheruka kuwa 27 Mutarama, Ubushinjacyaha bwasabye urukiko kongera igihe cyo gufunga by’agateganyo Seyoboka Henri Jean-Claude, ngo bukomeze kumukoraho iperereza bwuzuze idosiye.

Burashaka kwegera abandi batangabuhamya bashinja, biyongera ku munani bahari uyu munsi barimo umwe watanze ubuhamya kuri Seyoboka mu nkiko Gacaca, zaje kumukatira gufungwa imyaka 19. Gusa mu ntangiriro z’uru rubanza, icyemezo cya Gacaca cyateshejwe agaciro.

Ubushize Sous-Lieutenant Seyoboka yamaganye ibyo kumuha ukundi kwezi ko gufungwa by’agateganyo, avuga ko uwo mwanzuro ufatwa bwa mbere kuwa 5 Ukuboza 2016 atigeze abijuririra, yibwira ko urubanza rugiye guhita rutangira mu mizi.

Seyoboka w’imyaka 50, ashinjwa ubufatanyacyaha mu cyaha cya Jenoside yakorewe abatutsi mu mwaka wa 1994, gucura umugambi wo gukora icyaha cya Jenoside, gufata no gusambanya ku gahato n’ubwicanyi. Ni ibyaha bikekwa ko yakoze ari umusirikare.

Uyu mugabo yabaga muri Canada, iza gufata umwanzuro wo kumwirukana ku butaka bwayo agera mu Rwanda mu ijoro rishyira kuwa 18 Ugushyingo 2016.

Ni nyuma y’iperereza bamukozeho guhera mu 1997, bakaza gusanga mu makuru yatanze asaba ubuhungiro atarigeze ashyiramo ko yabaye umusirikare.

Canada kandi yamenye ko Sous-Lieutenant Seyoboka yatanzweho ubuhamya mu Rukiko Mpuzamahanga Mpanabyaba rwari rwarashyiriweho u Rwanda, ko yishe unuturanyi we Francine n’abana be babiri nyuma yo kwanga ko bakorana imibonano mpuzabitsona kuri bariyeri.

Amategeko agena ko umuntu ushinjwa ibyaha bisanzwe igihe cyo gufungwa by’agategayio kitongerwa, ushinjwa ibyaha bikomeye kikongerwa ariko ntikirenge amezi atandatu, mu gihe ushinjwa ibyaha by’ubugome we cyongerwa ariko ntikirenge umwaka umwe.

Video y’iburanisha riheruka


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza