Kwamamaza

Ubuzima bwo mu buhungiro bwatumye bashinga umuryango ufasha abatishoboye

Yanditswe kuya 7-11-2016 saa 19:01' na Emma-Marie Umurerwa


Bukuru Josephine Murphy na Butoyi Joselyne Alexandre, Abanyarwandakazi b’impanga baba muri Canada, bavuga ko gukurira mu buzima bushaririye bwo mu buhungiro byabahaye imbaraga zo gufasha abatishoboye mu Rwanda.

Aba bombi bavukiye i Burundi nyuma y’aho ababyeyi babo bahungiyeyo mu myaka ya 1959, babaho mu buzima butoroshye.

“Umutima wo gufasha no kwita ku batishoboye wavuye mu buzima twavukiyemo, tubukuriramo mu Buhungiro ahitwa Mushiha mu Burundi. Twabaga mu nzu y’ibyatsi, twishwe n’inzara, mbese nakubwira ko twabayeho nabi mu buryo bwose bushoboka”

Ibi ni ibitangazwa na Bukuru Josephine Murphy na Butoyi Joselyne Alexandre, mu kiganiro bagiranye na IGIHE.

Butoyi yagize ati “ Tuvuka mu muryango w’abana 10, twabayeho nabi mu buryo bwose bushoboka. Bamwe mu bo tuvukana bamaze gukura twagiye kuba i Bujumbura ariko na ho twari tubayeho nabi mu nzu y’amabati iva bimeze nabi cyane.

Njyewe na Bukuru twagize umugisha wo kujya muri Canada nabwo ni abantu babidufashijemo nta mafaranga y’itike twari dufite. Twarize turarangiza dushaka abagabo, ariko ntidushobora kwibagirwa bwa buzima bubi twabayemo mu buhungiro, ngo twibagirwe abatishoboye.”

Nyuma y’akazi bajya gusaba inkunga yo gufasha abatishoboye bo mu Rwanda

Bukuru na Butoyi bashinze umuryango “Shelter them Batarure”, nyuma y’aho mu mwaka wa 2005, baje mu Rwanda, bakahasanga abana b’inzererezi benshi.

Ngo byabateye intimba ku mutima bibibutsa ubuzima babayemo mu buhungiro, bituma mu mwaka wa 2007 bashyinga umuryango uyu muryango ufasha abatishoboye.

Inkunga ngo nta handi iva ni mu bwitange, bw’abanyacanada n’abandi bafite umutima utabara.

Bukuru yagize ati “Twatangiye dufasha abana bo mu muhanda batishoboye ariko tuza gusanga abana bajya mu muhanda kubera ubukene buba buri mu miryango bavukamo, dutangira noneho kujya dufasha na ya miryango kwifasha. Ubu dufite abana 34 dufasha baba mu mujyi wa Kigali, batuye mu nzu dukodesha, twabashakiye abo kubana na bo, nitwe tubitaho kuri buri kimwe cyose. Abo bana bafite kuva ku mezi atandatu kugera ku myaka 22. Inkunga ziva mu bagiraneza, nitwe tujya kuzishaka nyuma y’akazi cyangwa ku minsi y’ikiruhuko.”

Butoya avuga ko intego yabo ari ugufasha Leta y’u Rwanda kurwanya ubukene, bafasha abatishoboye kwifasha.

Ati “Mu cyumweru gishize twishyuriye imiryango 100 ubwisungane mu kwivuza, indi miryango 36 itishoboye twayihaye ibiribwa, isabune, amavuta, ibiribwa n’imyenda yo kwambara. Twabaguriye n’ihene zo korora. Ibyo twakoze byose bifite agaciro ka 4 200 000 z’amanyarwanda.”

‘Ntituzatenguha Perezida Kagame waduhaye ikibanza’

Muri Rwanda Day yabereye i Toronto mu 2013, Bukuru na Butoyi, basabye Perezida Paul Kagame ikibanza cyo kubakamo amazu, amashuri n’ibindi bikorwa bitandukanye byo gufasha abatishoboye bo mu Rwanda, arakibaha.

Iki kibanza gifite hegitari 2, 5 giherereye ku Ruhuha mu murenge wa Nyarugenge mu karere ka Bugesera. Aba bavandimwe ngo byabakoze ku mutima biyemeza kutazamutenguha.

Bukuru ati “Ikibanza Perezida yaduhaye ni kinini cyane, mu minsi iri imbere tuzatangira kubakamo amashuri y’imyuga n’inzu 10 tuzatuzamo abana batishoboye badafite imiryango, ibikorwa bizatwara amadolari y’Amerika asaga ibihumbi 700. Ntituzatenguha Perezida wacu watugiriye icyizere agashyigikira igikorwa cyacu cyo gufasha abatishoboye, tuzakomeza gukora uko dushoboye dufashe abanyarwanda batishoboye kwifasha.”

Nk’uko babivuga ngo nta butunzi buhambaye bafite, ariko bafite ubushake bwo kugira icyo bakora bafatanyije n’abanyamuryango ba “Shelter them Batarure”, bakaba basaba abishoboye gufasha abatishoboye bakabageza ku rwego rwo kwifasha.

Indi nkuru wasoma: Perezida Kagame yahaye ikibanza abakobwa b’impanga bakimusabye muri Rwanda Day

Abavandimwe b'impanga, Bukuru na Butoyi
Aba na bo ni impanga, babamu Muryango Shelter them Batarure
Bafasha n'imiryango y'abana batishoboye, uyu ni umuryango wo mu Karere ka Gisagara bubakiye inzu
Biyemeje gufasha imfubyi n'abatishoboye kugeza ku rwego rwo kwifasha ubwabo
Butoyi na Bukuru bari hamwe n'abandi Banyacanada b'impanga

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved