U Rwanda rwasabye Uganda ko basasa inzobe mu biganiro byatangiriye i Kigali

Yanditswe na Rabbi Malo Umucunguzi
Kuya 16 Nzeri 2019 saa 11:34
Yasuwe :
0 0

Umunyamabanga wa Leta muri Minisiteri y’Ububanyi n’Amahanga, Nduhungirehe Olivier, yavuze ko ibiganiro byatangiye hagati y’u Rwanda na Uganda, bikwiye kuba umwanya wo gusasa inzobe no kubwizanya ukuri, hagamijwe gushakira umuti ibibazo biri mu mubano w’ibihugu byombi.

Kuri uyu wa Mbere nibwo habaye inama ya mbere ya komisiyo ihuriweho y’u Rwanda na Uganda, iteganywa n’amasezerano ya Luanda yasinywe ku wa 21 Kanama, agamije gusana umubano wangiritse hagati y’u Rwanda.

Iyi nama yabereye muri Minisiteri y’Ububanyi n’Amahanga y’u Rwanda iribanda ku bibazo birimo ko Uganda icumbikira imitwe igamije kuruhungabanyiriza umutekano, gukorera iyicarubozo Abanyarwanda no kubangamira ubucuruzi bwarwo.

Itsinda ry’u Rwanda riyobowe na Nduhungirehe ririmo Ambasaderi w’u Rwanda muri Uganda Maj General Frank Mugambage; Minisitiri w’ubutabera akaba n’Intumwa nkuru ya Leta, Johnston Busingye, Minisitiri w’ubutegetsi bw’igihugu, Prof Shyaka Anastase, Umunyamabanga Mukuru w’Urwego rw’igihugu rushinzwe Iperereza n’Umutekano, NISS, Major General Joseph Nzabamwita n’Umuyobozi Mukuru Ushinzwe Iperereza ryo hanze y’igihugu n’umutekano, Col Anaclet Kalibata.

Mu bihugu by’abahuza hari Umujyanama muri ambasade ya Angola mu Rwanda, Horacio Uliengue, Minisitiri w’ububanyi n’amahanga wa Angola, Manuel Domingos Augusto, Minisitiri w’intebe wungirije wa RDC, Gilbert Kankonde Malamba n’Umuyobozi w’urwego rw’ubutasi rwa RDC, Inzun Justin Kakiak.

Itsinda rya Uganda riyobowe na Minisitiri w’Ububanyi n’amahanga, Sam Kutesa ririmo Minisitiri w’umutekano Gen. J.J Odongo Abu, Umuyobozi mu Biro bya Perezida Yoweri Museveni, Amb Joseph Ocwet, Intumwa nkuru ya Leta William Byaruhanga na Ambasaderi wa Uganda mu Rwanda Oliver Wonekha.

Ibi biganiro byagize ibice bibiri, icya mbere cyo gufungura inama cyari cyemerewe gukurikrwa n’itangazamakuru, n’icya kabiri cyabereye mu muhezo. Nduhungirehe yashimiye intumwa za RDC na Angola zitabiriye ibi biganiro, avuga ko ari ikimenyetso cy’ubushake bw’abayobozi b’ibyo bihugu mu mutekano w’akarere.

Yavuze ko u Rwanda na Uganda bisangiye amateka, kandi nk’ibihugu bihurira mu Muryango wa Afurika y’Iburasirazuba, EAC, bisangiye icyerekezo mu bijyanye n’umutekano, kandi bifite n’amasezerano abishimangira nk’ashyiraho isoko rusange n’urujya n’uruza rw’abantu, ibicuruzwa, serivisi, imari n’uburenganzira bwo gutura.

Yakomeje ati “Ariko hari ibintu bikomeje kubangamira umubano w’ibihugu byombi n’ubuvandimwe. Harimo gutera inkunga imitwe yitwaje intwaro ibangamiye umutekano w’u Rwanda, ifungwa ridakurikije amategeko n’iyicarubozo rikorerwa Abanyarwanda muri Uganda n’ibikorwa bibangamiye ubukungu.”

Yavuze ko amasezerano ya Luanda ateganya uburyo ibibazo byose byashakirwa umuti, akaba yarasinywe nyuma y’urugendo rwatangiriye i Kinshasa muri Gicurasi, rukomereza i Luanda mu Nyakanga ku bufatanye bw’abayobozi ba Angola na RDC.

Yavuze ko nyuma y’inama ya mbere y’i Luanda, akanama k’ibihugu bibiri by’abahuza kasuye u Rwanda na Uganda, hagamije gukusanya amakuru n’ibimenyetso ku mpungenge zagaragajwe, ari nabyo byashingiweho mu gukora amasezerano y’ubufatanye ibihugu byombi byasinye, ubu hakaba harimo kuganirwa ku ishyirwa mu bikorwa ryayo.

Yakomeje ati "Ndifuza guha ikaze mu Rwanda abavandimwe bacu bo muri Uganda, ndizera ko ibiganiro byacu mu muhezo biraba umwanya wo gusasa inzobe nk’uko tubivuga mu Kinyarwanda, umwanya wo kubwizanya ukuri no gushaka umuti. Ni cyo kintu cyonyine abaturage bacu bategereje kandi bakwiriye."

Minisitiri Sam Kutesa yashimiye u Rwanda rwabatumiye n’itsinda bari kumwe, mu nama ya mbere ya komisiyo ihuriweho ku ishyirwa mu bikorwa ry’amasezerano’i Luanda.

Yavuze ko u Rwanda na Uganda ni ibihugu bihana imbibe, kandi bifitanye amateka akomeye, kuko mbere ibice by’ibi bihugu byari bihuye, hajya gushyirwaho imipaka bimwe mu bice bya Uganda bikajya ku Rwanda, na bimwe by’u Rwanda bikajya muri Uganda, “ibyo bikatubwira ko abaturage bacu ari bamwe.”

Yakomeje ati “Ibiganiro by’uyu munsi bikwiye gufatwa nk’intambwe ikomeye, aho kuba igikorwa gisanzwe. Abaturage b’ibihugu byacu bibiri bakeneye kubona hagira intambwe iterwa kurusha undi muntu uwo ari wese. Bityo rero, dukwiye kureba intambwe zihuta ziganisha ku gusubiza umubano ku murongo.”

“Mu izina ry’itsinda turi kumwe, ndifuza gushimangira ko Uganda yifuza imibanire yo mu mahoro n’u Rwanda, ari na yo mpamvu twifuza ko iyi nama itangiza urugendo rwo kuzahura umubano mu buryo bwihutirwa. Ndizera ko tuza kwemeranya ku bintu binyuranye n’igihe bigomba kuba byashyizwe mu bikorwa, nk’uko bikubiye muri aya masezerano."

Ibyo ngo nibyo byatuma hahoshwa umwuka mubi wari umaze igihe ututumba hagati y’ibihugu byombi, kandi Uganda yiteguye gufatanya n’u Rwanda hamwe na RDC na Angola, mu ishyirwa mu bikorwa ry’aya masezerano.

Minisitiri w’Ububanyi n’Amahanga wa Angola, Manuel Domingos Augusto, yashimiye byimazeyo intambwe u Rwanda na Uganda biteye, avuga ko nyuma y’isinywa ry’amasezerano y’i Luanda, ibihugu byinshi byagiye biyatangaho urugero nk’amasezerano y’amateka.

Yakomeje ati “Ndashimira ibihugu byombi ku bushake byagaragaje, cyane cyane Perezida Kagame na Perezida Museveni, ku gushyira mu bikorwa ibyo bemeranyije i Luanda. Iki ni ikimenyetso ko dushobora gushyira hamwe mu gushakira umuti ibibazo bya Afurika.”

Minisitiri w’Intebe wungirije wa RDC akaba na Minisitiri w’Umutekano, Gilbert Kankonde Malamba, yavuze ko ari inshingano zabo kwitabira inama yo gukurikirana ishyirwa mu bikorwa ry’amasezerano agamije gushaka umuti ku bibazo biri hagati y’u Rwanda na Uganda.

Yavuze ko kuva Tshisekedi yatangira kuyobora RDC, yiyemeje guharanira amahoro mu karere, ari nayo mpamvu yibanze cyane ku migenderanire n’ibihugu by’abaturanyi, aho biri mu muco w’Abanyafurika ko “utabona inzu y’umuturanyi irimo gushya ngo ntujye kuzimya.”

Bimwe mu byitezwe muri ibi biganiro harimo kugaruka ku mubare munini w’Abanyarwanda bafungiwe muri Uganda, ibibazo by’imitwe ya RNC, FLN na FDLR ikorera muri Uganda n’isubukurwa ry’urujya n’uruza rw’abantu n’ibicuruzwa hagati y’u Rwanda na Uganda.

Ibiganiro bya mbere byahuje komisiyo ihuriweho y'u Rwanda na Uganda byabereye muri Minisiteri y'Ububanyi n'amahanga y'u Rwanda
Minisitiri Sam Kutesa aramutsa abahuza baturutse muri RDC
Ubwo intumwa za Uganda zinjiraga mu cyumba cy'inama muri Minisiteri y'Ububanyi n'amahanga y'u Rwanda
Minisitiri Kutesa hamwe n'intumwa zamuherekeje mu biganiro i Kigali
Ibihugu by'abahuza muri ibi biganiro byari bihagarariwe n'Umuyobozi w’urwego rw’ubutasi rwa RDC, Inzun Justin Kakiak, Minisitiri w’intebe wungirije wa RDC, Gilbert Kankonde Malamba, Minisitiri w’ububanyi n’amahanga wa Angola, Manuel Domingos Augusto n’Umujyanama muri ambasade ya Angola mu Rwanda, Horacio Uliengue
Intumwa za Uganda zitegereje iz'u Rwanda mu biganiro
Itsinda rya Uganda riyobowe na Minisitiri w’Ububanyi n’amahanga, Sam Kutesa ririmo Minisitiri w’umutekano Gen. J.J Odongo Abu, Umuyobozi mu Biro bya Perezida Yoweri Museveni, Amb Joseph Ocwet, Intumwa nkuru ya Leta William Byaruhanga na Ambasaderi wa Uganda mu Rwanda Oliver Wonekha
Minisitiri Kutesa ni we uyoboye itsinda rya Uganda
Umuyobozi w’urwego rw’ubutasi rwa RDC, Inzun Justin Kakiak aganira Minisitiri w’intebe wungirije wa RDC akaba na Minisitiri w’umutekano, Gilbert Kankonde Malamba
Minisitiri w'Ububanyi n'amahanga wa Angola, Manuel Domingos Augusto yitabiriye ibi biganiro
Ambasaderi w’u Rwanda muri Uganda Maj General Frank Mugambage n’Umuyobozi Mukuru Ushinzwe Iperereza ryo hanze y’igihugu n’umutekano, Col Anaclet Kalibata
Ambasaderi wa Uganda mu Rwanda, Oliver Wonekha
Minisitiri Sam Kutesa aramukanya na Minisitiri w'Ubutegetsi bw'Igihugu, Prof Shyaka Anastase
Minisitiri Nduhungirehe aramutsa umuyobozi w'urwego rw'iperereza rwa RDC
Minisitiri Kutesa aramutsa Nduhungirehe mbere y'ibiganiro
Umunyamabanga Mukuru muri Minaffet, Urujeni Bakuramutsa, ni we wari umuhuza w’amajambo mu gufungura ibiganiro
Intumwa z'u Rwanda na Uganda mu biganiro
Minisitiri w’ububanyi n’amahanga wa Angola, Manuel Domingos Augusto, yashimye ubushake bw'ibihugu byombi mu gushaka amahoro
Minisitiri w’intebe wungirije wa RDC akaba na Minisitiri w'Umutekano, Gilbert Kankonde Malamba, yavuze ko utabona inzu y'umuturanyi irimo gushya ngo ntujye kuzimya
Minisitiri Kutesa yahamije ko Uganda ifite ubushake bwo gushyira mu bikorwa amasezerano yemeranyijweho n'u Rwanda
Nduhungirehe yavuze ko Uganda yagaragaje ibikorwa byo kubangamira umubano, asaba ko habaho gusasa inzobe
Abayobozi baganira nyuma yo gufungura ibiganiro, bagiye gufata ifoto y'urwibutso
Minisitiri Shyaka aganira na Minisitiri w'ububanyi n'amahanga wa Angola, Manuel Domingos Augusto
Maj Gen Joseph Nzabamwita aganira n'umwe mu bitabiriye ibiganiro
Intumwa z'u Rwanda, Uganda n'abahagarariye RDC na Angola mu ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza