Kwamamaza

Ubushinjacyaha bwa ICC bwageze muri RDC

Yanditswe kuya 18-10-2016 saa 08:45' na Philbert Hagengimana


Itsinda ry’Abashinjacyaha mu Rukiko Mpuzamahanga Mpanabyaha (ICC), ryageze muri Repubulika Iharanira Demokarasi ya Congo (RDC), nyuma y’imvururu ziherutse kuba muri icyo gihugu zishobora kuba zirimo ibigize ibyaha biri mu bubasha bw’urwo rukiko.

Radio Okapi dukesha iyi nkuru itangaza ko Fatou Bensouda yohereje intumwa mu ruzinduko rw’iminsi itanu muri RDC, mu rwego rwo gushaka amakuru y’ibanze yaherwaho mu iperereza ku mvururu zishingiye ku matora zabaye mu kwezi gushize zigahitana abasaga 50.

Mu itangazo yashyize ahagaragara kuwa Mbere w’iki cyumweru, Umushinjacyaha Mukuru wa ICC, Fatou Bensouda yagize ati “Hashize igihe ndajwe ishinga n’uruhererekane rw’imvururu muri RDC, by’umwihariko izabaye i Kinshasa muri Nzeri 2016, ibyabayemo bishobora kuba bigize ibyaha biri mu bubasha bwa ICC.”

Biteganyijwe ko izo ntumwa za Bensouda zizabonana n’abayobozi ba RDC, abo mu mashyaka atavuga rumwe n’ubutegetsi, Sosiyete sivili ndetse n’Itangazamakuru.

Fatou Bensouda akomeza avuga ko ikigenderewe muri urwo ruzinduko ari guhwiturira impande zombi n’abazishamikiyeho, ko bakwiye kwitwararika icyo ari cyo cyose cyahungabanya ikiremwamuntu cyangwa imitungo.

Ati “Ikigamijwe mu kohereza izo ntumwa ahabereye ibyo, ni uguhwiturira impande zombi zihanganye, abazishamikiyeho hatitawe ku myanya bariho muri Politiki y’icyo gihugu, ko bagomba gukora ibishoboka byose bakamenya neza ko abarwanashyaka babo badakora ibishobora kuba ibyaha byibasira inyoko muntu cyangwa imitungo, kandi hagafatwa ingamba zihamye zibibarinda.”

Akomeza avuga ko akurikiranira bya hafi ibibazo by’umutekano muri RDC kuva mu 2004, anaboneraho kwibutsa ko uwo ari we wese ukora, utegeka gukora, uhamagarira abandi cyangwa agatanga umusanzu mu buryo bumwe cyangwa ubundi mu gukora ibyaha biri mu bubasha bwa ICC, agomba gukurikiranwa.

Imvururu zabaye kuwa 19 na 20 ukwezi gushize kwa Nzeri zahitanye abasaga 50, zikaba zaraturutse ku guhangana hagati y’urubyiruko rw’amashyaka atavuga rumwe n’ubutegetsi n’inzego z’umutekano, mu myigaragambyo yari yateguriwe guha integuza Perezida Kabila, yibutswa ko asigaje amezi atatu n’umunsi umwe ngo manda ye irangire.

Izo ntumwa z’Ubushinjacyaha bwa ICC ziri muri RDC mu gihe kuri uyu wa Kabiri tariki ya 18 Ukwakira, ari bwo hitezwe ko impande zombi ziza gushyira umukono ku myanzuro y’ibiganiro ku miyoborerwe y’icyo gihugu mu gihe cy’inzibacyuho nyuma ya manda ya Kabila, n’amatora y’Umukuru w’Igihugu ataha.

Bimwe mu byumvikanyweho n’impande zombi, harimo gushyiraho Guverinoma y’ubumwe ihuriweho n’impande zombi, aho Perezida azakomeza kuba Kabila ariko agashyiraho Minisitiri w’Intebe uturutse mu mashyaka atavuga rumwe n’ubutegetsi, amatora y’Umukuru w’Igihugu akazaba muri Mata 2018.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved