Uganda irashyikiriza u Rwanda umurambo w’umuturage warwo warashwe yambukana magendu

Yanditswe na IGIHE
Kuya 27 Gicurasi 2019 saa 10:15
Yasuwe :
0 0

Guverinoma ya Uganda kuri uyu wa Mbere irashyikiriza iy’u Rwanda umurambo w’Umunyarwanda warashwe mu ijoro ryo ku wa Gatanu ubwo yageragezaga kwinjiza magendu ku butaka bw’u Rwanda, akanagerageza kurwanya inzego z’umutekano.

Minisiteri y’Ububanyi n’Amahanga yatangaje ko mu ijoro ryo ku wa Gatanu, mu Murenge wa Tabagwe, Akarere ka Nyagatare, inzego z’umutekano z’u Rwanda zari mu bugenzuzi zahagaritse uwakekwagaho gutwara magendu wari kuri moto yambutse aturutse muri Uganda, anyuze ahantu hatemewe.

Ubwo yahagarikwaga n’abashinzwe umutekano yaranze ahubwo atera amahane, bagenzi be bafite imihoro bagaba igitero ku bashinzwe umutekano b’u Rwanda, ubwo bashakaga gusubira muri Uganda bahunga, inzego z’umutekano zirasamo babiri, umwe w’Umunyarwanda ahita apfa n’Umunya-Uganda aza gupfa nyuma, bagenzi babo babambukana muri Uganda.

Abo bantu ubwo birukaga basubira muri Uganda, basize mu Rwanda moto bari bapakiyeho magendu.

Kuri uyu wa Mbere ku gicamunsi nibwo biteganyijwe ko umurambo w’uwo munyarwanda ushyikirizwa u Rwanda, umuhango biteganyijwe ko ubera ku mupaka wa Gatuna.

Amakuru agera kuri IGIHE ni uko uwo muhango uritabirwa n’abadipolomate batandukanye.

Moto ipakiye magendu niyo yasigaye ku butaka bw'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza