Ubushyamirane bw’abanyamigabane bwatumye Kaminuza ya Rusizi itakaza abanyeshuri 800

Yanditswe na Ishimwe Israel
Kuya 11 Ugushyingo 2016 saa 08:18
Yasuwe :
0 0

Ubushyamirane no gucikamo ibice hagati y’abafite imigabane muri Kaminuza Mpuzamahanga ya Rusizi (Rusizi International University-RIU) bwatumye abanyeshuri bagera kuri 800 bayivamo bajya gushaka ibindi bigo bakomerezamo amasomo yabo.

Kuva muri 2015 kugeza mu ntangiriro za 2016 nibwo hatangiye kuvugwa ibibazo byo kutumvikana hagati y’abashinze iyi Kaminuza bacitsemo ibice bibiri, ikigizwe na Dr Gahutu Pascal, Umuyobozi Mukuru w’iyi Kaminuza n’irindi tsinda ry’abanyamigabane bane barimo Oscar Nzeyimana, Depite Mporanyi Théobard, Ally Abdul Karim Kayihura n’Umunyakenya Timothee Ngatia Nyate.

Aba bagabo bane bashinjaga Dr Gahutu Pascal kwikubira ubuyobozi bwa Kaminuza, we akavuga ko batatanze amafaranga y’imigabane bemeye ubwo bayandikishaga mu Kigo cy’Igihugu gishinzwe Iterambere, RDB.

Iki kibazo cyaje gutuma Minisiteri y’Uburezi, yandikira iyi Kaminuza ibaruwa igaragaza ko abayifitemo imigabane nibatumvikana, igomba gufungwa ku wa 29 Mutarama 2016, kugira ngo ireme ry’uburezi ribashe kubungwabungwa.

Ubwo Senateri Jean Damascène Ntawukuriryayo na Marguerite Nyagahura, bagize Komisiyo y’Imibereho Myiza, mu Nteko Ishinga Amategeko, Umutwe wa Sena baganiraga n’abahagarariye abanyeshuri muri iyi Kaminuza, ku wa Gatatu tariki ya 9 Ugushyingo, Dr Gahutu Pascal, yabatangarije ko ibibazo byari hagati yabo byakemutse.

Ati “Igihe ibi bibazo byari birimo byahungabanyije abanyeshuri, ikibazo nyamukuru cyakururaga ubwumvikane buke ni icy’abanyamigabane bari batarishyura amafaranga biyemeje gutanga. Inama y’Umutekano y’Akarere yemeje ko abo batarishyura iyo migabane bashaka ayo mafaranga kugira ngo bajye mu buyobozi bwa Kaminuza.”

Akomeza avuga ko izo ntambara zatumye abanyeshuri bagera kuri 800 bagenda, bamwe bava mu ishuri, abandi bisubirira kwiga muri Repubulika Iharanira Demokarasi ya Congo.

Bamwe mu banyeshuri na bo bemeza ko ibibazo byagizeho ingaruka mu myigire yabo.

Ngendonziza Berancille ati “Byatumye bamwe mu banyeshuri bahagarika amasomo, natwe twize dufite ubwoba ko iri shuri bazarifunga.”

Ndahayo Eliezel we ashimangira ko abanyamigabane bababwiraga amagambo menshi bitewe n’inyungu zabo.

Ati “Umunyamigabane umwe yanyuraga ku ruhande akabwira abanyeshuri ibitari byo n’undi gutyo akurikije inyungu ze. Ubu abanyeshuri nta kibazo dufite imyigire imeze neza, icyo tureba ni ibjyanye n’amategeko y’imyigire n’ireme ry’uburezi duhabwa.”

Umuyobozi w’Akarere ka Rusizi, Harerimana Frédéric yabwiye IGIHE ko iki kibazo bakigiyemo mu rwego rwo kumvikanisha impande zombi, hafatwa imyanzuro yuko bagomba kumvikana cyangwa bananiranwa Kaminuza ikagira ubuyobozi buhamye hakurikizwa amabwiriza n’amategeko agenga amashuri makuru na za kaminuza.

Visi Perezida muri Komisiyo y’Imibereho myiza n’Uburenganzira bwa muntu, Marguerite Nyagahura, yavuze ko mu rugendo barimo rwo kugenzura no kumenya imikorere mu bikorwa bya Guverinoma mu birebana n’amashuri makuru na za kaminuza, basanze aba banyeshuri bishimira kuba baregerejwe iyi Kaminuza ariko ko bagifite ibibazo birimo inyubako nke ndetse n’ibikoresho bidahagije.

Abasenateri, abayobozi ba Kaminuza ndetse n'abanyeshuri bahagarariye abandi muri Kaminuza Mpuzamahanga ya Rusizi mu ifoto rusange
Abanyeshuri bagera kuri 800 bigaga muri iyi Kaminuza bayivuyemo bajya mu bindi bigo nyuma y'amakimbirane hagati y'abanyamigabane bayo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244