U Bufaransa: Urukiko rwanze icyifuzo cy’u Rwanda cyo koherezaTegera ukekwaho Jenoside

Yanditswe na IGIHE
Kuya 11 Mutarama 2017 saa 09:47
Yasuwe :
0 0

Abacamanza b’urwego rw’u Bufaransa rushinzwe iperereza ku byaha bikomeye, bongeye gutera utwatsi icyifuzo cy’u Rwanda cyo kohereza Pierre Tegera ukekwaho Jenoside yakorewe Abatutsi mu 1994.

Mu mwaka wa 2008 Tegera w’imyaka 65 yashyiriweho impapuro zimuta muri yombi na Leta y’u Rwanda akekwaho kwica Abatutsi 349. Yafatiwe i Nice bigizwemo uruhare n’urugaga rw’Abafaransa biyemeje gushakisha no gushyikiriza ubutabera abakekwaho jenoside (CPCR).

Tegera wari Agronome, ashinjwa kuba mu ntangiriro z’imyaka 1990 yaragize uruhare mu bwicanyi bwakorewe abatutsi mu cyahoze ari komine Kibilira no gufasha mu buryo bukomeye interahamwe zishe abatutsi.

Nkuko Jeune Afrique ibitangaza, abakora iperereza n’abacamanza bo mu rwego rw’iperereza ngo bakoreye ingendo nyinshi mu Rwanda, bahura n’abatangabuhamya benshi bahamya ko Tegera yagize uruhare mu bukangurambaga bushishikariza abahutu kwanga abatutsi muri Kibilira, ndetse akagira n’uruhare mu bwicanyi bwakozwe mbere ya 1994.

Icyakora kuwa 12 Ukuboza 2016, abacamanza mu mwanzuro wabo bavuze ko nta mutangabuhamya wigeze ugaragaza ko Tegera yagize uruhare muri Jenoside. Ikindi ni uko ubutabera bw’u Bufaransa bureba ibyaha bya Jenoside byakozwe mu 1994 gusa.

Mu 2014 nabwo ubutabera bw’u Bufaransa bwari bwanze kohereza Tegera kuburanishirizwa mu Rwanda kuko ngo ko umuntu atagomba gukurikiranwa ku cyaha akekwaho mu gihe cyakozwe nta mategeko agihana yari yakajyaho.

Ntabwo ari ubwa mbere u Bufaransa bwanze ubusabe bw’u Rwanda bwo kohereza abakekwaho Jenoside cyangwa kubaburanisha, kuko buheruka no kwanga kohereza Padiri Wenceslas Munyeshyaka.

Kugeza ubu bumaze kuburanisha batatu gusa bakekwaho Jenoside barimo; Pascal Simbikangwa na ba burugumesitiri Ngenzi na Barahira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza