Kwamamaza

U Rwanda rwasinye ku masezerano akomeye mu kurwanya ibyaha bikorerwa mu mazi

Yanditswe kuya 16-10-2016 saa 12:27' na Rabbi Malo Umucunguzi


Abakuru b’ibihugu bya Afurika bashyize umukono ku masezerano yo kurengera umutekano wo mu mazi, amasezerano yasinywe ku munsi wa nyuma w’Inama Idasanzwe y’Umuryngo wa Afurika Yunze Ubumwe (AU) yari imaze iminsi itandatu ibera i Lomé muri Togo.

Ku mugoroba wo kuri uyu wa Gatandatu tariki 15 Ukwakira, ibihugu byose bigize AU ntibyabashije gushyiraho umukono, ariko Minisitiri w’Ingabo w’u Rwanda igihugu kiri no mu bihugu 30 byasinye, Gen. James Kabarebe, yatangaje ko ‘‘ari ikimenyetso cy’uko umutekano wo mu mazi n’inkengero zayo ukenewe”.

Muri bimwe mu bigamijwe harimo kurwanya ibyaha byo mu bihugu n’ibyambukiranya imipaka birimo iterabwoba, gucuruza ibiyobyabwenge, uburobyi butemewe n’ibindi bishobora kwifashisha inzira z’amazi.

Ibihugu bigize AU byiyemeje guhererekanya amakuru n’ubumenyi mu gucunga uyu mutekano, ndetse bigafunguranira imipaka yo mu mazi, ibintu bitari bisanzwe nk’aho ibihugu byakunze kuyihanganiraho mu myaka ishize.

Perezida wa Tchad ari nawe uyoboye AU, Idriss Deby Itno, yavuze ko aya masezerano ajyanye n’ibyifuzo by’uyu mugabane mu guhuza ibikorwa, ku buryo nashyirwa mu bikorwa azahuza n’ibyo buri gihugu gikeneye.

Perezida wa Togo, Faure Gnassingbé, yashimangiye ko aya masezerano agaragaza ubushake bw’ibihugu mu kubungabunga umutekano wo mu mazi.

Ati “Ni umushinga w’ingenzi uzafasha mu guhuza imbaraga zigamije kurwanya ibishobora guhungabanya umutekano wo mu mazi, hagatezwa imbere ubucuruzi, kubyaza umusaruro imitungo dufite mu mazi no kongera amahirwe ajyanye n’ubukungu no guhanga imirimo.’’

Perezida wa Komisiyo y’Umuryango wa Afurika Yunze Ubumwe, Dr. Nkosazana Dlamini Zuma, yasabye ko ibihugu bikomeza gutanga ibitekerezo biherekeza aya masezerano, hari n’inzego zizabigiramo uruhare zirimo imiryango ikora ibijyanye no kwambutsa ibicuruzwa mu mazi, abagore bakora imirimo yo mu mazi n’abayobozi n’abakozi bo ku byambu.

Mu bihugu 54 bigize AU, 38 bikora ku mazi cyangwa se bikaba ari ibirwa, ndetse muri Afurika, hejuru ya 90% by’ibyoherezwa mu mahanga n’ibitumizwa yo binyuzwa mu nyanja, ibiyaga cyangwa imigezi.

AU yemeje ko hazashyirwaho ikigega gitera inkunga ibikorwa byo kubungabunga umutekano wo mu mazi nubwo hatatangajwe uburyo kizajyaho, hakazanashyirwaho akanama k’abaminisitiri 15 bazakurikirana uko ayo masezerano ashyirwa mu bikorwa, mu gihe cy’imyaka itatu.

Gen. Kabarebe asinya
Minisitiri Gen Kabarebe asinya ku masezerano, inyuma ye hari Hope Tumukunde (ibumoso) uhagarariye u Rwanda muri AU
Gen James Kabareme hamwe n'abakuru b'ibihugu i Lomé muri Togo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved