Ubutagondwa, ikibazo cyongeye kugarukwaho mu bayisilamu

Yanditswe na Philbert Girinema
Kuya 9 Mutarama 2017 saa 09:03
Yasuwe :
0 0

Mu biganiro byahuje Polisi y’u Rwanda n’abayoboke b’idini ya islam bo mu Karere ka Rubavu tariki ya 7 Mutarama 2017, Mufti Sheikh Hitimana Salim, yasabye abayisilamu bagenzi be kwirinda no kurwanya ibikorwa bihabanye n’imyemerere ya Islam birimo ubutagondwa n’ubuhezanguni.

Mufti Hitimana yasabye ababyeyi n’abarezi gukangurira urubyiruko rwo mu idini ya Islam kwirinda ibikorwa nk’ibi, kuko bugira ingaruka nyinshi, kandi bikaba aribyo byonyine bizatuma mu miryango yabo n’aho batuye harangwa umutekano usesuye.

Umuyobozi w’ ishami rishinzwe kurwanya iterabwoba muri Polisi y’u Rwanda, ACP Denis Basabose, nawe wari witabiriye ibi biganiro byabereye mu nzu ndangamuco ya Islam mu Karere ka Rubavu, yabasobanuriye birambuye ku butangondwa, avuga ko buri gihe abakora iterabwoba n’abigisha amatwara y’ubutagondwa bitwikira umwenda w’idini ya Islam, abasaba gukora ibishoboka byose mu kuburwanya.

ACP Basabose yabasabye kugira uruhare mu gukumira no kurwanya ibyaha, bafatanya muri byose n’inzego zishinzwe umutekano cyane cyane Polisi ibegereye, batanga amakuru y’icyahungabanya umutekano kugira ngo habeho gukumira, abasobanurira ko muri iki gihe urubyiruko arirwo rushukwa cyane n’abashaka kurujyana mu bikorwa by’ubuhezanguni bakaba bagomba kuruba hafi.

Yaravuze ati “Mudufashe turinde abaturage bacu, cyane cyane urubyiruko kutishora mu buhezanguni, kuko bigira ingaruka nyinshi kandi mbi, zirimo n’urupfu.”
Yababwiye ko mu Rwanda abantu bafite uburenganzira bwo kwemera no gusenga bitandukanye, ariko buri wese atabangamiye uburenganzira bwa mugenzi we cyangwa idini ry’undi.

Mufti Sheikh Hitimana Salim yasezeranyije ko nk’abayisilamu bazakomeza gukorana n’inzego z’umutekano, bagakumira kandi bakarwanya abafite ibitekerezo by’ubutagondwa kuko u Rwanda rushaka gukomeza gutera imbere.

Uhagarariye Idini rya Islam mu Karere ka Rubavu , Imam Musa Sindayigaya, yavuze ko abayisilamu ahagarariye muri Rubavu biyemeje kurwanya ubutagondwa, ahubwo bagakomeza kwitabira gahunda za Leta zinyuranye, anavuga ko nk’abayobozi bagomba kumenya no kumenyesha abo bayobora uruhare rwabo ku mutekano w’igihugu no ku iterambere ryacyo.

Mufti Sheikh Hitimana Salim

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza