Sudani: Ingabo z’u Rwanda zashyikirije abaturage ishuri zabubakiye

Yanditswe na Kanamugire Emmanuel
Kuya 7 Ugushyingo 2016 saa 11:24
Yasuwe :
0 0

Ingabo z’u Rwanda ziri mu mutwe w’ingabo z’Umuryango w’Abibumbye zigamije kugarura amahoro mu ntara ya Darfur muri Sudani (UNAMID), zashyikirije abaturage bari mu nkambi ya El Salaam mu mujyi wa El Fasher amashuri atatu n’ibiro by’ubuyobozi zabubakiye.

Aya mashuri y’abakobwa yashyikirijwe abaturage ku itariki 5 Ugushyingo 2016 yubatswe ku bufatanye n’Umuryango Christian Fellowiship wahisemo gufatanya n’Ingabo z’u Rwanda ziri muri batayo ya 47 (Rwanbatt 47) kubera uburyo zisanzwe zizwiho kwihutisha imishinga nk’iyi.

Umunyabanga wa leta ushinzwe uburezi muri Darfur, Prof YOUSUF ISAAC AHMAD, yashimiye ingabo zo muri Rwanbatt47 kubera akazi gakomeye zakoze zubaka amashuri atatu n’ibiro byaje byiyongera ku yandi abiri yubatswe na Rwanbatt44 umwaka ushize.

Yakomeje avuga ko ari ku nshuro ya kabiri yitabiriye umuhango wo gutaha igikorwa nk’iki kuko yigeze kwitabira umuhango wo gutaha uruzitiro rwubatswe ku ishuri ribanza ry’abakobwa rya Noor Salaam riherereye mu gace ka Umkadada.

Ati” Ndashaka ko ku ruhande rwacu dushyiraho umunsi uzwi, twafata nk’umunsi wo kwizihiza umuco wacu n’abanyarwanda buri mwaka; nk’icyubahiro ku musanzu ukomeye n’ubufasha muha abaturage bacu. Uzaba ari umwanya mwiza wo kwizihiza no gutera imbere umubano mwiza dufitanye.”

Umuyobozi wa UNAMID, Lt. Gen. Frank Mushyo Kamanzi nawe yashimye umusanzu wa Rwanbatt47 ndetse asaba ko n’abazabasimbura bazakomeza kugira uruhare mu mishinga nk’uriya.

Khalil Sheik Khadin wari uhagarariye abari mu nkambi ya El Salaam yashimye ingabo ziri mu butumwa bw’amahoro, by’umwihariko iz’u Rwanda kubw’ubufasha zidahwema kubaha.

Ati” Umusanzu n’ubufasha bwanyu ku baturage bacu ni igikorwa cy’amateka. Mugaragaza itandukaniro na bagenzi banyu mu butumwa bw’amahoro hano baturutse mu bindi bihugu, twifuza ko bakura isomo kuri gahunda yanyu yihariye.”

Uyu muhango wo gutaha aya mashuri no kuyashyikiriza abaturage witabiriwe n’abayobozi mu nzego zitandukanye zirimo iza leta, UNAMID n’abaturage.

Aho abubakiwe ishuri bari basanzwe bigira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza