Tumba College: Abanyeshuri 358 basoje amasomo biyemeje kutanena umurimo uwo ari wo wose

Yanditswe na Tombola Felicie
Kuya 16 Gashyantare 2017 saa 09:54
Yasuwe :
1 0

Abanyeshuri 358 barangije icyiciro cya mbere cya Kaminuza mu Ishuri ryigisha amasomo y’Ubumenyingiro n’ikoranabuhanga (Tumba College of Technology) bahize ko aho bagiye ku isoko ry’umurimo nta n’umwe muri bo uzanena umurimo uwo ariwo wose.

Abasoje amasomo ni abakobwa 92 n’abahungu 266, mu mashami atatu ariyo ingufu zisubiranya (Alternative Energy), ibijyanye na mudasobwa (Information Technology) ndetse n’ibijyanye n’itumanaho (Electronic and Telecommuniction).

Mu muhango wabaye kuri uyu wa 16 Gashyantare 2017, abarangije bahamije ko hari itandukaniro hagati y’umuntu ukora ibyo yize n’upfa kubikora nta bumenyi afite.

Shyaka James wasoje mu ishami ry’ibijyanye n’ikoraanabuhanga (Information Technology) wanavuze mu izina ry’abanyeshuri barangije amasomo yatangaje ko ubumenyi bahawe buzagaragaza itandukaniro ku isoko ry’umurimo.

Ati “Twiyemeje gushyira mu bikorwa ibyo twize kugira ngo tugaragaze ko umuntu wize akora kandi agatanga serivisi zitandukanye n’iz’abandi . Ntabwo tuzanena umurimo kuko igiha agaciro buri murimo wose ni uburyo ukozwemo buwutandukanya n’iby’abandi.”

Nkusi Gatako Egide na we yemeje ko ari bwo bagiye gukora cyane bagateza imbere ibikorerwa mu Rwanda.

Ati “Nkanjye ku giti cyanye, ngiye gushyira mu bikorwa ibyo nize kugira ngo gahunda ya Leta yo guteza imbere ibikorerwa mu Rwanda mbashe kuyigiramo uruhare. Ishuri twizemo ni ishuri ry’ikoranabuhanga, niyo mpamvu nta bumenyi bwo kubika ahubwo ari ukubukoresha tugashaka ibisubizo.”

Umunyamabanga wa Leta muri Minisiteri y’Uburezi, ushinzwe amashuri y’imyuga n’ubumenyingiro, Rwamukwaya Olivier, yagarutse ku bikorwa bitandukanye by’udushya iryo shuri ryagezeho bigizwemo uruhare n’abanyeshuri ndetse n’abarimu babo abasaba kubifatiraho urugero mu guhanga imirimo isubiza ibibazo by’abaturage.

Harimo nk’ibyuma bishyushya amazi bihakorerwa (solar water heaters), gusana mudasobwa zashaje zigahabwa amashuri azikeneye, gukora biogaz, gukora amashyiga adakoresha inkwi nyinshi n’ibindi.

Rwamukwaya yabagaragarije ko aribwo urugendo rwo guhatana rutangiye abasaba kutadohoka.

Ati “Iyi ni intambwe nziza muteye mu buzima bwanyu kandi ni amahirwe ataragizwe n’abandi benshi mu rubyiruko mungana yo guhabwa ubumenyingiro nk’uko mwungukiye hano . Uyu rero ni umwanya mwiza kuko mutavunikiye ubusa mukwiye kubibyaza umusaruro.”

Ku ruhande rw’ubuyobozi bw’ishuri ryabo, Umuyobozi wa Tumba College Eng. Gatabazi Pascal yunze mu ry’abanyeshuri abibutsa kudasuzugura umurimo uwo ariwo wose.

Ati” Mugomba gutinyuka umurimo uwo ariwo wose. Nta kuvuga ngo umurimo uyu n’uyu uraciriritse, kuko umurimo muto uguhesha umunini.”

Guhanga imirimo ndetse no kugana BDF beretswe ko byabafasha gutera imbere ndetse ntibabe ba nyamwigendaho bakanakorana n’abandi bikorera babatanze ku isoko ry’umurimo.

Tumba College of Technology, ni ishuri rikuru ry’ubumenyi n’Ikoranabuhanga rikaba ari rimwe mu mashuri umunani ya Leta yigisha ayo masomo mu gihe andi 10 asigaye ari ay’abikorera , kuko mu Rwanda hari bene ayo mashuri 18.

Abayobozi bo muri Tumba College
Bamwe mu banyeshuri bahawe impamyabumenyi
Eng Gatabazi Pascal, Umuyobozi wa Tumba College n'Umunyamabanga wa Leta ushinzwe amashuri y'imyuga n'ubumenyingiro, Rwamukwaya Olivier
Ababyeyi bitabiriye ibi birori
Abanyeshuri bahize abandi mu gutsinda neza bahembwe
Umuyobozi wa Tumba College, Eng. Gatabazi Pascal

Amafoto: Tumba College PRO
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza