Tubiri mu tugari turindwi ni two gusa dufite amazi meza i Mageragere

Yanditswe na Thamimu Hakizimana
Kuya 22 Mutarama 2017 saa 07:55
Yasuwe :
0 0

Abaturage bo mu Murenge wa Mageragere mu Karere ka Nyarugenge barasaba ubuyobozi kubakorera ubuvugizi bakabona amazi meza, kuko ahenshi nta mazi meza abagira.

Mu tugari turindwi tugize Mageragere batuyemo, tubiri gusa ni two bavuga ko tugeramo amazi meza, abandi bavoma amazi mabi yo mu ruzi rwa Nyabarongo.

Umubyeyi witwa Mucyebyankanda Donatille utuye mu Mudugudu wa Rugendabari mu Kagari ka Rwankuba yagize ati “ Njye maze imyaka 10 hano ariko sinakubeshya ngo nzi amazi meza muri uyu murenge wacu ahubwo nyakoresha nk’iyo nasuye nk’abantu i Nyamirambo cyangwa za Nyakabanda iyo. Ni nayo mpamvu namwe muhora mutuvuga ngo tugira umwanda uragira ngo se natwe dufite amazi nk’abandi banyarwanda hari isuku nke yatugaragaraho?”

Mugenzi we Mukansanga Estelle we avuga ko baba banahangayitse ko abana bajya kuvoma muri Nyabarongo baribwa n’ingona.

Yagize ati “Mudusabire ubuyobozi natwe butugezeho amazi kuko biteye isoni kuba duhora twumva n’abo mu ntara z’ibyaro bagerwaho n’amazi meza mu gihe twe byitwa ko dutuye mu Mujyi wa Kigali tutayafite.”

Umunyamabanga Nshingwabikorwa w’Umurenge wa Mageragere, Christophe Ntirushwa, nawe yemereye IGIHE ko abaturage bahangayitse, ariko ko bidatinze muri uyu mwaka amazi azaba yabagezeho.

Yagize ati “Ni byo ikibazo cy’amazi meza hano turagifite ariko kirimo gukorwa kuko dufite umushinga munini uri gukura amazi ku Rebero uyanyuza i Mataba ndetse harimo harubakwa ibigega byayo ku buryo nizeye ko umubare w’abaturage bagera kuri 45% bagerwaho n’amazi mu kwa Gatandatu bazaba bageze kuri 75%.”

Uyu muyobozi na we yemeza ko mu tugari icyenda tugize Mageragere tubiri gusa ,ari two tugerwamo n’amazi meza.

Umwana wo mu Murenge wa Mageragere ari kuvoma amazi mabi yo muri Nyabarongo
Mucyebyankanda Donatille utuye mu Mudugudu wa Rugendabari agaragaza ko bahangayikishijwe cyane no kubona amazi meza
Umunyamabanga Nshingwabikorwa w’Umurenge wa Mageragere, Christophe Ntirushwa

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza