Ubuhamya bw’Umupasiteri wa ADEPR wakubiswe hafi yo kwangirizwa imyanya y’ibanga muri Uganda (Video)

Yanditswe na Musangwa Arthur
Kuya 13 Kamena 2019 saa 08:00
Yasuwe :
0 0

Leta ya Uganda yohereje mu Rwanda abaturage barwo 20 barimo Rev Pasiteri Singirankabo Jean de Dieu, wabarizwaga muri ADEPR Pentecostal Church International Uganda (PCIU) wakorewe iyicarubozo rikaze kugeza n’aho akubiswe inkoni hejuru y’ubugabo.

Imyaka ibiri irihiritse inzego zishinzwe umutekano muri Uganda, zifata zikanakorera iyicarubozo Abanyarwanda bakorerayo ingendo, abahatuye n’abashakirayo ubuzima.

Nyuma yo kubona ko ikibazo kimaze gufata indi muri Werurwe 2019 u Rwanda rwasabye abaturage barwo kudakorerayo ingendo.

Kuva icyo gihe ariko ibikorwa byo gufata abahasanzwe byakajije umurego ndetse hari aboherejwe mu Rwanda nyuma yo gukubitwa bakagirwa ibisenzegeri no kwamburwa imitungo yabo.

Ku wa Gatatu, tariki ya 12 Kamena 2019, abandi 20 bagejejwe ku mupaka wa Kagitumba birukanwe ku butaka bwa Uganda nyuma y’igihe kirekire bakorerwa iyicarubozo muri za gereza Uganda.

Pasiteri Singirankabo ni umwe muri abo Banyarwanda birukanwe muri Uganda, igihugu yari amazemo imyaka 13.

Mu buhamya bwe yabwiye itangazamakuru ko “Natangiye kwinjira muri Uganda mu 2006, ngiye mu ishuri n’ivugabutumwa. ADEPR ryatangiye ururembo ridusangayo, twihuza naryo kugira ngo tubone aho gusengera.’’

Mu nkubiri y’inzego zirimo Urushinzwe Umutekano w’Imbere (ISO) n’urw’Ubutasi rwa Gisirikare (CMI) yo gufata Abanyarwanda, abayoboke ba ADEPR na bo batangiye kototerwa, bagafungwa.

Muri Werurwe 2019 nibwo abashumba benshi b’itorero batangiye kugaruka mu Rwanda, abandi barahunga, abafashwe bagafungwa.

Pasiteri Singirankabo yakomeje avuga ko nyuma y’ibyo bibazo “Twiyemeje gufata abenegihugu bari mu itorero bakoresha Icyongereza n’Ikigande mu materaniro ngo tuganire na Guverinoma kuko amajwi yavugaga ko inzego z’umutekano za CMI na ISO arizo zifata abantu zikabajyana. Twegeraga polisi ntigire icyo ivuga, ikakubwira ko ntacyo yabikoraho.’’

Inyuguti ya R iri muri ADEPR yuririweho mu gutoteza abanyetorero

Nyuma yo kwihuza, ubuyobozi bwa ADEPR muri Uganda bwegereye CMI bushaka kubaza impamvu ituma abayoboke b’itorero bafungwa kandi ntibahabwe ibisobanuro.

Pasiteri Singirankabo yavuze ko “Twahuye n’umusirikare ukomeye tumubaza impamvu abashumba bacu bafungwa buri munsi, abakirisitu bafite ubwoba ndetse abagiye gusenga ntibaba bazi ko bataha amahoro.’’

Yakomeje avuga ko “Baratubwiye bati iyo R iri mu izina ryanyu ADEPR Uganda ‘si Association des Eglises de Pentecôte au Rwanda?’ Nonese iyo Rwanda irakora iki muri Uganda? Batubwiye ko iri torero ryinjiye muri Uganda rije gutata, ko ariho intasi za Kagame zinyura ngo zibashe gutera u Rwanda.’’

Nyuma yo gutakamba no kubwirwa ko batigeze baba muri ibyo bintu, bagiriwe inama yo kuvanaho izina cyangwa ‘musandarire mu yandi matorero’.

ADEPR yaguriye amarembo muri Uganda ikahashinga ishami muri Mata 2015, ryari rimaze kugera mu turere 48 ndetse rifite imitungo myinshi irimo amasambu, imodoka n’ibindi.

Abagize itorero bigiriye inama yo guhindura izina rya ADEPR, itorero ryitwa Pentecostal Church International Uganda (PCIU) ngo bahoshe igitutu.

Ku wa 13 Gicurasi 2019 nibwo hashyizweho komite y’Abanyarwanda babiri bafite indangamuntu barimo na Pasiteri Singirankabo, inashyirwamo batatu bavukiye muri Uganda.

Ubwo bari mu nama ku wa 21 Gicurasi 2019, inzego z’umutekano zabaguyeyo zibakura mu nzu, zibajyana kubafunga.

Rev Pasiteri Singirankabo Jean de Dieu, wabarizwaga muri ADEPR Pentecostal Church International Uganda (PCIU) yavuze ku iyicarubozo yakorewe mu gihe yamaze afungiye muri gereza za Uganda

Hari Abanyarwanda bafungwa bambaye ubusa buri buri

Ikigo cya CMI kiri i Mbuya nicyo kijyanwamo Abanyarwanda benshi bafashwe, bakajyanwa gukorerwayo iyicarubozo.

Mu kubara inkuru ye, Pasiteri Singirankabo avuga ko bagifatwa bambitswe imipira y’umukara mu maso bajyanwa muri icyo kigo.

Yagize ati “Twahamaze igihe tuhakubitirwa, turara ku rubaraza, imvura irara itunyagira. Ugiye gutora agatotsi bakamumenaho amazi. Uwashakaga kwihagarika hepfo, wasangaga hapakiyemo Abanyarwanda bambaye ubusa, bafungiwemo no muri etaje hejuru harimo abandi benshi.’’

Yavuze ko we by’umwihariko yakorewe iyicarubozo, umubiri hafi ya wose kandi ntibanamuvuza. Iyi ngingo yayivuzeho, ikiniga kiramufata, amarira asa n’amuzenga mu maso.

Yagize ati “Njye bankubise inkoni z’uburyo bwose. Mfite inkoni zo mu mugongo, ku kibuno n’izindi bankubise hejuru y’ubugabo. Ubu nageze mu Rwanda ndi guhabwa imiti nta kibazo.’’

Gereza yabaye icyanzu cyo kureshya abashaka kujya mu mitwe y’iterabwoba

Singirankabo yamaze iminsi 11 i Mbuya ajyanwa gufungirwa Kireka, aho ko yasanze inzu za polisi zubakwa ariko inyuma yazo hari gereza za CMI.

Uyu mupasiteri yavuze ko “Ushobora kwemera gushakirwa ubuhunzi cyangwa kwinjira mu mitwe y’iterabwoba bakamugumisha muri gereza, abandi bakabohereza.’’

Yagize ati “Hari abo twasanze bavuga ko bavuye mu mashyamba ya Congo babuze ibiryo ariko bashaka kureba ibitekerezo dufite. Iyo bumvise utsimbaraye ku gihugu cyawe, baragufata bakagukubita.’’

Mu ijoro ryo ku wa Kabiri, tariki ya 11 Kamena 2019, nibwo we na bagenzi be babasohoye muri gereza.

Yagize ati “Icyo gihe buri wese bamubwiraga ko yabaye mu nzego z’umutekano ariko tukabihakana. Bambwiraga ko nabaye Captain ariko mbasobanurira ko ntanabaye Local Defence.’’

Saa Kumi nibwo babajyanye muri Minisiteri y’Ububanyi n’Amahanga ya Uganda, basinya inyandiko mbere yo kubajyana ku mupaka uhuza u Rwanda n’icyo gihugu wa Kagitumba.

Birukanwe shishi itabona ku buryo nta nuwemererwaga kugira icyo afata mu mitungo ye cyangwa kuvugana n’umuryango.

Yagize ati “Twababwiraga bati mureke dutware abana bacu, bakatubwira ko tuzarongora abandi mu Rwanda hari abagore, bati mutuvire mu gihugu.’’

ADEPR Uganda ubu nta muyobozi ifite ndetse bamwe mu bashumba bayo na bo batawe muri yombi barafungwa, abandi bari mu bwoba bukomeye.

Ati “Ababishoboye ni bo bagenda bakayobora ariko usanga na bo bari mu mitwe irwanya igihugu utayirimo bafite uburyo bakwirukaho, bakaguhiga, bakavuga bati abo muzabasubize iwabo ariko abemera kuyoboka mujye mubareka. Ubu itorero nta buyobozi rifite, rirajagaraye. Ahenshi hayobora n’abavugabutumwa n’abapasiteri bato.’’

Singirankabo yavuze ko ubuyobozi bwa Uganda bwamunzwe na ruswa kuko ufite amafaranga arekurwa, uyakurusha akakugurisha.

Uganda yiyemeje gukukumba Abanyarwanda badashaka gukorana n’imitwe y’iterabwoba

Hategekimana Silas w’imyaka 43 uvuka i Musanze na we yafashwe atwaye umuyobozi mu itorero rya PCIU muri Uganda, barafungwa.

Uyu mugabo wagiye muri Uganda mu 2009 atangira ubumotari i Kampala mu 2013.

Yagize ati “Twabonye abasivili batandatu bafite imbunda binjiye mu gipangu aho twari baje baradufata. Batubwiye ko bashaka Musinga Antoine uri mu bayobozi ba ADEPR Uganda wihishe kubera umutekano. Mu kanya gato haje abapolisi n’abasirikare barenga 20, batwambika amapingu, batujyana muri CMI.’’

Nyuma y’igihe ari CMI yajyanwe Kireka, aho yasanze abandi Banyarwanda benshi.

Yagize ati “Bamwe batubwiye ko bava muri RNC, FDLR n’Ishyaka rya Victoire Ingabire, FDU Inkingi. Hari abamotari bakorera Kampala bari mu mitwe ishaka guhungabanya u Rwanda kuko nanjye bangezeho, bashaka ko njyamo, mbereka ko nta murongo wo kurwanya igihugu mfite.’’

Hategekimana wari amaze iminsi 18 afungiye muri gereza, muri Uganda yasize umugore we n’abana babiri n’imitungo ye irimo moto. Yayoboraga umudugudu w’Umudugudu wa Kinawa mu Itorero rya PCIU ugizwe n’abakirisitu barenga 25.

Mu butumwa bwe yavuze ko Abanyarwanda bamenya ko bagenzi babo bari muri Uganda batorohewe.

Yavuze ko “Ubu hari gahunda yo kujya mu byaro byose bashaka Abanyarwanda ku buryo abadashaka gukorana n’imitwe irwanya ubutegetsi bw’u Rwanda aribo bibandwaho cyane. Iyo udafite iyo gahunda, bagukorera iyicarubozo.’’

Imiryango iharanira uburenganzira bwa muntu n’itabara Imbabare nka Croix Rouge iyo igiye gusura gereza Abanyarwanda barabimura, gereza zikagumamo abemeye guhabwa ubuhungiro mu nkambi no kwiyunga n’imitwe irwanya u Rwanda.

Yasabye Abanyarwanda gusengera abari muri Uganda ndetse na Leta ya Uganda igafungura abantu bose yafunze barimo abanyeshuri 120 babatandukanyije bakajyanwa ahatazwi.

Pasiteri Singirankabo we yagize ati “Turinginga kandi dutabaza, uwagira ubushobozi bwo gutabara uwitwa Umunyarwanda muri kiriya gihugu, yagira icyo akora.’’

Kuva mu 2017, Abanyarwanda bose bafashwe n’inzego zitandukanye muri Uganda ntawe uragezwa imbere y’ubutabera ngo aburanishwe. Kugera muri Werurwe 2019, Abanyarwanda barenga 800 bari bamaze kwirukanwa nyuma yo gutotezwa.

Indi nkuru wasoma: U Rwanda rwakiriye abaturage barwo 20 birukanwe na Uganda, ruyisaba guhagarika imikoranire na RNC

Pasiteri Singirankabo yavuze ko ubuyobozi bwa Uganda bwamunzwe na ruswa kuko ufite amafaranga arekurwa, uyakurusha akakugurisha
Abafatirwa muri Uganda bashinjwa kuba intasi z'u Rwanda
Abanyarwanda 20 birukanwe muri Uganda, bageze ku butaka bw'u Rwanda ku wa Gatatu, tariki ya 12 Kamena 2019, banyuze ku mupaka wa Kagitumba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza