U Rwanda rwateye utwatsi raporo irushinja iyicarubozo ku bakekwaho gukorana n’abanzi b’igihugu

Yanditswe na Rabbi Malo Umucunguzi
Kuya 11 Ukwakira 2017 saa 08:34
Yasuwe :
1 0

Minisitiri w’Ubutabera akaba n’Intumwa Nkuru ya Leta, Johnston Busingye, yamaganye raporo y’Umuryango Human Right Watch (HRW), ivuga ko hari abantu batandukanye bakorerwa iyicarubozo, cyane cyane abakekwaho gukorana n’imitwe ishinjwa gushaka guhungabanya umutekano w’u Rwanda .

Iyo raporo yasohotse kuri uyu wa Kabiri igizwe na paji 102, ivuga ko uwo muryango wabaruye ibibazo bigera ku 104 by’abantu bagiye batabwa muri yombi binyuranyije n’amategeko, hagati ya 2010 na 2016.

Abinyujije kuri Twitter, Minisitiri Busingye yavuze ko iyo raporo ya HRW nta kuri kuyirimo, cyane ko u Rwanda rwashyize umukono kandi rukurikiza amasezerano mpuzamahanga yo kurwanya iyicarubozo, kimwe n’amategeko igihugu cyishyiriyeho.

Yakomeje agira ati “HRW yagaruye ibintu bishaje, bitizewe kandi bidafite n’icyo bishingiyeho ndetse badafitiye ibimenyetso bifatika. Amaherezo ibyabo bizajya ahagaragara.”

Yakomeje avuga ko iyo raporo iri mu mugambi wa HRW udahinduka wo gukomeza kwibasira u Rwanda.

Muri iyo raporo, uwo muryango uvuga ko wabonye amakuru y’iryo yicarubozo mu kuvana amakuru mu bantu baba bafunzwe binyuranyije n’amategeko.

Umuyobozi wa HRW muri Afurika, HRW, Ida Sawyer, abihuza n’umwuka yita “uw’ubwoba uba mu Rwanda, ku buryo abantu basanzwe kimwe n’ababikorewe batinya kubishyira hanze banga ko byaba bibi kurushaho.

Uyu muyobozi akavuga ko hari abo babashije kubona bahohotewe muri ubwo buryo igihe kinini bari ahantu hafungirwa rwihishwa, nyuma baza koherezwa ahazwi ndetse ngo rimwe na rimwe bagashyikirizwa ubutabera.

Umwe mu bo iyi raporo ishingiraho, harimo umugabo utanga ubuhamya bw’uko ngo yakorewe iyicarubozo abazwaga niba atari umwe mu bigeze gutera gerenade mu Mujyi wa Kigali ariko we akabihakana.

Iyi raporo yatewe utwatsi ivuga ko abenshi mu bafashwe muri ubwo buryo babaga bakekwaho gukorana n’umutwe wa FDLR washinzwe n’abasize bagize uruhare muri Jenoside yakorewe Abatutsi, ukorera muri Repubulia Iharanira Demokarasio ya Congo. Abandi ngo ni abakekwaho kuba mu mitwe irwanya ubutegetsi nka RNC ikorera mu buhungiro cyangwa abakorana na Ingabire Victoire.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza