Kwamamaza

U Rwanda rwabaye urwa gatanu ku Isi mu kugabanya icyuho mu buringanire

Yanditswe kuya 26-10-2016 saa 10:09' na Rabbi Malo Umucunguzi


U Rwanda rwaje ku mwanya wa gatanu ku Isi mu kugabanya icyuho hagati y’abagabo n’abagore, gusa ibipimo mu bihugu byose biteye inkeke kuko ikinyuranyo mu bikorwa biranga iterambere ry’ubukungu cyazamutse kugeza kuri 59%, kurusha ikindi gihe guhera mu 2008.

Abagore baratera imbere, Angela Merkel ayobora u Budage kuva mu 2005, Christine Lagarde mu Kigega Mpuzamahanga cy’Imari, Dlamini Zuma muri komisiyo ya AU, Leta Zunze Ubumwe za Amerika zishobora kuyoborwa n’umugore ndetse no mu matora y’Umunyamabanga Mukuru wa Loni, abenshi bumvaga ko uyu mwaka hatahiwe umugore n’ubwo bitashobotse.

Nubwo hari ibimenyetso bitanga icyizere bwose, Raporo igaragaza ibipimo by’uburinganire ikorwa na World Economic Forum (WEF), ‘Global Gender Gap Index 2016’, ivuga ko ibihugu byose bifite akazi gakomeye.

Iyi raporo ngarukamwaka ireba intambwe iterwa mu buringanire yibanze mu nzego enye zirimo uko uburezi butangwa, ubuzima n’imibereho, amahirwe mu bukungu n’ubushobozi mu bya politiki.

Igereranya rya WEF rishingiye ku bipimo by’uyu munsi n’umuvuduko ibihugu bifite, rigaragaza ko kuziba icyo cyuho mu bukungu byazagerwaho mu 2186, bivuze imyaka 170 uhereye uyu munsi. Nyamara hagendewe kuri raporo ya 2015, byatekerezwaga ko bizashoboka nko mu 2133.

U Rwanda rukomeza gutera intambwe

Iyi raporo ivuga ko “nta gihugu ku Isi kiraziba burundu icyuho hagati y’abagabo n’abagore, ariko ibihugu bine muri bitanu byo mu Burayi bw’Amajyaruguru na Atlantica, n’u Rwanda ku nshuro ya mbere, byagabanyije icyuho hejuru ya 80%. Yemen niyo iza inyuma kuko imaze kugabanyaho 52% gusa.’’

Uyu mwaka u Rwanda rubaye urwa gatanu mu gihe mu 2015 rwari urwa gatandatu. Nka Leta Zunze Ubumwe za Amerika yavuye ku mwanya wa 28 yariho mu mwaka ushize, igera kuwa 45, ahanini harebwe ku buryo abagabo n’abagore binjiza amafaranga.

Avuga kuri iyi raporo, Umuyobozi wa WEF, Klaus Schwab yagize ati “Abagabo n’abagore bagomba kugira uruhare rungana mu gukemura imbogamizi Isi yacu ihura nazo.’’

Iterambere mu bijyanye n’amahirwe mu bijyanye n’ubukungu riragenda gahoro cyane ku Isi, aho ikinyuranyo hagati y’abagabo n’abagore kingana na 59% ahanini hashingiwe ku mafaranga yinjizwa hagati y’abagabo n’abagore, aho abagore bahembwa kimwe cya kabiri cy’ay’abagabo muri rusange.

Umubare w’abagore bari mu myanya yo hejuru mu bigo bikomeye nawo ukomeza kuba muto, aho WEF ivuga ko ibihugu bine gusa aribyo bifite umubare w’abadepite ungana hagati y’abagabo n’abagore, mu butegetsi bwo hejuru no mu bigo bikomeye.

Ibihugu 10 byateye intambwe ikomeye

Mu bijyanye na politiki niho hari imibare itanga icyizere ko icyuho kigeze kuri 23%, ariko WEF igaragaza ko ibihugu bibiri byonyine aribyo byakemuye ikibazo mu Nteko Ishinga Amategeko, naho bine bikirangiza muri za minisiteri.

Inzego zateye imbere cyane ni uburezi, ubuzima n’imibereho, aho icyuho mu burezi kimaze kuzibwa kuri 95%, naho mu buzima ni 96%.

U Rwanda ruza ku mwanya wa gatanu muri rusange, ariko mu bijyanye no gutanga amahirwe mu bukungu ruri kuwa munani, urwa 11o mu burezi, urwa 89 mu buzima n’urwa munani muri Politiki.

Iyi raporo ikomeza igira iti ‘‘Ibi byose bishingiye ku ntambwe yatewe mu gutanga amahirwe mu bukungu, aho igihugu cyazamutse imyanya itandatu ugereranyije n’umwaka ushize, n’izamuka mu mafaranga yinjizwa. Rukomeza kuba igihugu gifite umubare munini w’abadepite ku Isi, 64%, kandi rugira amanota meza mu gutanga amahirwe muri politiki nubwo rwigiye inyuma ku mwanya wa munani.’’

Mu bihugu 144 byarebweho muri iyi raporo yatangajwe kuri uyu wa Kabiri, ibihugu 64 byagabanyije icyuho hagati ya 70% na 80%, ibindi 65 bikigabanya hagati ya 60% na 70%, mu gihe ibindi 10 byo byakigabanyije hagati ya 50% na 60%.

Icyuho gisigaye cyane mu Burasirazuba bwo hagati na Afurika y’Amajyaruguru kuri 40%, Aziya y’Amajyepfo (33%), Afurika yo munsi y’ubutayu bwa Sahara (32.1), mu gihe ibihugu byakoze akazi gakomeye ari ibyo mu Burayi bw’u Burengerazuba (25%) na Amerika ya Ruguru (28 %.)

Ibihugu byo munsi y’Ubutayu bwa Sahara biza hafi y’u Rwanda (5) ni u Burundi (12), Namibia (14) Afurika y’Epfo (15), byose biza mu bihugu 20 bya mbere ku Isi.

Ibihugu bya mbere 10 ku Isi
Abadepite barahira mu Ukuboza kwa 2013. Icyo gihe u Rwanda rwabaye igihugu cya mbere ku Isi kigize abagore barenga 50% mu Nteko Ishinga Amategeko

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved