Kwamamaza

U Rwanda rwatangiye kwandikisha inzibutso za Jenoside ku rutonde rw’Umurage w’Isi

Yanditswe kuya 9-11-2016 saa 08:35' na Ntakirutimana Deus


Leta y’u Rwanda ibinyujije muri Komisiyo y’Igihugu yo kurwanya Jenoside yakorewe Abatutsi (CNLG) irateganya ko bitarenze muri 2018 izaba yujuje ibyangombwa byose biyemerera kwandikisha inzibutso enye za Jenoside yakorewe Abatutsi ku rutonde rw’Umurage w’Isi.

Kwandikisha izo nzibutso birimo gusuzumwa mu nama y’iminsi ibiri irimo kubera mu Rwanda, ihuje abafite aho bahuriye no kurwanya Jenoside, Ihuriro Mpuzamahanga ry’inzibutso, Ikigega cy’Umurage Nyafurika, abaturutse muri Mali, Sénégal, Afurika y’Epfo, inzobere n’abashakashatsi ba Loni n’abarimu bo muri Kaminuza zo mu Rwanda.

Izo nzibutso ni urwa Kigali ruri ku Gisozi mu Mujyi wa Kigali, urwa Nyamata mu Bugesera, Murambi muri Nyamagabe ndetse na Bisesero muri Karongi.

Umunyamabanga Nshingwabikorwa wa Komisiyo yo kurwanya Jenoside, Dr Jean Damascène Bizimana, avuga ko basabwa kugaragaza umwihariko watuma izo nzibutso zishyirwa muri uwo murage w’ ’Ishami rya Loni ryita ku Burezi, Ubumenyi n’Umuco (UNESCO).

Ati “Hari ibice byinshi bikurikizwa, icyo tunagezeho ari nacyo iyi nama igamije ni ukwiga ku gaciro buri rwibutso rufite ku rwego mpuzamahanga, agaciro mwihariko kadasanzwe, bivuze yuko ni ngombwa kugaragaza kuri buri rwibutso indangagaciro zarwo, ku bishobora kujya ku rwego rw’Isi bikaba byagira icyo byigisha amahanga.”

Yakomeje agira ati “Turasabwa gutanga ibisobanuro birambuye, bijyanye n’’umwihariko wa buri rwibutso. Hari ibisabwa kandi rimwe na rimwe bigoye mbere yo kwemererwa gushyirwa ku rutonde. Hari ibihugu byagiye bisaba ariko bikangirwa ariko twe dugfie icyizere ko bizagenda neza.”

Abagize iryo tsinda, kuwa Mbere w’iki cyumweru basuye urwibutso rwa Jenoside rwa Murambi, ku wa Kabiri basura urwa Nyamata bareba niba zujuje ibisabwa ngo zishyirwe ku rutonde.

Umuyobozi w’Ikigo gishinzwe kubungabunga Umuco n’Umurage w’Amateka muri Sénégal, Abdel Aziz Guise, avuga ko byabatwaye igihe kwandikisha amateka y’ubucakara bwakorerwaga abirabura.

Ati “Sénégal yari imaze imyaka ine ari umunyamuryango muri Komite y’Umutungo n’Umurage w’Isi, ariko ni ngombwa kubiharanira kugira ngo inyungu za Afurika zibashe kugerwaho mu mutungo w’Isi.”

UNESCO ivuga ko gushyira muri uwo murage bisaba inyandiko zicukumbuye kandi zifite umwihariko n’itandukaniro ku bisanzwe biriho ku rwego rw’Isi.

Minisitiri w’Umuco na Siporo, Uwacu Julienne, atangaza ko izo nzibutso ziramutse zishyizwe muri uyu murage bizafasha mu kumenyekanisha amateka ya Jenoside yakorewe Abatutsi.

Ati “Bisobanuye ko amateka y’u Rwanda ajyanye n’icyo gihe cya Jenoside by’umwihariko azigishwa cyangwa azamenyekana ku Isi hose, kandi tuzafatanya n’abatuye Isi kuyabungabunga no kuyarinda kugira ngo bitazibagirana. Ni no kugira ngo binafashe n’abandi kumenya neza ukuri no kwiga kugira ngo bibe intandaro yo gukumira kuko Jenoside yakorewe Abatutsi mu Rwanda yabaye, isi yari yaravuze ngo ntibizongera, ariko byarongeye.”

Minisitiri Uwacu Julienne (ibumoso), aganira n’Umujyanama wa CNLG mu by'amategeko, Dr Diogène Bideri n’Umuyobozi ushinzwe Umurage muri UNESCO, Mechtild Rossler
Umuyobozi ushinzwe ibijyanye n’Umurage muri UNESCO, Mechtild Rössler, aganira n’itangazamakuru

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved