Televiziyo y’u Rwanda igiye gutangiza ishami ryihariye ku rubyiruko rizakora mu Gifaransa n’Icyongereza

Yanditswe na Evariste Nsengimana
Kuya 1 Kamena 2019 saa 02:22
Yasuwe :
0 0

Ikigo cy’igihugu cy’itangazamakuru (RBA), kigiye gutangiza ku mugaragaro shene (chaîne) ya kabiri ya Televiziyo Rwanda (TVR), izajya inyuzwaho ibiganiro byibanda cyane ku rubyiruko bikoze mu rurimi rw’Igifaransa n’Icyongereza gusa.

Iyi shene yitwa ‘KC2 Rwanda’ igaragara kuri Decoderi ya Star Times ariko ikazashyirwa no kuri Dstv na Canal +, imaze igihe itambukaho indirimbo na Filimi, izafungurwa ku mugaragaro ku wa 3 Gicurasi 2019.

Umuyobozi Mukuru wa RBA, Arthur Asiimwe, yabwiye IGIHE ko ‘Izatangira gushyirwamo gahunda zimwe na zimwe nkeya mu Gifaransa n’Icyongereza gusa, ku buryo ishobora kuzajya itangaza amakuru yo mu karere’.

Ati “Ni shene itangira ireba cyane cyane urubyiruko, mu Gifaransa n’Icyongereza ariko mu myaka iri imbere ikagira icyerekezo ko ishobora kujya itangaza amakuru yo mu Karere ka Afurika y’Iburasirazuba.”

Ibyo ngo bizayifasha gutangaza amakuru atareba u Rwanda gusa ahubwo ikibanda no ku yo mu Karere mu myaka nk’itatu cyangwa ine iri imbere.

Asiimwe yavuze ko gahunda KC2 Rwanda izibandaho ari izireba urubyiruko kandi ko kuyifungura bizaha umwanya ibiganiro byo mu Kinyarwanda bya RTV, byaburaga uko bitambuka kubera gahunda nyinshi.

Ati “RTV turashaka ko yibanda mu Kinyarwanda gusa, ikagira gahunda z’ikinyarwanda kuko igira gahunda nyinshi ugasanga tubuze n’aho kuzishyira. Ubwo zimwe zizashyirwa kuri iyo shene.”

Yakomeje agira ati “Nka nyuma y’umwaka, ibiganiro bimwe byari mu Cyongereza n’Igifaransa [Kuri RTV], imaze gufatisha neza , tuzabyimura tubishyire kuri iyo [KC2 Rwanda], dushake ibindi by’Ikinyarwanda bibisimbura.”

Asiimwe yavuze ko KC2 bagiye kuyongerera ubushobozi ikagira ibiganiro byinshi kandi ikamenyekana ku buryo ishobora kuzanyuzwaho imikino y’igikombe cya Afurika.

RBA ihuriza hamwe Radio Rwanda (yashinzwe mu 1961), Radio Rwanda Inteko, Magic Fm, Radio z’abaturage na Televiziyo Rwanda (RTV) yashinzwe mu 1991.

Umuyobozi Mukuru wa RBA, Arthur Asiimwe avuga ko iri shami rizibanda cyane ku rubyiruko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza