U Rwanda rugiye kunonosora amategeko agenga ‘drones’

Yanditswe na Herve Ugirumukunda
Kuya 15 Ugushyingo 2017 saa 08:37
Yasuwe :
0 0

Leta y’u Rwanda iri kwiga ku ishyirwaho ry’amategeko agenga indege ziguruka zidakeneye uzitwara ‘Drones’ zikomeje kwiyongera ubutitsa mu gihugu.

Impuguke mu bwikorezi bwo mu kirere, abayobozi b’ibibuga by’indege, ab’inzego z’indege za gisivili, abakuru b’inganda n’abandi bafatanyabikorwa bari mu mwiherero w’iminsi itatu i Kigali kuva ku ya 14 kugeza ku ya 16 Ukwakira 2017 biga uko ubwo bwoko bw’indege bwashyirirwaho amategeko ngengamikorere.

Umunyamabanga wa Leta muri Minisiteri y’Ibikorwaremezo ushinzwe gutwara Ibintu n’Abantu, Jean de Dieu Uwihanganye, yabwiye IGIHE ko imikorere ya drones yari isanzwe irimo akajagari kashobora guteza impanuka.

Ati “Nk’u Rwanda twihaye gahunda yo kuba ikiraro cy’udushya mu ikoranabuhanga ry’indege zitagira abapilote. Ariko uko ziyongera zinyura mu kirere gisanzwe gikoreramo izindi ndege. Hagomba kubaho rero uburyo zo tuzishyiriraho amategeko ngo zidateza impanuka.”

Yongeyeho ko amategeko azashyirwaho abanje kunonosorwa neza ngo hato atabangamira abashaka guhanga udushya tw’uko izo ndege zakoreshwa mu koroshya ubwikorezi bw’abantu n’ibintu.

Uwihanganye avuga ko Leta iri gushyiraho amategeko ahamye azigenga ashobora kuzaboneka mu gihe cy’umwaka umwe.

Miguel Ramos uri gutanga amahugurwa ku mategeko azashyirirwaho za drones, yasobanuye ko bifuza ko izi ndege zitazongera kuguruka ahantu hagendwa n’abantu benshi.

Mu mategeko azashyirwaho, drones zizemererwa kogoga ikirere ku manywa gusa kandi ahantu hagaragara neza hatari igihu, nta drone izongera kuguruka mu bujyejuru burenze metero 120 kandi zizabuzwa kuguruka mu bilometero 5.5 uvuye ku bibuga by’indege zisanzwe.

Drones kandi zizahabwa imihanda y’ikirere nk’indege zisanzwe, abazitwara bahabwe amahugurwa y’ubwikorezi bwo mu kirere n’ibyangombwa.

Barry Kashambo, Umuyobozi w’Ishami rya Loni ry’Imicungire y’Indege za Gisivili, ICAO, muri Afurika y’Uburasirazuba n’iy’Amajyepfo avuga ko kuri ubu muri aka karere habarurwa drones zisaga 6000.

Zikoreshwa mu kurwanya inkongi z’umuriro, gufotora, gupima imiterere y’ubutaka n’ikirere, ubutasi, gutera imiti yica udukoko, gushaka no gutabara ababuriwe irengero ndetse no gutwara imizigo.

Umugereka w’amabwiriza ya Minisitiri yo ku wa 26 Mata 2016 arebana n’iby’indege za gisivili zitagira abapilote, werekana ko n’ubusanzwe izi ndege zitemerewe gukorera mu Rwanda mu gihe zitandikishijwe mu kigo gishinzwe iby’indege za gisivili, kandi nyirayo agahabwa icyemezo nyuma yo kwishyura 110 000Frw.

Nyiri drones abanza kwerekana ko zitazateza umutekano muke, akabimenyesha ubuyobozi bw’aho atuye, polisi n’abaturage b’aho mbere yo gutangira kuzikoresha, kandi akirinda ko izifata amashusho zabangamira wa rubanda.

Minisitiri Uwihanganye avuga ko mu Rwanda drones za Zipline ari zo zikoreshwa cyane mu gutanga amaraso ku bigo nderabuzima 21, ariko ubu zatangiye gusabirwa gutwara n’ibindi bikoresho mu minsi iri imbere.

Minisiteri y’Ibikorwa remezo ivuga ko umubare w’abasaba gukoresha drones mu Rwanda ukomeje kwiyongera, ndetse hakazanashingwa ikigo gishinzwe by’umwihariko guteza imbere ubu bwoko bw’indege.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza