U Rwanda rwakiriye inkura eshanu zaturutse muri Tchèque (Amafoto)

Yanditswe na Philbert Girinema
Kuya 24 Kamena 2019 saa 09:04
Yasuwe :
0 0

U Rwanda rwakiriye inkura eshanu z’umukara zaturutse muri Safari Park Dvůr Králové muri Repubulika ya Tchèque aho izi nyamaswa zabaga kuva mu Ukuboza 2018.

Izi nkura zagejejwe mu Rwanda ahagana saa cyenda z’igitondo kuri uyu wa Mbere nyuma yo gukora urugendo rw’ibilometero 6000 rwatangiye ku wa Gatandatu.

Zoherejwe mu Rwanda biturutse ku bufatanye bw’Ishyirahamwe ry’u Burayi rishinzwe ibijyanye n’ahororerwa inyamaswa, EAZA; Guverinoma y’u Rwanda n’Umuryango Nyafurika urengera urusobe rw’Ibinyabuzima, African Parks.

Izi nkura zakuriye muri Dvůr Králové zahise zerekezwa muri Pariki y’Akagera ahagiye kuba ubuturo bwazo bushya.

Ubwoko nk’ubu bw’inkura zazanywe mu Rwanda, ku Isi umubare munini wazo uboneka muri Afurika.

Izi nkura zazanywe mu Rwanda, eshatu ni ingore mu gihe ebyiri ari ingabo. Ziri hagati y’imyaka ibiri n’icyenda. Harimo izavukiye muri Safari Park Dvůr Králové muri Tchèque zitwa Jasiri, Jasmina na Manny.

Iyitwa Olmoti yaturutse muri Flamingo Land mu Bwongereza naho iyitwa Mandela ituruka muri Ree Park Safari muri Denmark. Izi nkura zoherejwe mu Rwanda nk’impano yahawe Ikigo cy’Igihugu cy’Iterambere (RDB).

Zamaze amezi zitegurwa ku buryo zitazagira ibibazo muri uru rugendo rwamaze amasaha 30. Zazanywe mu buryo bugezweho ziri mu cyo umuntu yakwita nk’igisanduku aho zahererwaga amazi n’ibyo kurya.

Izi nkura zamaze kugezwa mu Akagera aho zashyizwe mu biraro ngo zibanze kumenyerezwa pariki.

Umuyobozi w’Ikigo cy’Igihugu cy’Iterambere (RDB), Clare Akamanzi, yavuze ko biteze kubona inyungu iturutse ku nkura zazanwe mu Rwanda.

Yagize ati “Ubuzima n’imibereho myiza y’inkura ni ingenzi mu kubungabunga urusobe rw’ibinyabuzima, haba mu Rwanda no muri Afurika.’’

Yongeyeho ko bituma Pariki y’Akagera iba imwe mu zikomeye mu Karere zifite inyamaswa eshanu nini zikunze gukurura ba mukerarugendo, yizeza ko izi nkura zizamera neza muri iyo pariki.

Ati “Ba mukerarugendo basura Pariki y’Igihugu y’Akagera bazanogerwa no kwihera ijisho inkura zizaba ziri mu kiraro cyazo.’’

Umuyobozi w’Ishyirahamwe ry’u Burayi rishinzwe ibijyanye n’ahororerwa Inyamaswa, EAZA, Dr. Thomas Kauffels, na we yashimangiye ko “Ibiraro bigezweho ni ingenzi mu kubungabunga ubutaka ndetse imikoranire yacu na Pariki y’Igihugu y’Akagera igaragaza uko byagira uruhare mu kubungabunga no kugarura inyamaswa zakendereye mu byanya birinzwe.’’

Umuhanga mu bijyanye no kwita ku mibereho y’inyamaswa mu mirire yazo, Dr. Pete Morkel ni umwe mu baziherekeje mu Rwanda kugira ngo agenzure neza ko zigezwa muri Pariki y’Akagera nta kibazo na kimwe zihuye nacyo.

Kuri ubu Pariki y’Igihugu y’Akagera ifite inyamaswa nini eshanu zikunze gukurura ba mukerarugendo ari zo; Intare, Inzovu, Ingwe, Inkura n’Imbogo.

Inkura eshanu zazanywe mu ndege itwara imizigo
U Rwanda rwakiriye inkura eshanu zaturutse muri Tchèque
Inkura zazanywe mu Rwanda zabaga muri Safari Park Dvůr Králové muri Repubulika ya Tchèque kuva mu Ukuboza 2018
Zahise zijyanwa muri Pariki y'Igihugu y'Akagera
Zazanwe mu buryo bwihariye ku buryo ubuzima bwazo nta kibazo bwagize
Inkura eshanu zavanywe i Burayi ubwo zagezwaga ku Kibuga Mpuzamahanga cy'Indege cya Kigali
Itsinda ry'abantu benshi bari bakereye kwakira inkura eshanu zavanwe muri Tchèque
Inkura zagejejwe i Kigali zitwawe mu ndege ya Boeing 747-400F
Ubwoko bw’inkura zazanywe mu Rwanda, ku Isi umubare munini wazo uboneka muri Afurika

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza