Kwamamaza

U Rwanda rwamaganye ibyatangajwe n’Abadepite ba EU baherutse kurusura

Yanditswe kuya 8-10-2016 saa 13:36' na IGIHE


Inteko Ishinga Amategeko y’u Rwanda yamaganye ibikubiye mu nyandiko y’ibanze y’imyanzuro y’Itsinda ry’abagize Inteko Ishinga Amategeko y’Umuryango w’Ubumwe bw’Uburayi, EU, ivuga ko birengagije nkana ibyo babonye mu ruzinduko rw’iminsi ine baherutse kugirira mu Rwanda mu kwezi gushize.

Itsinda ry’abagize Komisiyo y’Uburenganzira bw’abagore n’uburinganire mu Nteko Ishinga Amategeko y’u Burayi ryari riyobowe na Iratxe Garcia-Perez, ryageze iwabo ryandika muri raporo yabo banenga ibyo kuvugurura Itegeko Nshinga, ubwisanzure bwa politiki, ubw’itangazamakuru no kuba barabujijwe gusura Ingabire Victoire.

Nk’uko The New Times yabyanditse, mu ibaruwa yashyizweho umukono na Depite Adolphe Bazatoha, Evariste Kalisa na Juliana Kantengwa bakiriye iryo tsinda, abadepite banenze uko bagenzi babo bitwaje kuba barabujijwe gusura Ingabire, bakirengagiza ibyagezweho mu burenganzira bw’umugore n’uburinganire.

Igira iti “Turashaka kumenyesha ko tutemera kandi twatunguwe n’ibiri muri raporo y’imyanzuro y’ibanze mwatanze ku Rwanda, kuko isobanura nabi kandi ikanahindura ibyagezweho n’u Rwanda mu bijyanye n’uburenganzira bw’abagore no guteza imbere uburinganire, mukabikora mugendeye ku Munyarwanda umwe wahamijwe icyaha cyo gupfobya Jenoside, ngo kuko ari umugore.”

Abadepite banenze bagenzi babo b’i Burayi kwibanda gusa ku gushaka gushyigikira abatabwa muri yombi, abazanwa mu Rwanda kuburanishwa ku byaha bakekwaho biganjemo abacurabwenge ba Jenoside yakorewe Abatutsi mu 1994, bakomeje kwidegembya mu bihugu byo ku mugabane w’Uburayi mu myaka 22 ishize.

Muri iyi baruwa banenga bagenzi babo b’i Burayi kudashyiraho amategeko mu bihugu byabo ahana abahakana bakanapfobya Jenoside yakorewe Abatutsi mu 1994.

Bati “Turashaka gufata uyu mwanya ngo tubibutse ibyo twabasabye ubwo mwari mu Rwanda. Turabasaba ko mu myumvire ya kimuntu dusangiye, mwakwifashisha ibikorwa by’Inteko Ishinga Amategeko yanyu mugakangurira ibihugu guta muri yombi abakekwaho ibyaha bya Jenoside, bakoherezwa mu Rwanda bagahabwa ubutabera cyangwa se bakabuhererwa muri kimwe mu bihugu bigize umuryango w’ubumwe bw’u Burayi.”

“Kwemerera abakekwaho Jenoside gukomeza kwidegembya i Burayi badahanwa, binyuranye n’indangagaciro twese dusangiye.”

Bongeraho ko gushyiraho amategeko ahana abahakana Jenoside yakorewe Abatutsi mu 1994, byaca intege abayipfobya kuko abakekwaho Jenoside bitwaza ko i Burayi nta mategeko ahari ahana abahakana n’abapfobya Jenoside bagakomeza kwidegembya ari na ko bakomeza kubiba ingengabitekerezo yayo babinyujije ku mbuga zitandukanye.

Bati “Kuri iyi ngingo, twongeye kubasaba ko mwashyigikira ubukangurambaga bwo kurwanya abahakana Jenoside mu bihugu bigize Umuryango w’Ubumwe bw’u Burayi, mushyiraho amategeko ahana abahakana Jenoside yakorewe Abatutsi mu Rwanda kuko kuyihakana ari ugukomeza kuyikora.”

Abagize Komisiyo y’Uburenganzira bw’Abagore n’Uburinganire mu Nteko Ishinga Amategeko y’u Burayi bamaze iminsi ine mu Rwanda mu kwezi gushize baganira na bagenzi babo ibyiza byakozwe mu guteza imbere uburenganzira bw’umugore n’uburinganire.

Yari igizwe n’abantu umunani barimo batanu bo muri Espagne, babiri bo mu Bwongereza n’Umubiligi umwe.

U Rwanda ni cyo gihugu cya mbere hanze y’Umuryango w’Ubumwe bw’u Burayi iyi komisiyo yasuye.

Garcia-Perez yasobanuye ko byatewe n’uko ari igihugu cy’intangarugero mu kubahiriza uburenganzira bw’umugore n’uburinganire.

Raporo yitwa The Global Gender Gap Index ikorwa n’Ihuriro mpuzamahanga ry’ubukungu, World Economic Forum, yashyize u Rwanda ku mwanya wa mbere muri Afurika nk’igihugu cyahize ibindi mu kwimakaza no guteza imbere uburinganire, rukaza ku mwanya wa Gatandatu ku Isi mu bihugu 145.

U Rwanda kandi rukomeje kuza ku isonga mu kugira umubare munini w’abagore mu Nteko bangana na 64% by’abayigize bose.

Abagize itsinda ryo mu Nteko Ishinga Amategeko ya EU, ubwo bari mu Rwanda
Garcia-Perez, wari uyoboye iri tsinda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved