U Rwanda rwahawe igihembo rukesha guteza imbere uruhare rw’urubyiruko mu buhinzi

Yanditswe na Evariste Nsengimana
Kuya 28 Gicurasi 2019 saa 09:18
Yasuwe :
0 0

Minisiteri y’Ubuhinzi n’Ubworozi mu Rwanda (Minagri) yagenewe igihembo cyitiriwe Édouard Saouma gitangwa n’Ishami ry’Umuryango w’Abibumbye ryita ku biribwa n’ubuhinzi (FAO), kubera ibikorwa by’indashyikirwa yagaragaje mu gutuma urubyiruko rugira uruhare mu iterambere ry’ubuhinzi n’ubworozi mu Rwanda.

Édouard Saouma witiriwe iki gihembo yavukiye muri Liban mu 1926, aba Umuyobozi Mukuru wa FAO kuva mu 1976 kugeza mu 1993.

Minagri isangiye iki gihembo na Minisiteri ishinzwe kwihaza mu biribwa n’ubushakashatsi muri Pakistan, kubera uruhare yagize mu kuzamura uruhare rw’urubyiruko mu buhinzi.

Iki gihembo u Rwanda rwahawe kigizwe n’umudari n’ibihumbi 25 by’amadolari ya Amerika, ruzashyikirizwa mu nama ya 41 ya FAO izabera i Roma ku wa 26 Kamena uyu mwaka.

Minagri yahembwe kubera gushyiraho ihuriro ry’urubyiruko rukora ubuhinzi n’imirimo ibushamikiyeho (RYAF), rihuriza hamwe imiryango itandukanye y’urubyiruko, urubyiruko rukora ubuhinzi ku giti cyarwo na barwiyemezamirimo mu bijyanye n’ubuhinzi.

Uyu munsi urubyiruko rukora ubuhinzi mu Rwanda rwanditse muri RYAF rusaga ibihumbi 12 rufite ibigo by’ubucuruzi birenga 1300. Rwibumbiye mu nzego zirimo gutunganya ibikomoka ku buhinzi, ubworozi, gutunganya umusaruro, serivisi zifasha abahinzi n’ikoranabuhanga mu rwego rw’ubuhinzi.

Ikigo cy’Igihugu cy’Ibarurishamibare (NISR) kigaragaza ko abanyarwanda basaga 70% batunzwe n’ubuhinzi, bubumbatiye nibura 3o% by’ubukungu bw’igihugu, bukurikira urwego rwa serivisi rwihariye 46%.

U Rwanda rwagenewe igihembo kubera gushyigikira urubyiruko rukora ubuhinzi n’ubworozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza