U Rwanda rugiye kwakira impuguke ziga ku iterambere ry’ubumenyi n’ubushakashatsi

Yanditswe na Uwishyaka Jean Louis
Kuya 11 Ugushyingo 2016 saa 08:10
Yasuwe : XX
0

U Rwanda ku bufatanye n’Ikigo mpuzamahanga giteza imbere ubumenyi (TWAS), ruzakira inama yiga ku iterambere ry’ubumenyi n’ubushakashatsi izahuza abasaga 300.

Iyo nama rusange ya 27 y’ikigo TWAS izaba kuva tariki ya 12 kugeza ku ya 17 Ugushyingo 2016, i Kigali. Abazayitabira baturutse mu bihugu 50 byo ku isi, barimo abaminisitiri bashinzwe guteza imbere ubumenyi, abashakashatsi, ndetse n’abayobozi b’amashyirahamwe aharanira guteza imbere ubumenyi, imiryango nterankunga ndetse n’itegamiye kuri Leta.

Bimwe mu biteganyijwe kuyiganirirwamo, birimo uruhare rw’ubumenyi mu iterambere ry’ibihugu biri mu nzira y’amajyambere.

Minisitiri w’Uburezi Dr. Musafiri Papias Malimba, agaruka kuri iyi nama, yavuze ko ubufatanye hagati ya Guverinoma y’u Rwanda na TWAS butanga amahirwe menshi azatuma urwego rw’ubushakashatsi mu gihugu rurushaho gutera imbere.

Ibi kandi ngo bizatuma u Rwanda rubasha kugendana n’iterambere rigezweho ku mugabane wa Afurika mu guteza imbere ihangwa ry’ibishya, no guhangira urubyiruko imirimo.

Ati “Kubaka ubushobozi bwacu mu bijyanye n’ubumenyi, ikoranabuhanga n’ubushakashatsi bizadufasha mu iterambere ry’inzego zitandukanye zirimo ubuzima, ubuhinzi, ubucuruzi n’inganda, ibikorwaremezo, ibidukikije n’ikoranabuhanga ari byo nkingi z’ibanze mu iterambere ry’igihugu cyacu.”

Yakomeje agira ati “Twishimiye kwakira mu Rwanda inama rusange ya 27 y’ikigo mpuzamahanga giteza imbere ubumenyi kandi duhaye ikaze abashyitsi bose bazayitabira.”

Perezida wa TWAS, Bai Chunli, yashimiye intambwe ikomeye u Rwanda rwateye mu guteza imbere ubumenyi, ikoranabuhanga mu nzego zitandukanye ndetse n’urwego rw’uburezi.

Yongeyeho ko mu gihe u Rwanda rugaragara nk’igicumbi cya Afurika mu guhanga ibishya, Kigali ari wo mujyi wari ukwiriye kwakira inama ngarukamwaka ya TWAS.

Yagize ati " U Rwanda rugaragaza indangagaciro z’Ikigo Mpuzamahanga giteza imbere Ubumenyi (TWAS). Ku buyobozi bwiza bwa Perezida Paul Kagame, u Rwanda rwiyemeje gushora imari mu guteza imbere ubumenyi hagamijwe iterambere rirambye ndetse no kuzamura ubukungu. Ibyo ni byo byatumye habaho ubufatanye hagati y’u Rwanda na TWAS kandi impande zombi zibifitemo inyungu zifatika. Iyi nama izafasha guteza mbere umubano ndetse no kuwagurira mu zindi nzego."

Muri iyi nama hazabamo ibiganiro by’abashakashatsi ndetse n’ibiganiro mbwirwaruhame ku bijyanye n’Ubutabire, ibyorezo bigaragara hirya no hino ku isi, ndetse n’uruhare rw’ubumenyi mbonezamubano mu gufasha Isi gutera imbere.

Biteganijwe kandi ko Minisitiri Dr. Musafiri hamwe n’abandi bayobozi bazatanga ibiganiro mu nama ifite insanganyamatsiko igira iti ‘Guhanga ibishya hagamijwe iterambere rirambye’.

Muri iyi nama, u Rwanda ruzagaragaza intambwe yatewe mu myaka icumi ishize rutangije gahunda yo guteza imbere ubumenyi, ikoranabuhanga, ubushakashatsi no guhanga ibishya byafashije guhindura ubuzima bw’Abanyarwanda mu ngeri zitandukanye; kuva ku munyeshuri ukoresha internet mu masomo ye, kugera ku mushakashatsi mu by’ubumenyi wifashisha ikoranabuhanga rigezweho.

Muri iyi nama kandi hazatangazwa uwatsindiye igihembo cya TWAS-Lenovo, kimwe mu bihembo bikomeye ku Isi gihabwa abaharaniye guteza imbere ubumenyi mu bihugu biri mu nzira y’amajyambere.

TWAS yashinzwe mu 1983 ifite intego yo gushyigikira iterambere rirambye binyuze mu bushakashatsi, uburezi, ingamba ngenderwaho na dipolomasi. Ifite abanyamuryango 1.200 batoranyijwe mu bihugu 90, barimo abantu bahawe ibihembo byitiriwe Nobel bagera kuri 15, abahagarariye abandi bahanga mu by’ubumenyi mu bihugu biri mu nzira y’amajyambere.

Abagera kuri 85% bakomoka mu bihugu biri mu nzira y’amajyambere, mu gihe abasigaye ari abakomoka mu bihugu byateye imbere ariko bakoze ibikorwa by’ingirakamaro mu bihugu biri mu nzira y’amajyambere.

Yashinzwe n’itsinda ry’abahanga mu by’ubumenyi bo mu bihugu biri mu nzira y’amajyambere bari bayobowe na Abdus Salam, umunya-Pakisitan w’umuhanga mu by’ubugeni akaba n’umwe mu bahawe igihembo cyitiriwe Nobel. Iri tsinda ryari risangiye imyumvire y’uko ibihugu biri mu nzira y’amajyambere, bibinyujije mu kubaka urwego rw’ubumenyi ruteye imbere, byabasha guhangana n’ibibazo bifite birimo inzara, indwara n’ubukene.

Ni ku nshuro ya kane inama ngarukamwaka ya TWAS ibereye muri Afurika yo munsi y’ubutayu bwa Sahara, nyuma ya Nigeria yayakiriye mu 1995, Senegal muri 1999 na Afurika y’Epfo yayiteguye 2009.

Dr Malimba Musafiri avuga ko iyi nama izafasha u Rwanda kugendana n’iterambere rigezweho mu guhanga udushya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza