Ubushakashatsi bwashyize mu majwi abarezi batuma abana bata ishuri

Yanditswe na Evariste Nsengimana
Kuya 30 Nzeri 2017 saa 03:41
Yasuwe :
0 0

Ubushakashatsi bw’ikigo cyita ku burenganzira bwa muntu n’iterambere mu Karere k’ibiyaga bigari (Great Lakes Inatiative for Human Rights and Development) bugaragaza ko hari abana bata ishuri bitewe n’amafaranga babaka ku ishuri.

Iki kigo kivuga ko ubushakashatsi giheruka gusohora muri uyu mwaka cyasanze hari abanyeshuri barivamo bitewe no kubura amwe mu mafarang nk’ay’agahimbazamusyi, ayo kurya, ay’imyambaro y’ishuri n’ayandi kandi gahunda ya Leta ari ukwigira ubuntu.

Umuyobozi wungirije wa Great Lakes Initiative for Human Right and Development, Umulisa Vestine, yabwiye RBA ko raporo y’ubwo bushakashatsi yagaragaje ko umubare w’abata ishuri uri kwiyongera bitewe n’amafaranga bakwa.

Yagize ati “Aho twabashije gusura batubwiraga ko amafaranga bakwa nk’agahimbazamusyi k’umwarimu, amafaranga y’ibikoresho, imipira, utuntu nk’utwo twinshi twiyongera ku byo batanga. Ubundi Itegeko Nshinga ritegeka ko umwana w’umunyarwanda agomba kwigira ubuntu, rero twebwe abo twaganiriye bagaragaje ko ari menshi ariyo mpamvu mwabonye abana bata ishuri muri raporo yacu yakomeje kwiyongera.”

Abayobozi b’ibigo bo babiteye utwatsi, bavuga ko imibare y’abarivamo igenda igabanuka nk’uko bisobanurwa na Umuyobozi w’ishuri ribanza rya Kacyiru I, Mutesi Joy.

Yagize ati “Biri kugenda bigabanuka ku buryo muri raporo duheruka gukora ejobundi twari dufite abana bagera kuri batanu gusa bashobora kuba basa n’abaretse ishuri ariko na bo twabakoreye raporo tuzishyikiriza imidugudu yabo batubwira ko bamwe bimutse, undi bamwohereje kwa nyirakuru, ubwo batatu nibo tutaramenya amakuru neza.”

Umuyobozi w’Urwunge rw’amashuri rwa Murambi, Sangwa Olive, yavuze ko ku kigo cye nta mwana ugita ushuri.

Yagize ati “Hano ho cyabaye amateka, ubu nta mwana ukiva kuri iki kigo ataye ishuri, uhava wenda ababyeyi be baba bimutse, tukamuha icyemezo akagenda wenda bimukiye mu ntara cyangwa hano hafi, murabizi ko guhunda ya Leta ari uko abana biga bakora urugendo rugufi. Ntawe uta ishuri ngo agenda tumubure tutazi aho agiye.”

Undi yavuze ko ahubwo zimwe mu mpamvu zishoboka harimo amakimbirane yo mu miryango.

Yagize ati “Ahubwo zimwe mu mpamvu wenda tujya tubona hari aho usanga bafite n’imiryango ibanye mu makimbirane ku buryo usanga bifite icyo bihungabanya ku myigire y’umwana ariko iyo agize umubyeyi umukurikirana nabwo ariga.

Yakomje agira ati “ Indi bakunze kuvuga ni ubukene cyane cyane ku batabasha kubona nk’umwambaro w’ishuri ukabona kwiga adasa n’abandi bimuteye ipfunwe kandi ari ngombwa ko yambara umwambaro wagenwe. Icyo gihe nibwo tubishyikiriza inzego z’ubuyobozi, hari abafashwa n’ubuyobozi hari n’abo natwe dufasha. Kwiga ni Ubuntu ariko umubyeyi agomba gushyiraho n’uruhare rwe nk’ubu murabizi ko hari gahunda yo kugabura ku ishuri, Leta iradufasha ariko noneho kugirango tuyinoze neza dukorana inama n’ababyeyi na komite zabo bakagira icyo bafasha ikigo.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza