Uganda yahuruje amahanga n’abashinzwe umutekano mu gushyikiriza u Rwanda umurambo w’umuturage warwo (Amafoto)

Yanditswe na Habimana James
Kuya 28 Gicurasi 2019 saa 01:08
Yasuwe :
0 0

Kuri uyu wa Mbere nibwo ubuyobozi bwa Uganda burangajwe imbere n’umudepite uhagarariye agace ka Rukiga, Kansiime Caroline, bwashyikirije ubw’u Rwanda umurambo w’umuturage warwo uherutse kurasirwa mu Murenge wa Tabagwe mu Karere ka Nyagatare, witwa Kyerengye Jean Baptiste.

Uyu munyarwanda yapfuye arashwe ubwo we na bagenzi be bo muri Uganda, bambukanaga magendu mu Rwanda, bahagarikwa n’inzego z’umutekano z’u Rwanda bo bagashaka kuzirwanya bakoresheje ibikoresho birimo imihoro.

Nyuma yo kuraswa umunyarwanda yahise apfa, umuturage wa Uganda we aza gupfa nyuma; ariko abo bari kumwe bahise babakurura babajyana muri Uganda bazi ko ari abanya-Uganda, gusa nyuma baza gusanga harimo umunyarwanda ariyo mpamvu habayeho kugarura uyu murambo w’umunyarwanda.

Ni igikorwa u Rwanda ruvuga ko cyatewe n’uko abayobozi ba Uganda bakomeza kurebera abaturage babo baza mu Rwanda kandi bakahateza umutekano muke, ntibagire icyo bakora.

Uganda yazanye umurambo isa n’igiye ku rugamba

Ubusanzwe iyo hari umuturage wapfuye cyangwa wafatiwe mu kindi gihugu kigashaka kumushyikiriza ubuyobozi bw’aho akomoka, ibi ni ibintu bisanzwe bikorwa hagati y’ibihugu hirya no hino ku Isi.

Bikorwa hagati y’abayobozi b’impande z’ibihugu byombi, nyuma hakabaho gusinywa impapuro zigaragaza ko uwo muntu koko icyo gihugu kimutanze, ikindi nacyo kigasinya ko umuturage wacyo cyamwakiriye.

Kuri uyu wa Mbere ahagana saa Saba n’igice z’amanywa zo mu Rwanda, ni ukuvuga Saa munani n’igice muri Uganda, nibwo imodoka yari itwaye umurambo w’uyu munyarwanda yageze mu gace gahuza ibihugu byombi, kari hagati ku buryo buri gihugu kiba kitahagenzura.

Ku ruhande rw’u Rwanda na Uganda aka ni agace kari mu kibaya kigabanya ibihugu byombi.

Iyo wagerega ku mupaka w’u Rwanda ukerekeza amaso muri Uganda, watungurwaga no kubona abasirikare n’imodoka za gisirikare nk’aho ari ikindi kintu kigiye kuba.

Nubwo aka gace kitwa ko nta gihugu kikagenzura, uruhande rwa Uganda rwo rwakajemo abasirikare batari bake bitwaje imbunda n’imodoka za gisirikare. Nyamara iyo werekezaga amaso ku ruhande rw’u Rwanda, ho wahabonaga gusa abapolisi bari ku mupaka ku ruhande rw’u Rwanda bagenzura umupaka.

Impungenge ku bayobozi ba Uganda

Mbere y’uko abayobozi hagati y’ibihugu byombi bahererekanya umurambo, habanje kubaho igikorwa cy’uko aba bayobozi ku mpande zombi babanza guhurira muri aka gace bakaganira ndetse bakabanza kumenyena.

Icyaje gutungura ni uko abayobozi ku ruhande rwa Uganda baje kubwira ab’u Rwanda kubakurikira ngo bagere muri metero nke uvuye muri Uganda aho guhurira hagati.

Ni ibintu abayobozi ku ruhande rw’u Rwanda bayobowe n’umuyobozi w’Akarere ka Nyagatare Mushabe David Claudian basa nk’abatishimiye, kuko wumvaga bababwira bati, “Oya, mwabwiye bariya se bafite umurambo bakigira hano hagati?”

Nyuma yo kumvikana, aba bayobozi baje guhurira hagati igikorwa kiratangira.

Uganda yahuruje abadipolomate bitera urujijo

Nubwo byari byitezwe ko abayobozi b’u Rwanda na Uganda aribo bahura bagahana umubiri w’uyu munyarwanda, icyaje gutungurana ni uburyo Uganda yatumiye abadipolomate b’amahanga muri iki gikorwa.

Ni ibinti bishimangira urwikekwe ku ruhande rwa Uganda no gushaka kugaragaza ko igihugu cyabo aricyo kiri mu kuri no kugaragaza ukundi isura y’u Rwanda mu mahanga.

Bijya gutangira ikinyamakuru Chimpreports cya Uganda cyasohoye inkuru yavugaga ko abadipolomate bahagarariye ibihugu byabo muri Uganda, berekeje ku mupaka wa Gatuna kureba uko iki gikorwa kiri bugende.

Aba badipolomate uko ari icyenda barimo ukomoka mu Bwongereza, u Burusiya, u Burundi, Sudani y’Epfo n’ahandi.

Bose bagejejwe mu Mujyi wa Kabale bavanwe i Kampala n’indege y’igisirikare cya Uganda, nyuma berekeza ku mupaka wa Gatuna batwawe n’imodoka nini nayo yari irinzwe mu buryo bukomeye.

Depite Kansiime Caroline yavuze ko igihugu cye ngo kigiye gushyira inzego z’umutekano ku gace gahana imbibi n’u Rwanda, ibintu Uganda n’ubundi yakoze mu bihe bitandukanye.

Kugeza ubu inzego z’umutekano muri Uganda, itangazamakuru na Minisiteri y’Ububanyi n’Amahanga muri icyo gihugu ku wa Gatandatu nibwo batangiye gukwirakwiza amakuru avuga ko abasirikare b’u Rwanda bambutse umupaka bakarasira abaturage ku butaka bwayo.

Ni igikorwa u Rwanda rwamaganiye kure, rushimangira ko nta mpamvu yatuma rubikora.

Abashinzwe umutekano muri Uganda bari bahari
Abashinzwe umutekano ku ruhande rwa Uganda bari benshi
Inzego z'umutekano za Uganda zatangaje ko abanyarwanda baherutse gushimutwa bari mu Kiliziya, ari 'intasi' ndetse ko ubu bafunzwe
Uganda yari yazanye aba Ambasaderi icyenda muri uyu muhango
Umupolisi w'u Rwanda aganira na mugenzi wa Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza