U Rwanda rwashyikirije RDC umuturage wayo watoterejwe muri Uganda yitiranywa n’umunyarwanda

Yanditswe na Mukwaya Olivier
Kuya 29 Gicurasi 2019 saa 07:43
Yasuwe :
0 0

Ubuyobozi bw’u Rwanda kuri uyu wa Gatatu bwashyikirije ubwa Repubulika Iharanira Demokarasi ya Congo (RDC), umuturage wayo witwa Bizimana Steven Moïse, w’imyaka 27 wari umaze igihe atotezwa n’inzego z’umutekano za Uganda zimwitiranya n’umunyarwanda.

U Rwanda rwari ruhagarariwe na Harerimana Gaspard, uhagarariye ibiro by’abinjira n’abasohoka ku mupaka munini uzwi nka Grande Barrière, na Murimbwa Dorisi ku ruhande rwa RDC.

Ku wa Mbere w’iki cyumweru Saa munani z’ijoro nibwo Bizimana n’abandi bakuwe muri gereza yari amazemo ukwezi, babajugunya ku mupaka w’u Rwanda.

Bizimana yabwiye itangazamakuru ko yagiye muri Uganda kuwa 3 Mata 2019, aciye ku mupaka wa Buramba, agiye gushakisha akazi. Nyuma y’iminsi yafatiwe n’abasirikare ahitwa Butogota bamwita umunyarwanda, baramutoteza baranamufunga.

Ati “Bamfatiye ahantu hitwa Butogota bavuga ngo ndi umunyarwanda ndabahakanira mbabwira ko ndi umukongomani baranga ahubwo batangira kunkubita inkoni nyinshi ndihangana, nuko nimugoroba badushyira mu modoka ndi kumwe n’abanyarwanda babiri batujyana kudufunga sinzi icyo twaziraga gusa bavugaga ko barimo guhiga abanyarwanda n’abavuga ikinyarwanda”.

Akomeza avuga ko atazi impamvu kuba umunyarwanda ari icyaha muri Uganda, kuko yafunganwe n’abandi banyarwanda ukwezi kose bapfutse mu maso.

Ati “Badufungiye ahantu hitwa Kireka, twari hamwe n’abanyarwanda ariko sinabashije kubamenya kuko twabaga dufunze ibitambaro mu maso tutareba, ku buryo ntabashije kubamenya ariko twari benshi. Badusohoraga batujyanye mu mazi”.

Bizimana akomeza avuga ati “Sinzi impamvu bahigaga abanyarwanda kuko njyewe kuvuga ko ndi umukongomani byatumye nkubitwa inkoni cyane kuko ntemeraga ko ndi umunyarwanda n’ibyangombwa byanjye barabijyanye”.

Barakubitwaga cyane bakanabamenaho amazi

Bizimana akomeza avuga ko inzego z’umutekano muri Uganda zitabakubitaga gusa ahubwo zabamenagaho amazi ku buryo yaje no kurwarira aho yari afungiwe.

Ati “Twaryaga rimwe ku munsi naje no kurwara malaria bitewe n’ubuzima bubi kuko batumenagaho amazi bakanadukubita cyane, n’ubu sindakira neza.”

Arahira ko atazasubira Uganda akagira inama abandi banye-Congo kwirinda kujyayo.

Ati “Sinzasubira muri Uganda kubera ibyambayeho. N’ubu umuryango wanjye uri hano mu rugo i Ndosho mu Mujyi wa Goma ntabwo bazi amakuru yanjye baheruka njya gushaka akazi muri Uganda. Ndagira inama urubyiruko rwa Congo kwirinda kujya muri Uganda kuko ni abantu babi”.

Birasa n’ibimaze kuba agatereranzamba kuba abanyarwanda muri Uganda bafatwa mu buryo butemewe n’amategeko, bagafungirwa ahantu hatazwi, bagatotezwa ndetse bagakorerwa iyicarubozo bashinjwa kuba ‘intasi’.

U Rwanda ntirwahwemye kwamagana ibi bikorwa byatangiye no gufata indi ntera bigakorerwa n’abakekwaho kuba abanyarwanda kandi atari bo. U Rwanda kandi rukaba rwongeye kwandikira Uganda ruyisaba ibisobanuro ku baturage barwo bafungiwe muri icyo gihugu cy’abaturanyi, ariko ntacyo irasubiza.

Bizimana Steven Moïse, w’imyaka 27 wari umaze igihe atotezwa n’inzego z’umutekano za Uganda zimwitiranya n’umunyarwanda
Ubwo yashyikirizwaga inzego za RDC
Ubwo abayobozi ku mpande zombi basinyaga amasezerano yo guhererekanya Bizimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza