U Rwanda rwasabye Uganda kuruha n’abaturage bafungiweyo nyuma yo kurushyikiriza uwitabye Imana

Yanditswe na Habimana James
Kuya 28 Gicurasi 2019 saa 01:02
Yasuwe :
0 0

U Rwanda rwabwiye Uganda ko uko yazanye umunyarwanda witabye Imana arasiwe mu karere ka Nyagatare, ari nako ikwiye kuzana abandi banyarwanda bari muri gereza z’iki gihugu kandi nta byaha bifatika bakurikiranyweho.

Ku gicamunsi cyo kuri uyu wa Mbere nibwo Uganda yashyikirije u Rwanda umurambo w’umuturage warwo uherutse kurasirwa mu Murenge Tabagwe mu Karere ka Nyagatare witwa Kyerengye Jean Baptiste.

Yapfuye arashwe ubwo we na bagenzi be bo muri Uganda, bambukanaga magendu mu Rwanda, bagashaka kurwanya inzego z’umutekano zari zigerageje kubakumira.

Nyuma yo kuraswa, umunyarwanda yahise apfa, umuturage wa Uganda we aza gupfa nyuma; ariko abo bari kumwe bahise babakurura babajyana muri Uganda ariyo mpamvu habayeho kugarura uyu murambo.

Ubwo wagezwaga ku mupaka wa Gatuna, Uganda yari ihagarariwe n’abayobozi benshi uhereye mu nzego z’ibanze kugeza kuri Minisiteri y’Ububanyi n’Amahanga ndetse n’inzego z’umutekano, ku ruhande rw’u Rwanda, hari abayobozi bayobowe na Meya w’Akarere ka Nyagatare, Mushabe David Claudien, uyobora aho uwo muturage yarasiwe.

Mushabe yabwiye abayobozi bari bahagarariye Uganda bayobowe na Depite Kansiime Caroline uhagarariye akarere ka Rukiga, ko nubwo bazanye uyu munyarwanda wapfuye, hakwiye kugira n’igikorwa ngo abanyarwanda bari muri gereza za Uganda barekurwe.

Ku Cyumweru ahagana saa sita n’igice z’amanywa, abandi banyarwanda babiri bashimutiwe muri Uganda n’Urwego rw’Ubutasi rwa Gisirikare rw’icyo gihugu, CMI.

Abo bagabo ni Samvura Pierre w’imyaka 47 na Habiyaremye Eric w’imyaka 25, batuye mu Mudugudu wa Gahamba mu Kagali ka Tabagwe mu Murenge wa Tabagwe ho mu Karere ka Nyagatare.

Nk’uko Polisi y’u Rwanda yabitangaje, Samvura na Habiyambere bashimutiwe ahitwa Gasheke, mu kilometero 1.5 winjiye ku butaka bwa Uganda. Bari batashye ibirori bya batisimu y’umuhungu w’inshuti yabo witwa Muhwezi Silver.

Mushabe yakomeje agira ati “Ni byiza kuba mwazanye umunyarwanda wacu ariko nanone byaba byiza muzanye abandi benshi bari mu gihugu cyanyu ni benshi, n’ejobundi mwafashe abandi babiri bari muri Uganda, uburyo mutuzaniye uyu wapfuye ni byiza ko mwanatuzanira abo bakiriyo ndatekereza ko ibyo bikozwe byadushimisha cyane.”

Muri Werurwe uyu mwaka nibwo Guverinoma y’u Rwanda yasabye abaturage bayo guhagarika kujya muri Uganda kubera impungenge z’umutekano wabo, nyuma y’ubuhamya bw’abarengaga 800 bari bamaze iminsi birukanwa ku butaka bw’icyo gihugu bagaragaza ihohoterwa n’iyicarubozo bakorewe.

Depite Kansiime Caroline aganira na Meya Mushabe David Claudien (hagati) n'abandi bayobozi bari baturutse muri Uganda
Abayobozi b'u Rwanda ubwo begeraga bagenzi babo ba Uganda kugira ngo bashyikirizwe uyu murambo
Umurambo washyizwe mu modoka ujyanwa i Nyagatare aho uzashyingurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza