U Rwanda rwifatanyije n’u Buholandi mu kwizihiza isabukuru y’umwami Willem-Alexander

Yanditswe na Habimana James
Kuya 27 Mata 2019 saa 02:06
Yasuwe :
0 0

Kubera ubufatanye bwaranze kandi bukomeje kuranga u Rwanda n’u Buholandi kuva Jenoside yakorewe Abatutsi yahagarikwa mu 1994, u Rwanda rwifatanyije n’iki gihugu mu kwizihiza isabukuru y’umwami wacyo Willem-Alexander wujuje imyaka 52 avutse.

Tariki 27 Mata 1967 nibwo umwami Willem-Alexander w’u Buholandi yavutse, yima ingoma tariki 30 Mata 2013.

Umunyamabanga Uhoraho muri Minisiteri y’Ububanyi n’Amahanga, Urujeni Bakuramutsa, yavuze ko u Rwanda rwifurije isabukuru nziza umwami w’u Buholandi.

Yavuze ko ruha agaciro uruhare rw’iki gihugu mu bijyanye no gufasha mu butabera, uburezi n’ibindi nyuma ya Jenoside yakorewe Abatutsi.

Yashimye kandi uruhare rw’u Buholandi muri gahunda zirimo ibiribwa, imiyoborere myiza, abikorera no ku miryango itegamiye kuri leta ndetse n’uruhare iki gihugu gikomeje kugira mu gukomeza kwiyubaka ku Rwanda mu nzira y’iterambere no kwigira.

Yagize ati “Munyemerere nshimire ubufatanye buri hagati y’ibihugu byombi mu bijyanye n’ubutabera no kuburanisha abasize bakoze Jenoside yakorewe Abatutsi, yaba ababuranishirijwe mu nkiko muri iki gihugu cyangwa abagaruwe mu Rwanda.”

Mu minsi ishize Polisi y’iki gihugu kandi yataye muri yombi uwitwa Venant Rutunga ushakishwa kubera uruhare rwe muri Jenoside yakorewe Abatutsi.

Yavuze ko u Rwanda rwizeye ko n’abo bose bakirimo kwihisha mu bice bitandukanye by’Isi, bazagira umunsi bakagezwa imbere y’inkiko.

Ambasaderi w’u Buholandi mu Rwanda, Frédérique de Man yavuze ko uyu ari umwaka wa kane yizihiriza isabukuru y’uyu mwami mu Rwanda.

Yavuze ko nubwo barimo kwizihiza iyi sabukuru bagomba no kuzirikana ko barimo kwibuka ku nshuro ya 25 Jenoside yakorewe Abatutsi, abantu bakibuka biyubaka.

Yavuze ko ibyo u Buholandi buteramo inkunga u Rwanda birimo amazi, ibiribwa, ubuhinzi no mu butabera.

Yagize ati “Mu myaka 25 ishize ubufatanye bw’u Rwanda n’u Buholandi bwakomeje gutera imbere nko kurengera abasivili ahari intambara, ubufatanye hagati ya Polisi z’ibihugu byombi, mu butabera nko guta muri yombi no kuburanisha abasize bakoze Jenoside.”

Yashimiye kandi ibigo by’ubucuruzi by’iki gihugu biri mu Rwanda ku ruhare bikomeje kugira mu iterambere ryarwo.

Nyuma y’imyaka 25 ubu umubano hagati y’ibihugu byombi wagiye no mu buhahirane.

Kugeza ubu abikorera bo mu Rwanda babonye amasoko y’ibikorerwa mu Rwanda kujya muri iki gihugu, ibigo byo mu Buholandi nabyo birakorera mu Rwanda birimo Heineken, sosiyete itwara abagenzi mu kirere ya KLM, Africa Improved Foods Company, Unilever, Hollanda Fair Foods n’ibindi.

Kugeza ubu u Buholandi bumaze kohereza mu Rwanda Abanyarwanda babiri ngo baze kuburana ku byaha bya Jenoside yakorewe Abatutsi, abo ni Iyamuremye Jean Claude na Mugimba Jean Baptiste.

Ibyo wamenya ku mwami Willem-Alexander w’u Buholandi

Willem-Alexander yavutse tariki 27 Mata 1967 ku mwamikazi Beatrix na Claus Van Amsberg.

Willem-Alexander yize muri Kaminuza ya Leiden mu Buholandi no mu ishuri rya gisirikare rya Royal Netherlands Navy.

Mu 2002 nibwo yashakanye na Máxima Zorreguieta Cerruti ubu bafitanye abana batatu.

Mu 2013 Willem-Alexander yimye ingoma asimbuye nyina Beatrix wari umaze kwegura, nyuma kuba ku ngoma kuva mu 1980.

Nyuma yo guca mu mashuri atandukanye yigisha ibya gisirikare, umwami Willem yavuye mu ngabo afite ipeti rya Brigadier General.

Nubwo u Buholandi buyoborwa na Minisitiri w’Intebe, Umwami afite inshingano zikomeye kuko buri cyumweru agirana inama na Minisitiri w’intebe kandi buri gihe akavugana n’abaminisitiri bagize guverinoma.

Umwami kandi asinya ku mategeko yo mu Nteko Ishinga Amategeko ndetse n’Ibwami, agahagararira ubwami imbere mu gihugu no hanze yacyo.

Itegeko nshinga ry’u Buholandi rivuga ko mu gihe cyo gutangiza imirimo y’Inteko Ishinga Amategeko, umwami avuga ijambo ku mirimo y’Inteko y’uwo mwaka.

Umwami w’iki gihugu ahitamo, akirukana cyangwa akaba yanarahiza abaminisitiri bose bagize guverinoma n’abanyamabanga ba leta.

Abaholandi bari mu Rwanda bifatanyije n'Abanyarwanda kwizihiza isabukuru y'umwami Willem-Alexander
Bamwe mu bitabiriye ibi birori hagati y'ibihugu byombi
Ibihugu byombi byishimira umubano ukomeje kubiranga
Ibigo byo mu Buholandi birimo KLM bikorera mu Rwanda
Umunyamabanga Uhoraho muri Minisiteri y'Ububanyi n'Amahanga, Urujeni Bakuramutsa yavuze ko u Rwanda rwifurije isabukuru nziza umwami w’u Buholandi
Ambasaderi w’u Buholandi mu Rwanda, Frédérique de Man yashimye ubufatanye buri hagati y'ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza