U Rwanda rwatangije umushinga uzerekana imiterere y’ubutaka, ifumbire n’ibihingwa biberanye

Yanditswe na Rabbi Malo Umucunguzi
Kuya 1 Gicurasi 2019 saa 02:05
Yasuwe :
0 0

Guverinoma y’u Rwanda n’ikigo OCP Group cy’Ubwami bwa Maroc, batangije umushinga uzazenguruka igihugu cyose upima ubutaka, hagamijwe kumenya ifumbire n’ibihingwa biberanye nabwo muri gahunda yo kongera umusaruro.

Uyu munshinga ubanjirije undi ufite agaciro ka miliyoni 38 z’amadolari wo gutangiza uruganda ruvanga ifumbire hashingiwe ku miterere y’ubutaka; uhuriweho na OCP Africa, Leta y’u Rwanda n’ikigo Agro Processing Trust Cooperation Ltd (APTC).

Uyu mushinga ugizwe n’ibikoresho by’ikoranabuhanga ripima ubutaka biri mu modoka no kuri moto, bishobora kwimukanwa mu mirima hirya no hino. Watangijwe kuri uyu wa Kabiri na Minisitiri w’ubuhinzi n’ubworozi, Dr Mukeshimana Gérardine na Ambasaderi wa Maroc mu Rwanda, Youssef Imani.

Mu cyiciro cya mbere hazapimwa hegitari 50,000 mu turere twa Burera, Musanze, Nyabihu na Rubavu. Abahinzi bazapimirwa ubutaka ku buntu banagirwe inama z’uburyo buboneye bwo kongera umusaruro w’ubuhinzi.

Minisitiri Mukeshimana yashimiye Ubwami bwa Maroc ku bw’ubufatanye bugamije iterambere ry’urwego rw’ubuhinzi mu Rwanda.

Ati “Uyu mushinga ni ikimenyetso cy’umubano mwiza wa kivandimwe uri hagati ya Leta y’u Rwanda n’Ubwami bwa Maroc, nk’uko byagaragajwe n’Abakuru b’ibihugu byombi, Perezida Paul Kagame n’Umwami Mohammed wa VI ubwo basuranaga ku mpande zombi.”

Amabasaderi Youssef Imani yashimiye abakozi b’Ikigo cy’Igihugu gishinzwe Iterambere ry’Ubuhinzi n’Ubworozi (RAB) na MINAGRI bakoranye ubwitange kugira ngo uyu mushinga wo gupima ubutaka hagamijwe kongera umusaruro w’ubuhinzi ugerweho.

Ati "Nishimiye cyane uyu mushinga w’ingenzi uzafasha mu gupima imiterere y’ubutaka hagamijwe kumenya imikoreshereze iboneye y’ifumbire n’ibihingwa biberanye n’ubwo butaka. Ndabizeza ko ibi bizatuma umusaruro w’ubuhinzi wiyongera cyane."

Uyu mushinga uzanafasha iterambere ry’ibikorwa byo kuvanga ifumbire hashingiwe ku miterere y’ubutaka ndetse no kongerera ingufu iyamamazabuhinzi. Binateganywa ko uzagira uruhare mu gufasha abahinzi baciriritse, gukora umurimo wabo no kwifashisha ifumbire runaka hashingiwe ku miterere y’ubutaka bafite.

Ubushakashatsi bwa gatanu ku mibereho y’ingo (EICV5) bukorwa n’Ikigo cy’Igihugu cy’Ibarurishamibare, buheruka kugaragaza ko ingo 75% zivana amaramuko mu buhinzi.

Iyi modoka irimo ibikoresho bizajya byifashishwa mu gupima ubutaka
Iyi modoka irimo ikoranabuhanga ripima ubutaka, izagenda izenguruka mu gihugu hose
Minisitiri Mukeshimana na Ambasaderi Imani binjira mu modoka izajya ipima ubutaka
Uyu mushinga uzakoreshwamo imodoka na moto
Uyu mushinga watangijwe na Minisitiri w’ubuhinzi n’ubworozi, Dr Mukeshimana Gérardine na Ambasaderi wa Maroc mu Rwanda, Youssef Imani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza