U Rwanda na Bénin byashyize umukono ku masezerano y’ubufatanye mu itumanaho no kwita ku bidukikije

Yanditswe na Jean Pierre Tuyisenge
Kuya 30 Nzeri 2017 saa 07:10
Yasuwe :
0 0

U Rwanda na Bénin byashyize umukono ku masezerano y’ubufatanye yiganjemo ayo gufatanya mu bijyanye n’ikoranabuhanga, kwita ku bidukikije n’iterambere rirambye.

Ni igikorwa cyakozwe ubwo Komisiyo zihoraho hagati y’ibihugu byombi (JPC), zahuraga bwa mbere hagamijwe gushimangira umubano usanzwe uri hagati y’u Rwanda na Bénin. Ni umuhango wabaye ku wa 29-30 Nzeri 2017 mu Karere ka Rubavu.

Wayobowe na Minisitiri w’Ububanyi n’Amahanga n’Ibikorwa by’Umuryango wa Afurika y’Iburasirazuba, Louise Mushikiwabo, ari kumwe na mugenzi we wo muri Bénin, Aurélien Agbénonci.

Iyo Komisiyo ni kimwe mu bisubizo byavuye mu ruzinduko Minisitiri Louise Mushikiwabo yagiriye i Cotonou muri Benin muri Gashyantare 2017. Izafasha ibihugu byombi kumenya ahari amahirwe bishobora kugiranamo ubufatanye.

Muri uwo muhango kandi, impande zombi zasuzumiye hamwe ishyirwa mu bikorwa ry’imyanzuro yashyizweho umukono hagati y’ibyo bihugu byombi irimo amasezerano y’ubufatanye mu ngendo z’indege, gukurirwaho visa n’imikoranire hifashishijwe RwandAir.

Umuhango kandi wabaye n’umwanya mwiza w0 kurebera hamwe izindi nzego bagiranamo amasezerano y’imikorere nko mu ikoranabuhanga, ubucuruzi, imiyoborere y’imijyi, guteza imbere ishoramari no gukuriranaho gusoresha kabiri ibicuruzwa na serivisi ziva muri kimwe muri ibyo bihugu.

Ubwo yagiriraga uruzinduko mu Rwanda, Perezida wa Bénin, Patrice Talon, yavuze ko yifuza gukorana n’u Rwanda mu nzego zitandukanye; na mugenzi we w’u Rwanda, Paul Kagame, amwizeza inkunga no gukorana na Bénin hagamijwe kugeza ibyo bihugu byombi ku rundi rwego mu bukungu.

U Rwanda na Bénin bimaze iminsi bifitanye imikoranire myiza hibandwa ku bibazo bya Afurika n’iby’Isi muri rusange. Ibihugu byombi byashyize umukono ku masezerano mu by’indege muri Werurwe 2016, nyuma RwandAir itangira gukorerayo ku wa 2 Nzeri 2016.

Minisitiri Mushikiwabo ashyira umukono ku masezerano y'ubufatanye
Minisitiri w'Ububanyi n'Amahanga wa Benin,Aurélien Agbénon, ashyira umukono ku masezerano agamije gufatanye hagati y'igihugu cye n'u Rwanda
Ibihugu byombi byemeranyije gufatanya mu nzego zirimo ikoranabuhanga ndetse no kwita ku bidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza