U Rwanda ku rutonde rw’ahantu nyaburanga habereye gutemberera mu 2017

Yanditswe na
Kuya 8 Mutarama 2017 saa 06:06
Yasuwe : XX
0

U Rwanda rwaje ku mwanya wa 15 ku rutonde rw’ahantu nyaburanga 17 ku isi umuntu ashobora gutemberera no kuruhukira muri uyu mwaka wa 2017.

Ni urutonde rwakozwe ku bufatanye bw’abanyamakuru ba CNN bari hirya no hino ku Isi.

Aba banyamakuru bagiye bagaragaza ahantu umuntu wifuza kujya mu kiruhuko yakwerekeza kandi akahagirira ibihe bitazibagirana.

Pariki y’Akagera n’ingagi zo mu Birunga ni bimwe mu byatumye u Rwanda ruza kuri uru rutonde.

Nyuma kandi y’imyaka isaga 22 Jenoside yakorewe abatutse ihagaritswe, u Rwanda rumaze kugera ku iterambere rigaragarira buri wese.

Kuri ubu Kigali iza mu mijyi y’icyitegererezo aho benshi mu bayisuye batangarira isuku n’urugwiro biharangwa.

Amafunguro atandukanye arimo aya gakondo n’andi yo mu bihugu byo mu karere ni bimwe mu bishimisha ba mukerarugendo.

Mu masaha yo ku manywa abasuye u Rwanda bashobora kwirebera ingagi ziri muri Pariki y’ibirunga ari na ko babizamuka.

Kuba u Rwanda ruteganya kugarura Inkura (Rhinos) muri Pariki y’Akagera muri 2017 kandi ni bimwe mu byatuye igihugu kigaragara kuri uru rutonde.

Kuzana izi nyamaswa bizatuma pariki y’Akagera ihita igira inyamaswa nini cyane (Big Five) ari zo Intare zagaruwe mu 2015, Inzovu, Ingwe, Imbogo n’Inkura, igikorwa kitezweho gukurura ba mukerarugendo benshi.

Uko urutonde ruteye

Prince Edward Island, Canada

Ku mwanya wa mbere haje ikirwa cyo muri Canada cyitiriwe Igikomangoma Edward (Prince Edward Island). Kuri iki kirwa hagaragara inkombe z’inyanja zikikijwe n’amabuye manini ndetse ndetse n’uburobyi bukorwa ku rwego rwo hejuru.

Mu byatumye hashyirwa ku mwanya wa mbere ariko n’inyubako iherereye mu mujyi wa Charlottetown, yabereyemo inama ya mbere mu 1864, ari na yo mbarutso yo kuvuka kwa Canada yari mu maboko y’ubwami bw’u Bwongereza.

Muri uyu mwaka nibwo hazizihizwa imyaka 150 ishize Canada ibayeho.

Penang, Malaysia

Ku rutonde rw’ahantu nyaburanga umuntu ashobora gutemberera muri uyu mwaka wa 2017 kandi hazaho ikirwa cya Penang muri Malaysia.

Impamvu yatumye iki kirwa kiza kuri uru rutonde, ni umwihariko w’amafunguro ahuje imico y’ibihugu by’u Bushinwa, Malaysia n’u Buhinde.

Aya mafunguro ushobora gusanga mu mujyi wa George Town, iyo ahuye n’inyubako zifite amateka akomeye yo kuva mu gihe cy’ubukoloni, bituma uwahatembereye agira ibihe bitazibagirana mu buzima bwe.

Colombia

Ku mwanya wa gatatu w’urutonde rw’ahantu hazaho Colombia.

Iki gihugu cyari kizwiho kuba mu ntambara, giherutse gusinya amasezerano yo kugarura amahoro ku buryo umutekano ari wose.

Mu byatumye iki gihugu kigaragara kuri uru rutonde harimo ubuhinzi bw’ikawa ndetse n’uburyo itegurwa, inyubako zifite amateka akomeye zirimo nk’isomero Parque Biblioteca España ryubatswe hagendewe ku gishushanyo cyakozwe na Giancarlo Mazzanti.

Bermuda

Ku mwanya wa kane w’ahantu nyaburanga umuntu ashobora gutemberere muri uyu mwaka haza ikirwa cya Bermuda.

Uretse umucanga uri ku nkengero z’inyanja, mu bikunze gukurura abasura Bermuda harimo n’uruvange rw’imico itandukanye irimo iy’Abongereza, Abanyafurika, Abahinde n’Abanyamerika.

Muri uyu mwaka ariko hari umwihariko w’uko Bermuda ari yo izakira amarushanwa y’ubwato azwi nka America’s Cup.

Aya marushwanwa azaba muri Gicurasi na Kamena, akazaba ari ku nshuro yayo ya 35. Yatangiye kuba mu 1851.

Katahdin Woods and Waters National Monument, US

Kuri uru rutonde kandi hagaragaraho pariki ya Katahdin Woods and Waters National Monument iherereye muri Leta Zunze Ubumwe za Amerika.

Nubwo imaze igihe gito ifunguwe kuko yatangiye gukora muri Kanama 2016, iyi pariki afite ibiti byiza ndetse n’imigezi umuntu ashobora kujyamo akoga.

Isaan, Thailand

Ahandi hantu haza kuri uru rutonde ni agace ka Issan, garereye mu majyaruguru y’uburasirazuba bwa Thailand.

Aka gace kazwiho kugira ibikorwaremezo byinshi kandi byiza birimo ibibuga by’indege, amasoko n’amahoteli.

Niko gaherereyemo kandi ibisigazwa by’ahari hubatswe ubwami bwa Khmer, bwabayeho hagati y’ikinyejana cya 9-15.

Hari kandi n’amafunguro atandukanye yiganjemo umuceli n’ipapayi.

Bhutan

Kuri uru rutonde kandi hagaragaraho ubwami bwa Bhutan, butuwe n’abaturage biganjemo aba-Buddhist.

Ubu bwami buherereye mu misozi ya Himalaya buzwiho kuba isoko y’ibyishimo n’umunezero bitwe n’imibanire y’abaturage baho.

Gusura iki gihugu ariko ni byiza ko umuntu abanza gusura urubuga rw’Ikigo gishinzwe ubukerarugendo kugira ngo amenye amategeko n’amabwiriza asabwa gukurikiza igihe agezeyo.

Chengdu, China

Akandi gace kaza kuri uru rutonde ni umujyi wa Chengdu uherereye mu ntara ya Sichuan mu Bushinwa.

Uyu mujyi uzwiho umwihariko wo korora inyamaswa zizwi nka Panda, ahari ikigo kinini gikorerwamo ibikorwa byo kuzitaho kizwi nka Chengdu Research Base of Giant Panda Breeding.

Niho habarizwa 80% by’inyamaswa za Panda ku Isi yose.

Abifuza kuhasura bagirwa inama yo kujyayo muri Werurwe, Kamena, Nzeri n’Ugushyingo kuko ikindi gihe haba hari kugwa imvura.

Aarhus, Denmark

Iyo uvuze Denmark, benshi bahita biyumvira imijyi irimo Copenhagen nyamara umujyi wa Aarhus utatswe n’ibyiza bituma abahasuye bagira ibihe bitazibagirana.

Uyu mujyi ugaragaramo inyubako zo mu gihe cya kera n’ubugeni muri uyu mwaka ufite intego yo guhinduka ‘Umujyi w’Umuco mu Burayi’, ahateganyijwe kubera ibirori bitandukanye bisaga 350.

Aros Aarhus Inzu ngangamurage ushingiye ku muco yitezweho kwakira ibikorwa bisaga 350 muri uyu mwaka

Bordeaux, u Bufaransa

Imirima y’imizabibu n’inzu zubatswe ku buryo bwa kera ni bimwe mu byatumye akarere ka Bordeaux mu Bufaransa kaza kuri uru rutonde.

Uyu mujyi ukunda gusurwa cyane hagati mu mwaka dore ko ari bwo imirima y’imbuto zikorwamo divayi iba iri gusarurwa.

Abahasura ariko bagirwa inama yo kwirinda kujyayo muri Nyakanga na Kanama ngo kuko ba mukerarugendo baba ari benshi, ahubwo bakajyayo muri Gicurasi, Kamena na Nzeri kuko aribwo baba bamaze kugabanuka.

Imirima y'ibihingwa bikorwamo divayi

Uburengerazuba bwa Iceland

Akandi gace abantu bifuza gutembera badakwiye kwirengegiza ni uburengerazuba bwa Iceland.

Abajyayo bagira amahirwe yo gutembera mu buvumo buherereye munsi y’urubura, buri mu mijyi itandukanye.

Ubuvumo buherereye munsi y’urubura mu Burengerazuba bwa Iceland

Albania

Akazuba, guhenduka ndetse n’umucanga mwiza hafi y’amazi bi bimwe mu byiza wasanga muri iki gihugu cyabonye ubwigenge mu 1990.

Uhasanga inyubako zikubiyemo amateka y’iki gihugu yiganjemo ay’umunyagitugu Enver Hoxha wagenderaga ku mahame ya Staline wahoze ategeka u Burusiya.

Amman, Jordan

Nubwo Jordan yegeranye n’ibihugu byo mu burasirazuba bwo hagati byiganjemo intambara n’umutekano muke, ho amahoro ni yose.

Impamvu iki gihugu kigaragara kuri uru rutonde ni uko umujyi waho witwa Amman uyu mwaka wagizwe uw’umuco wa Islam, ahazaba herekanwa amateka y’iri dini.
Uretse iki gikorwa giteganyijwe muri uyu mwaka ariko, ngo ku bakunzi b’umuziki uri mu njyana y’umwimerere gusura uyu mujyi ntibyabagwa nabi.

By’umwihariko mu gihe cy’ukwezi ko gusiba (Ramadan), izaba hagati ya 27 Gicurasi na 24 Kamena), mu masaha y’ijoro muri Citadel Hill hazajya haberamo umuziki w’umwimerere mu rurimi rw’icyarabu.

Bitandukanye no mu bindi bihugu bigendera ku mahame y’idini ya Islam, muri Jordan ntibabangamira ba mukererarugendo batari abayisilamu ngo babategeke kubahiriza igisibo cya Ramadan.

Senegal

Ikindi gihugu cyo muri Afurika kigaragara kuri uru rutonde ni Senegal, aho gifatwa nka kimwe mu bikunzwe n’abakora sport yo kugendera hejuru y’amazi (Surf).
Mu bindi bikurura abasura Senegal harimo umuziki, aho abaturutse imihanda yose bitabira Iserukiramuco rya Blues du Fleuve festival ritegurwa n’umuhanzi Baaba Maal.

Houston, US

Kuba Umujyi wa Houston uherereye muri leta ya Texas uzaberamo umukino wa nyuma w’igikombe cy’umupira w’amaguru muri Amerika (Super Bowl) ngo ni bimwe mu byatumye uza kuri uru rutonde.

Si ibi gusa kandi kuko mu bindi bituma abantu bahasura harimo no kuba muri Texas habarizwa ama resitora asaga ibihumbi 10, ategurirwamo amafunguro agaragaza umuco wo mu bihugu bisaga 70 byo ku Isi.

Australia

Ku mwanya wa 17 mu hantu nyaburanga umuntu ashobora gusura mu 2017 haza Australia.

Mu bice bikunze gusurwa cyane hazamo Great Barrier Reef, ahantu hambere ku isi hagaragara urusobe rw’ibinyabuzima byo mu nyanja.
Ahandi umuntu ashobora gusura muri iki gihugu n’ikirwa cya Heron, kibarizwamo ibikorwa byinshi bitandukanye bigamije kurengera ibidukikije.

Ingago zo mu Birunga ziri mu byatumye u Rwanda rushyirwa kuri uru rutonde

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza