Ubushakashatsi bwagaragaje ko mu Rwanda hari abana b’inzererezi barenga 2800

Yanditswe na Emma-Marie Umurerwa
Kuya 8 Gicurasi 2019 saa 12:42
Yasuwe :
0 0

Ubushakashatsi bwakozwe ku kibazo cy’abana bo mu muhanda bwagaragaje ko mu mijyi minini y’igihugu harimo inzererezi 2882 aho abarenga 91% muri bo ari abahungu.

Ubu bushakashatsi bwamuritswe na Komisiyo y’Igihugu ishinzwe abana kuri uyu wa Gatatu tariki 8 Gicurasi 2019. Bwakozwe hakorwa igenzura mu bice byose by’igihugu cyane mu mijyi minini ikorerwamo ubucuruzi.

Amakuru kuri aba bana yatanzwe n’abayobozi b’inzego z’ibanze, abayobozi b’ibigo byita ku bana b’inzererezi 19 ndetse n’ibigo by’igororamuco (Transit Centers).

Abana 2882 nibo byagaragaye ko bari mu muhanda barimo abahungu 2621 n’abakobwa 261. Muri aba bose, umubare munini ni uw’abana bari hagati y’imyaka 11-14.

Ubu bushakashatsi bwagaragaje ko muri aba bana baba mu muhanda, 55.6%, bahaba mu buryo buhoraho kuko ari naho bakura ibyo kurya naho 44.3% birirwa ku muhanda ariko bakaza gutaha naho 0.1% ni abana babana n’ababyeyi babo ku muhanda aho akenshi baba barahavukiye.

Abana bari hagati y’imyaka 15 na 18 ni 1067, abana 1410 bari hagati y’imyaka 11 na 14, abari hagati y’imyaka 6-10 ni 404, hakabamo n’umwana umwe hatabashije kumenyekana ikigero cye.

Mu bana b’inzererezi bari mu Rwanda hagaragaramo abanyamahanga barimo abakomoka i Burundi umunani, abo muri Uganda batatu, abo muri Repuburika Iharanira Demokarasi ya Congo bane hamwe n’abandi 54 batabashije kumenya inkomoko yabo.

Umuyobozi w’agateganyo w’ishami rishinzwe kurengera no guteza imbere uburenganzira bw’umwana muri NCC, Hategeka Lambert yavuze ko ikibazo cy’abana b’inzererezi gikwiye gushakirwa igisubizo abantu bahereye mu muryango.

Yavuze ko abana bagera ku 1629 bafite ababyeyi babo bombi, 202 bafite ba se gusa ba nyina barapfuye, abafite ba nyina gusa ba se barapfuye bagera kuri 490.

Abana 135 bapfushije ababyeyi bombi, 215 bavuze ko batazi niba ba Se bariho naho 37 bo ntibazi niba hari umubyeyi n’umwe bagira.

Akarere ka Gasabo kaza imbere mu kugira abana benshi b’inzerezi, igakurikirwa na Nyarugenge, Huye, Rubavu, Kicukiro, Muhanga,Nyamagabe, Kayonza, Rusizi na Kamonyi.

Utwo turere ngo muri buri kamwe gafite abana 100 b’inzererezi.
Uturere dutatu tugize Umujyi wa Kigali dufite abana 775 bangana na 26.9% by’abana bose bari mu muhanda.

Impamvu zituma abana bajya kuba inzererezi mu muhanda

Ababyeyi, abana ndetse n’abayobozi bo mu nzego z’ibanze babajijwe n’abakoze ubu bushakashatsi, ngo basanze hari impamvu zihurizwaho zituma abana bajya kuba inzererezi.

Zimwe muri zo ni ubukene, kuba abana babura ibikoresho by’ishuri bigatuma bava mu muryango bakajya gushaka akazi gaciriritse, ababyeyi batita ku nshingano zabo, kuba umwana apfusha ababyeyi abandi bo mu muryango ntibamwiteho, abana bahunga imiryango yabo kubera ko bakoreshwa imirimo ibavuna n’ubumenyi buke bw’ababyeyi mu bijyanye no kurera.

Mu zindi mpamvu batanze harimo kuba abana bafite ubwisanzure burimo no guhitamo kujya mu muhanda, kuba bavuka mu muryango ufite abana benshi bigatuma batabasha kubona ibyo bakeneye byose, urugomo, ubuharike hamwe no kuba abana bararurwa no kujya mu mujyi, amakimbirane yo mu muryango n’ibindi.

Ubushakashatsi bwagaragaje ko 86.9% by’abana b’inzererezi batabasha kubona ifunguro rimwe ku munsi, 13.1% babona ifunguro rimwe ku munsi naryo ry’amaramuko.

Abana 84.3% bahura n’ihohoterwa ririmo gukubitwa bagakomeretswa, hari abahutazwa bavanwa mu muhanda. Mu bana b’abakobwa bakoreweho ubushakashatsi, 19% bavuze ko basambanywa ku gahato mu gihe abahungu basambanywa ku gahato ari 3.9% .

Umunyamabanga Nshingwabikorwa wa NCC, Dr Claudine Uwera Kanyamanza yavuze ko gukemura ikibazo cy’abana bo mu muhanda bitareba urwego rumwe, ahubwo ngo bisaba ubufatanye bw’inzego zitandukanye.

Yagize ati “Iki kibazo buri wese akwiye kukigira icye. Twe twakoze ubushakashatsi tugaragaje uko ikibazo gihagaze, igisigaye ni ugufatanya twese nk’umuryango nyarwanda tugashaka igisubizo.”

Abayobozi b’Uturere bashinzwe imibereho myiza y’abaturage mu Turere bari bitabiriye iyi nama, bahurije ku ngamba zafatwa bahereye mu muryango, ababyeyi bakarushaho gusobanurirwa inshingano zabo zo kurera no kubyara abo bashoboye kurera.

Umunyamabanga Nshingwabikorwa wa NCC, Dr Claudine Uwera Kanyamanza yavuze ko gukemura ikibazo cy’abana bo mu muhanda bitareba urwego rumwe

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza