Ubushinjacyaha bwiteze igisubizo ku kuma kazajya gashyirwa ku bantu baburana badafunze bakunze gutoroka

Yanditswe na Ndayishimye Jean Claude
Kuya 26 Gicurasi 2018 saa 11:18
Yasuwe :
0 0

Ubushinjacyaha Bukuru butangaza ko hari ikibazo gikomeye cy’abantu baburana bari hanze bakekwaho kurigisa umutungo wa rubanda, bakatirwa igifungo bagahita batoroka, bikagira ingaruka ku irangizwa ry’imanza.

Mu nama yabaye kuri uyu wa Gatanu, yahuje Minisiteri y’Ubutabera n’izindi nzego, yigaga ku mirangirize y’imanza, Umushinjacyaha Mukuru, Mutangana Jean Bosco, yavuze ko hari abantu baba baburana bari hanze, umunsi wo gusomerwa bamenya ko bakatiwe igifungo bagahita bahunga, bagashaka imitungo yabo bakayibura.

Ati “Hari ikibazo cy’ifatwa ry’abahamwe n’icyaha baburanye bari hanze cyane kugira ngo bajyanwe muri gereza kurangiza ibihano, hari benshi bahita batoroka, murabizi kuburana uri hanze ni ihame, ntabwo ari ikibazo ariko Abanyarwanda batari inyangamugayo bajya kumusomera akaba ari nko ku mupaka agahita yigendera. Benshi rero iyo bahise batoroka mbere y’uko urubanza ruba itegeko, bakagenda usanga ari ikibazo kuko imitungo baba barayandikishije ku bandi bantu bene wabo, ugasanga ni ikibazo, mu gihe nyir’ubwite ubwe yatorotse.”

Ubusanzwe amategeko avuga ko ihame ari uko umuntu wese aburana ari hanze kereka iyo hari impamvu zikomeye zituma aburanye ari hanze ashobora gucika cyangwa agasibanganya ibimenyetso.

Ingingo ya 89 y’Itegeko ryerekeye imiburanishirize y’imanza nshinjabyaha ivuga ko ukurikiranyweho icyaha ari ihame ko akurikiranwa adafunze. Icyakora, ukurikiranyweho icyaha ashobora gufungwa by’agateganyo mu gihe hubahirijwe ibiteganyijwe mu ngingo ya 96 n’iya 97 z’iri tegeko.

Ingingo ya 96 ivuga ko ukurikiranyweho icyaha adashobora gufungwa mbere y’urubanza keretse hari impamvu zikomeye zituma akekwaho icyaha kandi icyo akurikiranyweho kikaba ari icyaha amategeko yateganyirije guhanisha igifungo cy’imyaka ibiri nibura.

Na ho iya 97 ivuga ko impamvu zikomeye zituma umuntu akekwaho icyaha atari ibimenyetso ahubwo ari ibyagezweho bihagije mu iperereza bituma bakeka ko umuntu ukurikiranywe ashobora kuba yarakoze icyaha.

N’ubwo ibyo byose biteganyijwe n’amategeko, Mutangana avuga ko hari abakurikiranwa bari hanze badafite ubunyangamugayo bakumva ko bakatiwe igifungo bagahita batoroka, akavuga ko akuma k’ikoranabuhanga bazajya bambikwa kakababuza kurenga aho babujijwe, kazatuma icyo kibazo gikemuka.

Ako kuma kari mu mushinga w’itegeko rishya ryerekeye imiburanishirize y’imanza nshinjabyaha riri mu Nteko Ishinga Amategeko.

Yagize ati “Hari igitekerezo cyo kwambika abantu niba nabyita umuringa, biteganywa n’itegeko riri kuvugururwa, kiriya kintu ni cyiza kizadufasha cyane, ikoranabuhanga ryo gukirikirana umuntu adafunze, afite akantu yambaye kameze nk’agakomo ariko kamenyesha inzego ko adashobora kurenga ahantu runaka. Byafasha kumurinda kujya aho ashaka atabiherewe uburenganzira n’inzego zibishinzwe.”

Yanavuze ko inzego zinyuranye zikwiye kwiga uburyo hakorwa ishakiro ry’abantu bose bakatiwe bari hanze ariko ntibafungwe kugira ngo hajyeho uburyo bwo kubabuza kwidegembya.

Nta mubare w’abantu batorotse muri ubwo buryo Umushinjacyaha Mukuru yatangaje, gusa yahamije ko bibaho.

Mu bihugu byateye imbere aka kuma kazwi nka ‘ankle monitor/Surveillance électronique’ gakoreshwa n’inzego z’ubutabera iyo hari umuntu ukekwaho icyaha cyangwa cyaramuhamye, bashaka ko atarenga ahantu runaka; kuko kaba gafite ikoranabuhanga rigahuza n’izo nzego, iyo uwakambitswe arenze aho bamubujije karasakuza kagatanga amakuru, inzego zibishinzwe zikabimenya zikamufata.

Mu 1960 ni bwo itsinda ry’abashakashatsi ryo muri Amerika muri Kaminuza ya Havard ryakoze aka kuma.

Aka kuma ni ko gahabwa abakekwaho ibyaha cyangwa abo byahamwe kakababuza kurenga aho batemerewe
Umushinjacyaha Mukuru, Mutangana Jean Bosco, yavuze ko hari abantu baba baburana bari hanze, umunsi wo gusomerwa bamenya ko bakatiwe igifungo bagahita bahunga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza