Kwamamaza

U Rwanda rwahawe ikaze mu ihuriro rigamije kugabanya imyuka yangiza ikirere

Yanditswe kuya 16-11-2016 saa 10:58' na Deus Ntakirutimana


U Rwanda rwinjiye mu ihuriro rigamije kugabanya imyuka yangiza ikirere, The Climate and Clean Air Coalition, rihuriza hamwe za guverinoma, imiryango itari iya leta n’abikorera, mu kubungabunga ikirere no gukumira ihindagurika ry’ibihe binyuze mu kugabanya imyuka yangiza ikirere .

Kwinjira muri uwo muryango byatangarijwe mu nama y’Umuryango w’Abibumbye yiga ku ihindagurika ry’ibihe, COP 22 iteraniye i Marrakech muri Maroc, yanitabiriwe na Perezida w’u Rwanda Paul Kagame, Minisitiri w’Umutungo Kamere Dr Vincent Biruta, n’Umuyobozi Mukuru w’Ikigo gishinzwe kurengera ibidukikije, REMAd, Collette Ruhamya.

Minisitiri Dr Biruta yavuze ko u Rwanda rwifuza gutanga umusanzu mu guca carbon y’umukara yangiza ikirere, nubwo rutaragira inganda zikomeye, imodoka zishaje cyane cyangwa imashini yohereza imyuka myinshi mu kirere.

Ati “Mu gufasha kugabanya izo ngorane, duheruka kuzamura imisoro ku modoka zishaje ndetse tugira itegeko gusuzumisha uburyo imodoka zose zipimwa uko zisohora imyotsi. Indi mbogamizi dufite ni imyotsi ituruka ku bicanwa birimo inkwi n’amakara, aribyo soko nini y’ingufu zikoreshwa mu guteka.’’

Minisitiri Biruta yanavuze ko u Rwanda ruri gushyiraho ikigo kizajya gitanga amakuru yose akenewe ngo hagire igikorwa mu kugabanya carbon, Rwanda Climate Observatory, byose bikajyana n’itorwa ry’itegeko rirebana n’ukwangiza ikirere.

Ati “Turifuza gukorana n’abagize iri huriro bose mu kwigiranaho ibyo bamwe bagezeho no gusangira ubunararibonye hagamijwe kongera imbaraga dushyize hamwe,’’

Umuyobozi Mukuru wa REMA, Collette Ruhamya, yavuze ko u Rwanda rwahawe ikaze muri iryo huriro rigamije kugabanya imyuka yangiza ikirere, ariko hari n’izindi nama ruteganya kugirana n’inzego zitandukanye, muri COP 22.

“Hari ibigo bitera inkunga duteganya guhurana nabyo, kandi hano twatumiyemo n’abikorera bacu n’abandi ngo baze bumve ayo mahirwe ahari bashobore kuyashyikira kuko aribo cyane cyane dutezeho iterambere ryacu rizaguma ritera imnbere ariko rinahangana n’imihindagurikire y’ibihe.”

Patricia Espinosa, Umunyamabanga Nshingwabikorwa wa gahunda y’Umuryango w’Abibumbye irebana n’imihindagurukire y’ibihe, yashimiye u Rwanda kubera akazi katoroshye rwakoze ko gutegura inama iherutse kuhabera mu kwezi gushize.

Ni inama yabaye mu Ukwakira i Kigali, isozwa kuwa 15 hemejwe ivugururwa ry’amasezerano ya Montreal agenga ikoreshwa ry’ibinyabutabire bitandukanye byangiza ikirere, iryo vugurura rijyana n’ikumirwa ry’imyuka ihumanya ikirere yoherezwa mu kirere n’ibyuma bikonjesha yitwa Hydrofluorocarbons (HFCs), bitarenze 2029.

COP 21 yabereye i Paris mu Ukuboza 2015, hasinyirwamo amasezerano mpuzamahanga agena uburyo bwo gushyira mu bikorwa ingamba zo gukumira izamuka ry’igipimo mpuzandengo cy’ubushyuhe bw’Isi muri iki kinyejana, kikaguma hasi ya dogere 2°C ariko intego ikaba ko kigera hasi ya dogere 1.5°C.

Icyo gihe ibihugu byiyemeje kuzajya bisuzuma intambwe imaze guterwa buri myaka itanu, ndetse hagakusanywa miliyari $100 buri mwaka yo gutera inkunga imishinga igamije kurengera ibidukikije mu bihugu bikennye, ashobora no kwiyongera mu myaka iri imbere.

U Rwanda ruri mu bihugu byamaze kwemeza burundu amasezerano y’i Paris yerekeye imihindagurikire y’ibihe, narwo rukaba rugerwaho n’icyo kibazo nubwo hari ingamba rwagiye rushyiraho.

Ubushyuhe mu Rwanda bwazamutse ku gipimo mpuzandengo cya 1.4°C kuva mu 1970, ndetse nta gikozwe, iki gipimo cyazamuka kugera kuri 2.5°C bitarenze 2050, ndetse izindi ngaruka zigaragaza zikaba zirimo amapfa ndetse n’imyuzure ikunze gutera inkangu mu bice bitandukanye by’igihugu.

Minisitiri Vincent Biruta na Collette Ruhamya

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved