U Rwanda rwatwitse toni zirenga 50 z’amavuta arimo ibinyabutabire bitera kanseri

Yanditswe na Akimana Erneste
Kuya 18 Kanama 2018 saa 03:22
Yasuwe :
0 0

U Rwanda rwabaye igihugu cya kabiri muri Afurika gitwitse amavuta abamo ikinyabutabire cya ‘Polychlorinated Biphenyls (PCB) ashobora gutera kanseri.

Igikorwa cyo gutwika ibi binyabutabire cyabaye kuri uyu wa Gatanu tariki ya 17 Kamena 2018, ku cyicaro cy’uruganda rwa CIMERWA i Rusizi.

Ni rwo rufite ubushobozi bwo kubitwika kuko bisaba ubushyuhe bugera kuri 1400 °C.

PCB iba mu mavuta akoreshwa mu byuma biringaniza umuriro w’amashanyarazi mu muyoboro (transformateur), mu bikoresho by’ubwubatsi nka pulasitiki, amarangi no mu bikoresho bimwe by’ikoranabuhanga.

Ubushakashatsi bwerekanye ko iyo ibyo ibinyabutabire bihuye n’abantu bigira ingaruka ku buzima nko gutera uburwanyi bw’uruhu.

Bigira kandi ingaruka ku mikorere y’ubwonko no ku budahangarwa by’umubiri ku bana.

Ibyo binyabutabire bishobora gutera abantu kanseri. Abakozi n’abandi bahuye nabyo bishimagura ku ruhu no mu maso.

Igihe PCB zigiye mu butaka bitewe n’aho ibikoresho zirimo byashyizwe, zishobora kumaramo imyaka 30, bigatera ingaruka ku kurumbuka kwabwo cyangwa ku musaruro.

Umuyobozi Mukuru w’Ikigo gishinzwe kurengera ibidukikije, REMA, Eng Colette Ruhamya yatangaje ko kubera ingaruka zabyo,biyemeje kubitwika aho biri hose mu gihugu.

Yagize ati "Aya mavuta ava muri ‘transformateur’ z’amashanyarazi zaje kera. Ubu twafashe ingamba zo kuyatwika, ibi ni byiza kugira ngo dukumire ibyago hakiri kare bitazagira ingaruka mbi ku bana bacu natwe bikadutera indwara zirimo na kanseri."

Gutwika aya mavuta ni ukubahiriza amasezerano ya Stockholm yo ku wa 4 Kamena 2002.

Asaba ibihugu guhagarika ikorwa, ikoreshwa, icuruzwa n’ihunikwa ry’ibikoresho bifite PCB, yavuguruwe mu 2016.

Ibarura ryakozwe mu 2016 ryagaragaje ko mu Rwanda hari ‘transformateur’ zisaga 3000 ariko 196 arizo zasanzwemo PCB, ziganjemo izaguzwe mu myaka ya 1986.

Kuva ubwo PCB zatangiraga gukorwa mu 1929, imibare yerekana ko hakozwe toni miliyoni ebyiri, ubu izigera ku 10% zikaba ziri hirya no hino mu bidukikije.

Itanura ryatwikiweho PCB muri CIMERWA
Iki kigega nicyo cyari kibitsemo amavuta yatwitswe kuri uyu wa Gatanu
Izi ngunguru nazo zarimo amavuta yaciwe kubera ingaruka agira ku buzima bwa muntu
Abayobozi bakurikiranye itwikwa ry'aya mavuta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza