Kwamamaza

Ubushakashatsi bwagaragaje ko 52.1% aribo bishimira uko bashyirwa mu byiciro by’Ubudehe

Yanditswe kuya 16-11-2016 saa 06:44' na Cyprien Niyomwungeri


Ni kenshi abaturage mu turere dutandukanye tw’igihugu bumvikana banenga uburyo bagezwaho gahunda zigamije kubazamura, ndetse bamwe ntibatinye kugaragaza ko nta ruhare bagira mu kugena abagerwaho n’ibyo Guverinoma iba yarateguye ngo bifashe abaturage kuva mu bukene.

Ubushakashatsi bushya bw’Ikigo cy’Igihugu cy’Imiyoborere, RGB, bwongeye kubishimangira bugaragaza ko Abanyarwanda batishimira ku rwego rwo hejuru uburyo gahunda zigamije kwishakamo ibisubizo nka Girinka, Ubudehe na VUP zishyirwa mu bikorwa.

Ubwo bushakashatsi bugaragaza ishusho y’uko abaturage babona Imiyoborere n’imitangire ya Serivisi mu nzego z’Ibanze buzwi nka ‘Citizen Report card (CRC)’, bukorwa buri mwaka hagamijwe kugaragaza igipimo cy’imiyoborere ibereye abaturage n’imitangire ya serivisi hashingiwe k’uko abaturage babibona.

Uyu mwaka bwakorewe mu ngo zigeze ku bihumbi cumi na kimwe (11,000) mu turere twose uko ari 30. Bwakozwe ku bipimo 14, harimo umutekano, ubuhinzi n’ubworozi; imiyoborere, ubutabera, uburezi, ibikorwaremezo, isuku n’ibindi.

Bwagaragaje ko abaturage 59.7% aribo bishimira guhitamo abagenerwabikorwa ba gahunda ya Girinka mu gihe abagera kuri 32.1% babigaya. Abagera kuri 52.1% bishimira gushyira abaturage mu byiciro by’Ubudehe naho 45.6% bakabigaya. Ni mu gihe kandi abagera kuri 58.9% aribo bishimira uruhare rwabo mu bibakorerwa.

Ikigo RGB cyakoze ubu bushakashatsi cyagaragaje ko hari amakosa yagiye aba mu gushyira abantu mu byiciro by’Ubudehe. Gahunda nka Girinka na VUP nazo zakunze kuvugwamo ibibazo by’imicungire mibi no kunyereza inkunga leta iba yatanze ngo izamure abatishoboye binyuze muri ziriya gahunda.

Ibi bituma hari abagaragaza impungenge z’uko hari gahunda nziza Guverinoma iba yatekereje ariko ntizigere ku ntego zazo bitewe n’impamvu y’uko zishyirwa mu bikorwa hatakozwe ubushakashatsi cyangwa hatashatswe amakuru ahagije yatuma zigera ku ntego yazo.

Ubwo Minisiteri y’ubutegetsi bw’Igihugu yasabaga Abadepite ko bemeza ishingiro ry’umushinga w’itegeko rituma RGB yigenga ikajya ikora ubushakashatsi no kuri gahunda zigamije kwishakamo ibisubizo, Depite Mporanyi yagarutse kuri gahunda zidindizwa no gushyirwa mu bikorwa hatabayeho ubushakashatsi.

Yavuze ko RGB izajya ikora ubushakashatsi bwizewe bugafasha mu ishyirwa mu bikorwa rya gahunda zo kwishakamo ibisubizo zadindiraga.

Yagize ati “Kuba iki kigo gihawe ubuzima gatozi kikazakora n’ubushakashatsi, bizatuma dutera imbere mu kwishakamo ibisubizo. Hari za gahunda nyinshi guverinoma yagiye ishyiraho zo kwishakamo ibisubizo byafasha n’abanyarwanda ariko wajya kureba uko zashyizwe mu bikorwa ugasanga zarakozwe nta bushakashatsi, gahunda zikaba ari nziza zagatanze igisubizo ariko byakabaye byiza mbere y’uko bashyiraho gahunda hakabanza hagakorwa ubushakashatsi.”

Yatanze urugero rw’ibyiciro by’ubudehe bifite intego nziza igendanye n’imbaturabukungu (EDPRS) na gahunda yo kwishakamo ibisubizo ariko uburyo bishyirwa mu bikorwa bigatuma bitagera ku ntego.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved