U Rwanda rwasabye Malawi guta muri yombi Murekezi ukomeje gukingirwa ikibaba

Yanditswe na Kanamugire Emmanuel
Kuya 24 Ugushyingo 2016 saa 06:39
Yasuwe :
0 0

Nyuma y’isakara ry’amakuru y’umunyemari Vincent Murekezi wahungiye muri Malawi, guverinoma y’icyo gihugu yasabwe kumuta muri yombi ndetse akoherezwa mu Rwanda, akisobanura ku ruhare muri Jenoside akurikiranyweho.

Amakuru ye yavuzwe cyane mu cyumweru gishize, ubwo Polisi mu gace ka Mponela muri Malawi yashinjwaga kuba inyuma y’ifungurwa rye nyuma y’uko yari yatawe muri yombi, ndetse akaba yarahawe imbunda na pasiporo ya Malawi mu buriganya.

Icyo gihe itangazamakuru ryatahuye pasiporo ze ebyiri zihuje amafoto n’itariki y’amavuko, imwe yarahawe Vincent Murekezi itangirwa i Ngoma mu karere ka Huye, mu gihe indi yayihawe ku izina rya Vincent Banda ukomoka mu gace ka Mbeya muri Tanzania.

Umuvugizi w’Ubushinjacyaha bw’u Rwanda, Nkusi Faustin, yabwiye IGIHE ko Murekezi akekwaho ibyaha bya Jenoside ndetse yakatiwe gufungwa burundu, nubwo atari ahari ngo arangize igifungo cye.

Ati “Twakoze inyandiko zisaba ko afatwa mu 2009, tuzohereza muri Malawi, ndetse hari izo twohereje muri Zimbabwe mu 2011, naho twamenye ko ajya kuhakorera. Tumukurikiranyeho ibyaha bya Jenoside n’ibyaha byo kwica no kurimbura imbaga nk’ibyaha byibasiye inyokomuntu. Hari n’ubufatanyacyaha mu gukora Jenoside no gucura umugambi wa Jenoside.’’

Ubushinjacyaha buvuga ko ibyaha akekwaho yabikoreye i Ngoma mu yahoze ari Perefegitura ya Butare, cyane muri segiteri ya Tumba.

Nkusi yakomeje agira ati “Ari mu bayoboye ibitero, kugenzura za bariyeri, gukoresha inama n’ibindi bikorwa. Ikindi ni uko Urukiko Gacaca rwo mu Murenge wa Tumba rwamukatiye adahari gufungwa burundu.’’

Murekezi usanzwe ari umucuruzi ukomeye muri Malawi, yaherukaga gukurikiranwaho ibyaha bitandukanye, harimo n’ibibazo yari afitanye n’amabanki, atangira gushakishwa n’igipolisi ahita ahungira muri Afurika y’Epfo aho yamaze imyaka hagati y’ibiri n’itatu.

Umwe mu batanze amakuru yaherukaga kubwira itangazamakuru ko Murekezi yaherukaga kwaka uburenganzira bwo gutunga imbunda mu buryo bwemewe n’amategeko ariko ntiyabuhabwa, ariko ubu ngo atunze imbunda ndetse n’uburenganzira yarabubonye nubwo hatazwi inzira byanyuzemo.

Umuvugizi w’Ubushinjacyaha bw’u Rwanda, Nkusi Faustin

Minisitiri w’Umutekano muri Malawi, Grace Chiumia, yari yabwiye itangazamakuru ko we yari azi Murekezi nk’umucuruzi ukomeye w’umunyarwanda, ariko u Rwanda rwo rugashimangira ko ari umuntu ukekwaho Jenoside Malawi icumbikiye.

Murekezi we mu cyumweru gishize yutse inabi ikinyamakuru Zodiak cyo muri Malawi ko uvugwa atari we, nta n’ibyaha bya Jenoside akurikiranyweho.

Ati “Ntabwo ari njye, ntabwo ari njye, njye ndi uwo muri Malawi. Ni nde wababeshye? Ni nde wababwiye ko uwo muntu muzi? Ibyo ni umwanda.’’

Umuyobozi ushinzwe itumanaho mu Bushinjacyaha muri Malawi, Joseph Chauwa, yavuze ko icyo gihugu cyahaye Murekezi ubwenegihugu mu 2013, muri uyu mwaka wa 2016 aba ari bwo ahabwa pasiporo y’icyo gihugu, ndetse Inzego zishinzwe abinjira n’abasohoka zabikoze zibiherewe uburenganzira na Minisitieri y’Umutekano na Polisi, bamaze gushimangira ko nta byaha akurikiranyweho.

Ati “Yabanje kwaka uburenganzira bwo gutura bw’abagateganyo mu 2005, nyuma mu 2008 asaba uburenganzira bwo gukora ubucuruzi aza gusaba n’uburenganzira bwo gutura bwa burundu. Mu 2013 yasabye ubwenegihugu, aza no kubuhabwa muri uyu mwaka, aho yabonye pasiporo ya Malawi ku itariki 10 Werurwe.’’

Nyamara inzego z’abinjira n’abasohoka zihakanye pasiporo Murekezi agaragaza ko yahawe mu 2011, aho yayihawe ku mazina ya Vincent M. Banda.

Gusa kuri izo pasiporo uko ari eshatu, yaba inyarwanda n’izatangiwe muri Malawi, ifoto iriho ni imwe ariyo igaragaza Murekezi ubwe, ndetse n’itariki y’amavuko irahuye, ariyo ya 6 Mutarama 1962.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza