U Bushinwa bwashyikirije u Rwanda umushinga bwakoze wo gukwirakwiza televiziyo mu byaro

Yanditswe na Habimana James
Kuya 25 Gicurasi 2019 saa 06:02
Yasuwe :
0 0

U Bushinwa bubicishije mu kigo cy’Ikoranabuhanga, StarTimes bwashyikirije leta y’u Rwanda umushinga bwakoze wo gukwirakwiza televiziyo ku bice byo mu cyaro mu gihugu, ni umushinga utuma abaturage bashobora kubona amakuru ndetse n’izindi gahunda z’iterambere.

Ni igikorwa cyabereye mu karere ka Rulindo mu Ntara y’Amajyaruguru. Muri rusange imiryango 6000 hirya no hino mu gihugu niyo yagejejweho ibi byiza.

Umunyamabanga uhoraho muri Minisiteri y’Ubutegetsi bw’Igihugu Ingabire Assumpta yashimiye leta y’u Bushinwa ku bw’uyu mushinga, avuga ko ari gahunda ibihugu byombi byafatanyijemo ndetse na StarTimes hagamijwe ko abaturage bagera ku makuru.

Yagize ati “Leta y’u Rwanda ifite gahunda ko abaturage bahuguka bakamenya amakuru y’ibibera ahandi ari nako baninezeza, bakareba imipira n’imico y’ahandi, uyu ni umunsi mwiza kuko no mu tundi turere ibi bikoresho barabibonye ariko igikomeye ni uko bigomba gucungwa neza.”

Yavuze ko ibi bikoresho byashyizwe ahantu hahurira abantu benshi, haba mu bigo nderabuzima, ku tugari n’ahandi.

Yabwiye aba baturage ko iyo Perezida Kagame yagiye mu mahanga abanyarwanda baba babifitemo amahirwe ajyanye no gushakira igihugu iterambere.

Yagaragaje ko gahunda ihari ni uko buri muturage yagira televiziyo mu rugo rwe kandi ko bigomba kuzagerwaho.

Xing Yuchun, wari uhagarariye ambasade y’u Bushinwa mu Rwanda, yavuze ko uyu mushinga ugamije kugeza izi televiziyo ku miryango ibihumbi 10 hirya no hino muri Afurika, uyu ukaba ari umushinga uri mu yindi 10 Perezida w’u Bushinwa Xi Jinping yagiranye n’uyu mugabane mu nama yabereye muri Afurika y’Epfo mu 2015.

Yagize ati “Uyu ni umushinga ugamije kugeza amakuru ku batuye ibice by’icyaro, ikindi navuga ni uko imibanire y’u Rwanda n’iki gihugu yateye imbere hanashingiwe ku ruzinduko rwa Perezida w’u Bushinwa aheruka kugirira mu Rwanda.”

Umuyobozi Mukuru wa StarTimes, Jess Jing we yavuze ko abatuye mu bice by’icyaro bazagira amahirwe yo kugera ku makuru yaba ayo kubona amasoko ku buhinzi n’ibindi.

Yagize ati “Uyu mushinga kandi uzatanga ibyishimo ku baturage mu gihe bazaba bareba imipira y’imbere mu gihugu no muhanga, hejuru y’ibi kandi uyu mushinga uzafasha abaturage kumenya gahunda za leta kuko abenshi mu bice by’ibyaro bazaba bafite amahirwe yo kugera ku makuru biciye kuri izi televiziyo.”

Abayobozi batandukanye bitabiriye umuhango u Bushinwa bwashyikirijemo u Rwanda umushinga bwakwirakwijemo televiziyo mu byaro
Umunyamabanga Uhoraho muri Minisiteri y’Ubutegetsi bw’Igihugu, Ingabire Assumpta na Xing Yuchun, Ushinzwe ibikorwa muri Ambasade y’u Bushinwa bashyira umukono mu gitabo gikubiyemo ibikorwa by’umushinga ‘Satellite TV’
Umunyamabanga Uhoraho muri Minisiteri y’Ubutegetsi bw’Igihugu, Ingabire Assumpta na Xing Yuchun, Ushinzwe ibikorwa muri Ambasade y’u Bushinwa baherekanya igitabo gikubiyemo ibikorwa by’umushinga ‘Satellite TV’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza