U Rwanda ntabwo rurimo gusabiriza impunzi - Mushikiwabo

Yanditswe na Rabbi Malo Umucunguzi
Kuya 14 Werurwe 2018 saa 07:18
Yasuwe :
0 1

Minisitiri w’Ububanyi n’Amahanga, Louise Mushikiwabo, yatangaje ko uburyo u Rwanda ruri gukurikirana imyitwarire y’impunzi bidakwiye kumvikana ko byatera ubwoba izindi zishaka kuza mu Rwanda, kuko u nta kibazo rwagirana nazo zibashije kubahiriza amategeko.

Mu kiganiro n’abanyamakuru kuri uyu wa Kabiri, Minisitiri Mushikiwabo yagarutse ku mpunzi z’Abanye-Congo ziheruka kwigaragambya zikanagerageza guhangana n’abashinzwe umutekano; bikaviramo bamwe kuhasiga ubuzima.

Uretse ibyo, Leta inahanganye n’ikibazo cy’impunzi z’Abarundi zavuye muri Repubulika Iharanira Demokarasi ya Congo mu minsi ishize, zinjiranye imyumvire idasanzwe y’idini zikanga kubarurwa hakoreshejwe ikoranabuhanga, zanga ubuvuzi busanzwe mu gihugu no gukingiza abana, ibintu Mushikiwabo avuga ko bidashoboka.

Yavuze ko gufungurira amarembo impunzi n’abimukira biri mu ndangagaciro n’umuco by’Abanyarwanda, ariko igihe hagaragaye ikibazo mu mpunzi kitagomba gutambukwaho hatarebwe neza impamvu zacyo.

Yakomeje agira ati “Kuvuga rero ko byagira ingaruka ku zindi mpunzi ari iza Libya cyangwa izituruka ahandi, u Rwanda ntabwo rurimo gusabiriza impunzi. Niziza tuzazakira, nizitaza nabyo ntacyo bidutwaye dufite abaturage bacu bo kurebera.”

Mushikiwabo yavuze ko u Rwanda rwagaragarije Israel ifite umubare w’abimukira ishaka kohereza mu Rwanda, ko ruzabakira gusa igihe bizaba bikurikije amategeko mpuzamahanga.

Naho ku bimukira ibihumbi 30 ruheruka gutangaza ko rushobora kwakira bavuye muri Libya, Minisitiri Mushikiwabo yavuze ko hakirebwa umubare ushoboka, ubu bikaba biri gukurikiranwa binyuze mu Muryango wa Afurika Yunze Ubumwe (AU).

Yagize ati “Twiteguye kubakira ariko hagendewe ku bushobozi bw’igihugu cyacu. Ntabwo tugiye kwakira Isi yose hano, ariko duteganya kwakira bamwe nk’abari muri Libya bari mu bihe bibabaje nko kugurishwa ku isoko no gufatwa nabi.”

Yavuze ko hakirebwa neza abimukira bari muri Libya ku bufatanye na AU n’Umuryango Mpuzamahanga wita ku Bimukira, harebwa abahari, ibibaranga n’umubare u Rwanda rwakwakira, ku buryo bizabaho “mu byumweru biri imbere.”

Minisitiri w’Ububanyi n’Amahanga, Louise Mushikiwabo, yatangaje ko uburyo u Rwanda ruri gukurikirana imyitwarire y’impunzi bidakwiye kumvikana ko byatera ubwoba izindi zishaka kuza mu Rwanda, kuko u nta kibazo rwagirana nazo zibashije kubahiriza amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza