Uburyo bushya bw’ikoranabuhanga bugiye korohereza abishyura imisoro n’imisanzu by’abakozi

Yanditswe na Evariste Nsengimana
Kuya 21 Nyakanga 2018 saa 09:18
Yasuwe :
0 0

Ikigo cy’ icy’imisoro n’amahoro (RRA) n’Ikigo cy’ubwiteganyirize mu Rwanda (RSSB) byatangije uburyo bwo kumenyekanisha imisoro n’imisanzu by’abakozi hifashishijwe ikoranabuhanga, mu rwego rwo korohereza ababigana kubona izo serivisi mu buryo bunoze kandi bwihuse.

Ubwo buryo bwiswe ‘Imenyekanisha rikomatanije cyangwa Unified Declaration’, bwatangijwe kuri uyu wa Gatanu, nyuma y’igeragezwa impande zombi zatangije mu 2016 ku bazigana 804, rikagaragaza ko ritanga umusaruro.

Muri ubu buryo umenyekanisha azajya yinjira ku rubuga rwa RRA, amenyekanishirize rimwe umusoro ku bihembo by’abakozi, imisanzu y’ubwiteganyirize bw’izabukuru n’ibyago bikomoka ku kazi, ubwishingizi bw’indwara n’imisanzu y’ubwishingizi bw’ikiruhuko cy’umubyeyi.

Komiseri Mukuru Wungirije wa RRA, Ruganintwali Bizimana Pascal, yabwiye itangazamakuru ko ubwo bufatanye bugamije gutanga serivisi nziza zikomatanyije, aho kugira ngo umuntu ajye muri RRA no muri RSSB kubimenyekanisha mu bihe bitandukanye agiye kujya abikorera rimwe.

Yunzemo ati “Ibyo mu by’ukuri bizagabanya n’ikiguzi kuko niba umuntu yakoraga imenyekanisha inshuro enye, akishyura inshuro enye, hari ikiguzi nabyo byari bifite kizagabanuka kuko ni serivisi nziza. Icyo twifuza ni uko abantu bose bakoresha iri menyekanisha rikomatanije.”

Ruganintwali yibukije abakoresha bose ko mu gihe bakora imenyekanisha rikomatanije rikorwa nta kiguzi, bagomba kwirinda gutanga amakuru anyuranye n’ari ku ndangamuntu z’abakozi babo basabwa kuko igihe bagize icyo banyuranya bidakunda.

Umuyobozi mukuru wa RSSB, Jonathan Gatera, yavuze ko ubwo buryo bugamije no koroshya ubucuruzi.

Ati “Ntabwo ubu buryo bufasha abasora cyangwa abatanga umusanzu muri RSSB gusa kuko ni mu rwego nanone rwo koroshya gukora ubucuruzi kuko niba umuntu yasiragiraga muri ubwo buryo bwo kumenyekanisha, ubu akazajya abikorera rimwe kuko bukomatanya n’imisanzu yose ya RSSB [...] bizajya bikorerwa rimwe ku buryo bizajya byorohera umukoresha.”

Yakomeje avuga ko igitekerezo cyo guhuza izo serivisi cyatekerejwe bitewe n’uko abagana RSSB bashaka izo serivisi bongera nanone bakagana RRA.

Biteganijwe ko ubu buryo buzafasha ababukeneye butarageraho basaga 11 800 mu Rwanda, biyongera kuri 804 basanzwe babukoresha kuva bwatangira kugeragezwa mu 2016.

Komiseri Mukuru Wungirije wa RRA, Ruganintwali Bizimana Pascal yibukije abakoresha bose ko mu gihe bakora imenyekanisha rikomatanyije rikorwa nta kiguzi
Umuyobozi mukuru wa RSSB, Jonathan Gatera, yavuze ko ubwo buryo bugamije no koroshya ubucuruzi
Ubuyobozi bwa RRA na RSSB buganira n'itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza