Sous Lt. Seyoboka yabwiye urukiko ko aho ashinjwa kwicira Abatutsi atigeze ahagera

Yanditswe na Ferdinand Maniraguha
Kuya 7 Gashyantare 2018 saa 12:15
Yasuwe :
0 0

Urukiko rwa Gisirikare i Nyamirambo rwasubukurye, kuri uyu wa Gatatu, urubanza ubushinjacyaha buregamo Sous. Lt. Seyoboka Jean Henri Claude woherejwe mu Rwanda na Canada akekwaho uruhare muri Jenoside yakorewe Abatutsi.

Seyoboka w’imyaka 51 yagejejwe mu Rwanda mu 2016 nyuma y’imyaka 20 aba muri Canada we n’umuryango we. Ashinjwa ibyaha bitatu birimo icyaha cya Jenoside, icyaha cyo kurimbura imbaga n’ubufatanyacyaha mu gukora Jenoside nk’icyaha cyibasiye inyokomuntu.

Ibi byaha ashinjwa kuba yarabikoreye ahahoze hazwi nka CELA (Centre d’Etudes des Langues Africaine) , St Famille na Saint Paul mu mujyi wa Kigali.

Ibyaha uyu mugabo ashinjwa ko yabikoze hagati ya tariki 1 Ukwakira 1990 na 31 Ukuboza 1994.

Mu isubukurwa ry’urubanza kuri uyu wa Gatatu, Seyoboka yabwiye abacamanza ko ahantu hose ashinjwa kwicira abatutsi atigeze ahagera.

Umucamanza yatangiye amenyesha ko Seyoboka yahinduye Avoka, ahabwa Me Kazeneza Theophille asimbuye Me Nkundabatware Albert.

Ahawe umwanya, Seyoboka yiregure ku byaha byose ashinjwa ariko yatangiye avuga ko bigoye kwiregura ku byaha atazi kandi atakoze, kuko ngo iyo aza kuba yarabikoze aba yarabyemeye kera akabisabira n’imbabazi.

Perezida w’Iburanisha, Lt Col Rusizana Déo yamubajije niba yemera ko Jenoside yakorewe Abatutsi yabayaho, undi amusubiza ko abyemera, maze amubwira ko niba abyemera adakwiriye gukoresha imvugo y’uko atazi ibyo aregwa kuko bishingiye ku ruhare akekwaho muri Jenoside kandi yabimenyeshejwe.

Seyoboka yavuze ko ari mu muryango akomokamo, ari aho yize ndetse n’aho yakoze nta na hamwe yigeze acengezwamo urwango ku buryo yari kugera ubwo ajya mu bikorwa byo kwica Abatutsi.

Yavuze ko na se umubyara yari afite umugore w’Umututsikazi, bityo ko atari kubanga kandi no mu muryango we barimo.

Sous. Lt. Seyoboka Jean Henri Claude woherejwe mu Rwanda na Canada akekwaho uruhare muri Jenoside yakorewe Abatutsi

Seyoboka yavuze ko yinjiye mu gisirikare mu 1991, arangije amahugurwa ajyanwa mu itsinda ry’ingabo zarwanishaga intwaro ziremereye (Artillery).

Mu 1993, Seyoboka na bagenzi be bagiye kwiga muri yahoze ari Kaminuza Nkuru y’u Rwanda boherejwe na Minisiteri y’Ingabo. Seyoboka Yahise agaruka ku buhamya bw’umwe mu butangabuhamya wavuze ko muri uwo mwaka yatozaga Interahamwe mu Mujyi wa Kigali, akavuga ko bitashoboka ko yari yiga i Butare anazitoza Interahamwe i Kigali.

Seyoboka yahise ajya ku buhamya bwatanzwe na benshi mu bamushinja, avuga ko bahuriza ku musirikare witwaga Lieutenant Claude, ko ari we babonaga ku bitero byabaga bije kwica Abatutsi.

Yifashishije ibika bigize ubuhamya bagiye batanga, yavuze ko bavuga ko uwo Claude yari yaravuye ku rugerero ubwo Jenoside yakorwaga, mu gihe we yemeza ko Jenoside yabaye akiri umusirikare.

Yagarutse ku rubanza rwabereye mu Rukiko rwa Arusha rwaregwagamo Col Tharcisse Renzaho, mu byo yashinjwaga harimo no kwicisha Abatutsi bari bahungiye kuri CELA, St Famille na St Paul, nyamara ngo mu batangabuhamya bose nta wigeze avuga Sous Lt Seyoboka.

Yavuze ko mu batanze ubuhamya, bavuze ko Renzaho ari we wari ufite uruhare mu bwicanyi bwahabereye ndetse ko hari Konseye umwe yirukanishije kubera ko atari ashyigikiye umugambi wo kurimbura Abatutsi.

Seyoboka yavuze ko mu buhamya bwatanzwe i Arusha, hari uwavuze ko Lt Claude ushinjwa kwica Abatutsi mu Kiyovu yavuye mu Rwanda mu mpera za Nyakanga 1994, mu gihe Seyoboka we avuga ko yavuye mu Rwanda tariki 28 Gicurasi 1994.

Yanavuze ko bashatse kumenya ko atigeze agera aho hantu ashinjwa kwicira Abatutsi, babaza umwe mu bagabo bari mu gisirikare cy’u Rwanda ubu wari ushinzwe kurinda kuri St Famille ku matariki ashinjwa gukoreraho icyaha.

Seyoboka kandi yagiye abwira urukiko abatangabuhamya bagiye bagaragaza ukwivuguruza.

Seyoboka anashinjwa urupfu rw’umugore bari baturanye witwa Umulisa Francine wicanywe na bamwe mu bo mu muryango we hagati ya tariki 15 na 20 Mata 1994. Ayo matariki ni nayo ashinjwaho kuyobora ibitero kuri CELA, ST Famille na St Paul.

Seyoboka avuga ko yavuye i Kanombe mu rugo rw’uwari Perezida Juvenal Habyarimana tariki 13 Mata. Icyo gihe ngo yari yagiye kureba umurambo wa se wo mu batisimu, Col Sagatwa.

Yahise ajya guhungisha umuryango we wari utuye mu Kiyovu awujyana ku Gisenyi kandi ngo bahavuye umuryango wa Francine ukiriho.

Yavuze ko hari murumuna we ahubwo wigeze gufungirwa muri Gereza ya Nyarugenge yahoze yitwa 1930, wamubwiye ko uwahoze ari umukozi wo kwa Francine muri Gacaca yo muri gereza yiyemereye ko ari we wishe uwo muryango.

Yavuze ko avuye guhungisha umuryango we yagarutse i Kigali, uwo munsi tariki 14 Mata hasohoka telegaramu yasabaga abasirikare bose bari baragiye kwiga i Butare gusubira mu bigo babarizwagamo, akavuga ko nta kuntu yari kujya kuyobora ubwicanyi kandi amatariki bwakorewe yari yasubiye mu kazi.

Yanavuze ko hari umwe mu batangabuhamya uvuga ko yamubonanye imbunda ya Kalashnikov, mu gihe avuga ko nta musirikare wa Leta y’u Rwanda icyo gihe wagiraga ubwo bwoko bw’imbunda uretse abo muri batayo ebyiri zarwanaga na RPA i Byumba.

Ku mukobwa witwa Uwimana Chantal ashinjwa gusambanya iminsi ibiri iwe mu rugo afatanyije na murumuna we utavugwa izina, Seyoboka yavuze ko amatariki ashinjwa kumufatiraho nta muntu wo mu muryango wari ukiba mu Kiyovu harimo na murumuna we.

Avuga ko kandi kuri ayo matariki yari yamaze kugera mu kigo cya gisirikare i Kanombe nk’uko bari babisabwe n’abayobozi.

Seyoboka yavuze ko nta na hamwe yigeze ayobora ibitero byo kwica abatutsi, avuga ko hashobora kuba hari izindi mpamvu ashinjwa ibyo byaha byongeye akabishinjwa n’abahamwe no gukora Jenoside mu gihe abatangabuhamya barokotse nta n’umwe uvuga ko yamubonye yica.

Mu 1996 nibwo Seyoboka yagiye muri Canada ahabwa sitati y’ubuhunzi ariko iza gukurwaho bitewe n’uko nyuma byaje kugaragara ko mu myirondoro yatanze hari ibyo yagiye abeshya birimo no kuba ataravuze ko yari umusirikare ufite ipeti rya Sous- Lieutenant mu ngabo za Ex-FAR.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza