U Rwanda rwagaragaje ko rudakora raporo ngo rushimishe amahanga

Yanditswe na HABIMANA James
Kuya 11 Kamena 2019 saa 06:48
Yasuwe :
0 0

Minisiteri y’Ubutabera yagaragaje ko idakora raporo ku burenganzira bwa muntu mu Rwanda igamije gushimisha abanyamahanga, ko ahubwo ibikora kuko bifite icyo bimariye abanyarwanda.

Guhera kuri uyu wa Kabiri i Kigali hari kubera inama yahuje ibihugu byo mu karere bigamije gusuzumira hamwe uburyo bw’ishyirwa mu bikorwa ry’imyanzuro y’Akanama ka Loni gashinzwe uburenganzira bwa muntu.

Ni inama yahuje ibihugu birimo u Rwanda, Sudan, Kenya, Uganda, Somalia, u Burundi na Repubulika Iharanira Demokarasi ya Congo.

Akanama ka Loni gashinzwe uburenganzira bwa muntu ku Isi gaha ibihugu bitandukanye ibyo bigomba kubahiriza bigendanye n’uburenganzura bwa muntu, kandi ibyo bihugu bikajya gutanga raporo bigaragaza uko byubahirije ibyo byasabwe.

Kimwe mu bibazo byakunze kugaruka ni aho usanga imiryango itegamiye kuri leta itanga raporo zitavuga neza ibihugu iba ikoreramo bigatuma igirana nabyo ibibazo.

Umuyobozi w’Ishami rishinzwe ubutabera mpuzamahanga muri Minisiteri y’Ubutabera, Umurungi Providence yavuze ko ari uruhare rwa buri wese mu kurengera uburenganzira bwa muntu ariko ko bidakwiye ko iyi miryango na leta baba ibice bibiri bihanganye.

Yagize ati “Kugira ngo tujye duhura duhanganye ntibikwiye. Ubundi wasangaga iyo mugiye gutanga raporo bimera nko guhangana ukagira ngo murakorera abantu babiri batandukanye. Hari imiryango itegamiye kuri leta igenda igiye gushinja za leta, twe ntabwo aribyo tugenderaho niyo mpamvu twafashe icyemezo cyo gukorana n’iyo miryango.”

Yakomeje agira ati“Kuva tuvuye gutanga raporo y’uburyo twubahiriza uburenganzura bwa muntu mu Busuwisi mu 2015, twavuze ko tutabikora kugira ngo dushimishe abo bantu ahubwo tubikora kubera ko bifite icyo bimariye abanyarwanda. Umunyarwanda niyumva atekanye ndetse uburenganzira bwe bwubahirijwe kandi afite amategeko amurengera, ibyo bizaba bihagije.”

Yavuze ko imiryango itegamiye kuri Leta nayo idakwiye gutanga raporo kugira ngo zigire abo zishimisha ahubwo ko bajya babikora babanje kureba uruhare rwabo.

Umuyobozi n’ihuriro ry’abatanga ubufasha mu by’amategeko (Legal Aid Forum), Me Andrews Kananga, yavuze ko ibyo bagomba kurebera muri iyi nama harimo uburyo imyanzuro ibihugu bihabwa ishyirwa mu bikorwa.

Yavuze ko nk’u Rwanda rufite byinshi rurasangiza ibihugu byitabiriye kuko mu myanzuro rwahawe hari byinshi rwashyize mu bikorwa.

Yagize ati “Umwaka ushize twarebye ibisabwa u Rwanda kandi twasanze hari ibimaze gushyirwa mu bikorwa, ariko hari andi mategeko agomba kuvugururwa. Mu mezi ane tuzasohora indi raporo turebe aho indi myanzuro igeze ishyira mu bikorwa.”

Kananga yavuze ko kuba hari raporo zikorwa n’imiryango mpuzamahanga zinenga uburenganzira bwa muntu mu Rwanda bitajya bibaca intege.

Yagize ati “Nta gihugu ku Isi mutazumva ko kibangamira uburenganzira bwa muntu yewe na bya bindi byitwa ko bikomeye, ziriya raporo ntabwo zigomba kuduca intege gusa icyo dusabwa ni uko ahagaragaye ko uburenganzira bwa muntu butubahirijwe ntitugomba guceceka.”

Muri rusange u Rwanda rwahawe imyanzuro irenga 200 y’ibyo rugomba kubahiriza ariko rwemeyemo 50, kuko indi ngo rwasanze rwarayubahirije. Mu 2020 nibwo ibihugu bizongera kwerekeza i Genève mu Busuwisi kugaragaza ko ibyo byasabwe kubahiriza byabikoze.

Inama yahuje ibihugu byo mu karere bigamije gusuzumira hamwe uburyo bw’ishyirwa mu bikorwa ry’imyanzuro y’Akanama ka Loni gashinzwe uburenganzira bwa muntu
Umuyobozi w’Ishami ry’Umuryango w’Abibumbye mu Rwanda, Fode Ndiaye ni umwe mu bitabiriye inama
Umuyobozi n’ihuriro ry’abatanga ubufasha mu by’amategeko (Legal Aid Forum), Me Andrews Kananga, yavuze ko ibyo bagomba kurebera muri iyi nama harimo uburyo imyanzuro ibihugu bihabwa ishyirwa mu bikorwa.
Abayobozi baturutse mu bihugu umunani bararebera hamwe uko ibihugu byubahiriza amahame y'uburenganzira bwa muntu

Kayiranga Victor


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza