Kwamamaza

Raporo ku isambanywa ry’abana mu Rwanda yagaragaje ibyateye inkeke Abadepite n’Abasenateri

Yanditswe kuya 2-11-2016 saa 16:45' na Philbert Hagengimana


Abagize Inteko Ishinga Amategeko batewe impungenge n’ibyavuye mu bushakashatsi ku ihohoterwa rishingiye ku gitsina aho abarikorewe nta butabera bwuzuye bahabwa kuko nta manza z’indishyi zijya zibaho kimwe n’uko abarikoze basa n’ababashinyagurira bitwaza ko bashutswe na ‘shitani’.

Ikigero cyo hejuru cy’ibyaha byo gusabambanya abana, kuba abagikorewe badahabwa ubutabera bwuzuye n’impamvu zitangwa n’abagikoze zimeze nk’izishinyagura zirimo abitwaza Shitani; ni bimwe mu biteye inkeke Abagize Inteko ishinga Amategeko Umutwe w’Abadepite na Sena.

Ibi ni ibyagaragaye kuri uyu wa Kabiri tariki ya 1 Ugushyingo 2016, Ubwo Komisiyo y’Igihugu y’Uburenganzira bwa muntu (CNDP) yagezaga raporo y’ibikorwa byayo by’umwaka wa 2015/2016 na gahunda y’ibikorwa by’umwaka wa 2016-2017 ku bagize Inteko ishinga Amategeko Umutwe w’Abadepite na Sena.

Ubwo bushakashatsi bwari bugamije kugaragaza impamvu zitera isambanywa ry’abana, kugaragaza ingaruka zabyo no kureba uburyo ibyo byaha bikurikiranwa mu nkiko.

CNDP yasanze mu madosiye yerekeranye n’Ihohoterwa rishingiye ku gitsina yakurikiranywe n’Ubushinjacyaha Bukuru mu mwaka wa 2014-2015, agera ku 2,818 areba icyaha cy’ihohoterwa rishingiye ku gitsina, muri yo 1,879 yari ayo gusambanya abana, ni ukuvuga angana na 67%.
Umuyobozi wa CNDP, Nirere Madeleine, yabwiye Abagize Inteko ishinga Amategeko ko ubushakashatsi bwagaragaje ko iyo habayeho kumenyesha inzego zibishinzwe ibyaha byo gusambanya abana bikurikiranwa, ariko ababikorewe nta butabera bwuzuye bahabwa kuko nta manza z’indishyi zijya zibaho.

Ibi bisobanurwa n’uko ku manza 100 z’ibyaha byo gusambanya abana, enye gusa arizo zaregewe indishyi nk’uko byagaragajwe n’ubwo bushakashatsi.

Shitani mu mpamvu zitera ubusambanyi

Nirere yakomeje abwira Abasenateri n’Abadepite ko mu bushakashatsi hanabajijwe impamvu zitera isambanywa ry’abana, bamwe bakavuga ko biterwa n’inzoga n’ibiyobyabwenge, kuraranya abana n’abo badahuje ibitsina hitwajwe amasano, hakaba n’abavuga ko baba babitewe na Shitani.

Senateri Jacqueline Muhongayire yashimye CNDP ko yakoze ubwo bushakashatsi kuko ikibazo cy’isambanywa ry’abana cyavugwaga mu magambo gusa ariko hatagaragazwa impamvu zifatika n’imibare ikigaragaza, aboneraho guhamagarira inzego zose kukibona mu ishusho imwe nk’igiteye inkeke.

Ati “Murabona ko ari ikintu gikomeye cyane, kuva ku myaka 5 kugeza kuri 18 barasambanywa ku buryo inzego zose zaba iz’ubutabera n’izindi zose zikwiye guhagurukira icyo kibazo kikanashyirwamo imbaraga, kikajya cyihutishwa ababigaragayeho bakajya bahanwa hakiri kare kugira ngo batabona icyuho cyo gucika ubutabera.”

Yakomeje avuga ko n’izindi nzego nka Kiliziya n’andi madini n’amatorero bikwiye guhaguruka niba hari abasambanya abana bakitwaza Shitani.

Ati “Ibyo kwitwaza Shitani bifite 4.5%, abantu baritwaza Shitani bakajya gusambanya abana, ubu rero na Kiliziya ihaguruke rero n’izindi nsengero zose.”

Abana bari hagati y’imyaka 13 na 17 ni bo bibasiwe cyane mu gusambanywa, aho bari ku kigero cya 44%, ariko n’abo munsi yaho barabikorerwa, ndetse hakaba na byinshi bikorwa ntibigaragazwe. Ubwo bushakashatsi bwagaragaje ko ibigera kuri 23.6% bitagaragazwa, ahanini bitewe n’uko biba byakozwe n’abo bafitanye isano cyangwa ugasanga abana babikorewe n’abashinzwe kubarera.

Kuraranya abana n’abo badahuje igitsina hitwajwe amasano na byo ngo ibyo kwamaganwa

Depite Gatabazi yagarutse ku kuba abana 15% barasambanyijwe kubera ko ababyeyi babo babaraza hamwe n’abo bafitanye isano mu miryango, aboneraho kubwira CNDP ko yasaba Minisiteri y’Uburinganire n’Iterambere ry’Umuryango (MIGEPROF) ifatanyije n’inzego bakorana, hagakorwa ubukangurambaga mu gihe gito Abanyarwanda bakumvishwa neza ko abana b’abakobwa batagomba kurarana n’abahungu hitwajwe isano.

Depite Gatabazi Jean Marie Vianney yavuze ko iki kibazo gikwiye guhagurukirwa

Ubwo bushakashatsi bugaragaje icyo kigero cy’isambanywa ry’abana mu gihe hakirimo kunonosorwa umushinga w’Itegeko rihana ibyaha, aho biteganyijwe ko ingingo zivuga ku gusambanya umwana ku ngufu bikozwe n’undi mwana zishobora kuza mu isura nshya.

Yatekerejweho nyuma y’ibyari bimaze iminsi bikorwa mu Bushinjacyaha, aho akenshi wasangaga abana basambanye ariko uwatanze undi kugera mu butabera akaba ari we witwa ko yahohotewe.

Ubusanzwe ingingo ya 190 y’igitabo cy’amategeko ahana y’u Rwanda, ivuga ko icyaha cyo ‘gusambanya umwana’ ari imibonano mpuzabitsina yose ishingiye ku bitsina ikorewe umwana uko yaba ikozwe kose n’icyaba cyakoreshejwe cyose.

Ingingo ya 191 y’icyo gitabo ivuga ko umuntu wese usambanyije umwana, ahanishwa igifungo cya burundu y’umwihariko.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved