Twamaze kumenya aho umwanzi ari, niho tugiye kwerekeza imitutu y’imbunda zacu – CP Rwamungu

Yanditswe na Prudence Kwizera
Kuya 19 Ugushyingo 2017 saa 07:30
Yasuwe :
0 0

Umuyobozi wa Polisi mu Ntara y’Amajyepfo, CP Rwamungu Gumira Gilbert, yabwiye abaturage bo mu Karere ka Nyaruguru ko urugamba rw’amasasu rwarangiye kandi umwanzi usigaye nawe akaba yaratahuwe.

Kuri uyu wa 18 Ugushyingo 2017, Polisi yafatanyije n’abaturage n’izindi nzego , batera ibiti ibihumbi icyenda birimo n’ibivangwa n’imyaka ku buso bwa hegitari esheshatu, hagamijwe kurengera ibidukikije no kurwanya amapfa.

Ibyo biti byatewe mu Kagari ka Bitare, Umurenge wa Ngera, hamwe mu hakenewe guterwa ibiti byinshi kuko bimwe mu byari bihasanzwe byatemwe, ibindi bikaba bishaje.

Nyuma y’icyo gikorwa, CP Rwamungu yaganirije abaturage ababwira ko muri iki gihe umwanzi w’u Rwanda ari ubukene, inzara ndetse n’akarengane umuturage ashobora kugirirwa, abizeza ko bazafatanya kumurwanya.

CP Rwamungu ati “Ibuye ryagaragaye ntiriba ricyishe isuka, twarangije kumenya aho umwanzi ari, umwanzi ari ku bukene, ari ku nzara, ari mu karengane umuturage ashobora kugirirwa, aho rero niho tugiye kwerekeza imitutu y’imbunda zacu. Kurwanya ibyo byose ni ibi twatangiye byo gutera ibiti, ikintu cya mbere gitera inzara ni amapfa.”

Yakomeje avuga ko urugamba rw’amasasu rwarangiye abasaba kwirinda abashobora kubashuka ahubwo bagakunda umurimo, bagakora cyane bakarwanya ubukene kandi hagira umuturage ukorerwa akarengane akegera inzego z’ubuyobozi akarenganurwa, bityo abanyarwanda bose bakabaho mu mahoro bafite iterambere rirambye.

Yavuze ko Polisi y’Igihugu iherutse gusinyana amasezerano na Minisiteri y’ubutaka n’amashyamba, yo gutera ibiti byinshi kugira ngo mu Rwanda ntihazongere kuba ikibazo cy’amapfa.

Umuyobozi wa Polisi mu Ntara y’Amajyepfo yasobanuye ko ibyo biyemeje batabigeraho bonyine, asaba abaturage ubufatanye kugira ngo u Rwanda rukomeze kuba igihugu gitoshye kandi gifite abaturage bateye imbere.

Yagize ati “Tugomba gutera amashyamba menshi kugira ngo tubone imvura, kandi abakoresha inkwi babigabanye batangire gutekesha gazi. Amakara n’imbaho bitwara amashyamba menshi aba yatemwe, tugomba gutera amashyamba menshi tukaziba icyo cyuho kandi twese dufatanyije.”

Abaturage bo mu Karere ka Nyaruguru bishimiye uburyo Polisi y’Igihugu ikomeza kubegera igakorana nabo igamije kubateza imbere no kubagezaho ibyiza.

Umwe mu baturage witwa Mukankaka Collette ati “Iyo tubona ibyo Polisi yacu ikora biratunezeza tukabona ko twese tugamije kubaka igihugu cyacu no guteza imbere abaturage. Abapolisi tubafata nk’abavandimwe bacu kubera ibyiza byose bakora.”

Umuyobozi wungirije ushinzwe imibereho myiza y’abaturage mu Karere ka Nyaruguru, Kayitesi Collette, yasabye abaturage kubungabunga ibiti byatewe bikazakura neza, birinda kuragiramo amatungo no kubikandagira.

Ibikorwa byo gutera ibiti biri gukorerwa hirya no hino mu gihugu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza