U Bubiligi bwemeje itegeko rihana abahakana n’abapfobya Jenoside yakorewe Abatutsi

Yanditswe na Ferdinand Maniraguha
Kuya 26 Mata 2019 saa 10:08
Yasuwe :
0 0

Inteko Ishinga Amategeko y’u Bubiligi kuri uyu wa Kane yatoye itegeko rihana abahakana n’abapfobya Jenoside yakorewe Abatutsi muri Mata 1994.

Iryo tegeko rinateganya ibihano ku bazahakana Jenoside yakorewe abanyabosiniya mu Mujyi wa Sebrenica mu 1995 igahitana abagabo n’abana b’abahungu basaga ibihumbi umunani.

Icyakora muri iryo tegeko ntihagaragaramo Jenoside yakorewe abanyarumeniya mu 1915. Impamvu ni uko iyi Jenoside itigeze yemezwa n’urukiko urwo ari rwo rwose mpuzamahanga.

Mu ntangiriro z’uku kwezi ubwo Minisitiri w’Intebe w’u Bubiligi, Charles Michel, yari mu Rwanda yaje kwifatanya n’abanyarwanda kwibuka ku nshuro ya 25 Jenoside yakorewe Abatutsi, yijeje ko itegeko rihana abahakana iyo Jenoside rigomba gusohoka vuba.

Yavuze ko guha icyubahiro gikwiriye abazize Jenoside yakorewe Abatutsi ari uguharanira ko itazongera ukundi.

Umunyamabangwa Nshingwabikorwa wa Komisiyo y’Igihugu ishinzwe kurwanya Jenoside, Dr Bizimana Jean Damascène, yabwiye IGIHE ko iryo tegeko rije gukemura byinshi.

Bizimana yavuze ko mu Bubiligi ari hamwe mu hatuye abanyarwanda benshi barimo abahakana mu buryo butandukanye Jenoside yakorewe Abatutsi.

Ati “Ni icyemezo twishimiye kandi twari tumaze igihe dusaba kuko u Bubiligi ni kimwe mu bihugu bike by’i Burayi byari bisigaye bitagira itegeko rihana ipfobya n’ihakana rya Jenoside yakorewe abatutsi. Byahaga urubuga abantu bapfobya bakanayihakana bari muri icyo gihugu gukoresha imvugo zipfobya haba mu bitabo, mu nama mbwirwaruhame, ku mbuga nkoranyambaga ndetse rimwe na rimwe bamwe bakabyigisha abana mu mashuri.”

Bizimana yakomeje agira ati “Ubwo ndatekereza ko abantu nka ba Fillip Reytjens wandika ibitabo bijya no muri za Kaminuza, abantu nka ba Twagiramungu ubivuga ku mugaragaro ko atemera Jenoside yakorewe Abatutsi ndetse akanahakana n’umubare w’abatutsi bishwe, ishyirahamwe nka Jambo ASBL rigizwe n’abana bakomoka ku bajenosideri ubona baharanira gushyigikira ibyaha ba se bakoze, ririya tegeko rizakumira abo bose kandi urirenzeho abe yakurikiranwa mu nkiko.”

Itegeko ryaraye ryemejwe n’Inteko y’u Bubiligi risigaje gusohoka mu igazeti ya Leta kugira ngo ritangire gukurikizwa.

Igihugu cy’u Bubiligi kibarizwamo abanyarwanda basaga ibihumbi 40 barimo n’abakekwaho uruhare muri Jenoside cyangwa abakomoka ku bayikoze.

Jenoside yakorewe Abatutsi yemejwe bidasubirwaho mu 1998 n’urukiko mpanabyaha mpuzamahanga rwashyiriweho u Rwanda mu rubanza rwa Jean Paul Akayesu.

Mu rubanza rwa Akayesu, ku wa 2 Nzeli 1998, igika cya 18 hagira hati "Biragaragara neza ko ubwicanyi bwabereye mu Rwanda mu 1994 bwari bugamije intego imwe rukumbi: gutsemba Abatutsi, bazira gusa ubwoko bwabo, batazira ko baba ari abarwanyi ba FPR […] Iyo Jenoside yabaye mu Rwanda mu 1994, ikorerwa Abatutsi nk’abantu basangiye ubwoko”.

Inteko Ishinga Amategeko y'u Bubiligi yemeje itegeko rihana abahakana Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza