Uko mugabanya gufata iriya nkunga idakwiye ni ko nzajya nzamura ikwiye- Kagame abwira abacamanza

Yanditswe na Kanamugire Emmanuel, Rabbi Malo Umucunguzi
Kuya 11 Nzeri 2017 saa 12:39
Yasuwe :
0 0

Perezida Kagame yasabye abakora mu nzego z’ubutabera kugabanya kwakira ruswa, abasezeranya ko uko bazajya babasha kuyigabanya na we azajya azamura ingano y’inkunga abatera.

Umukuru w’Igihugu yabigarutseho kuri uyu wa Mbere ubwo yatangizaga umwaka w’ubucamanza 2017/2018, umuhango wabereye mu ngoro y’Inteko Ishinga Amategeko.

Yabihereye ku ijambo Perezida w’Urukiko rw’Ikirenga, Prof Sam Rugege, yavuze asaba ko Perezida Kagame ko yabatera inkunga mu bikorwa batangiye byo kunoza imibereho y’abakora mu nzego z’ubutabera, aho bashinze isanduku yo kuzigama no kugurizanya.

Mu mezi atandatu ashize gitangijwe ngo hamaze kubitswa agera kuri miliyoni 100 z’amafaranga y’u Rwanda akomoka mu misanzu ya buri muntu mu bakora muri uru rwego ungana na 4% by’umushahara we wa buri kwezi.

Prof. Rugege yavuze ko abakora mu nzego z’ubutabera batemerewe kwakira inkunga iyo ari yo yose (aganisha kuri ruswa) ariko ko inkunga Perezida yabatera yo bemerewe kuyakira.

Ati "Ubusanzwe abacamanza ntibemereye guhabwa impano, ntibemerewe guterwa inkunga na buri wese ariko inkunga yanyu Nyakubahwa Perezida iremewe."

Perezida Kagame yavuze ko ubutabera bukwiye kugaragarira buri wese ko butabogamye kandi ko nta ruswa n’iyindi mikorere mibi iburangwamo. Yabasabye kugabanya kwakira ruswa na we akarushaho kubatera inkunga bifuza.

Yagize ati" Iriya nkunga ’Chief Justice’ yavugaga… Nagira ngo dukorane amasezerano; Uko muzajya mugabanya gufata iriya nkunga idakwiye ni ko nzajya nzamura ikwiye. Kandi buriya iyo bigabanutse, turwanyije ibigenda mu buryo butari bwo igihugu kirunguka kandi ya mikoro yacyo arazamuka.Igihe amikoro azamutse nta cyatuma n’umugabane ujya mu bakora mu butabera utazamuka."

Indi mikorere mibi yagarutseho ni iyo guca imanza nabi, kuzitinza cyangwa kuzisubika nyamara nta mpamvu ifatika ihari.

Yakomeje agira ati “Abaturage icyo bakeneye ni ubutabera butangwa nta kiguzi, mu mucyo, ku gihe kandi nta kuvangura, buri wese akabona ubutabera uko bikwiye. Kugira ngo imikorere nk’iyo icike abaturarwanda babone ubutabera bukwiye, ni ngombwa ko abacamanza n’abandi bakorana babyamagana ku mugaragaro.”

Perezida Kagame yavuze ko iyo urebye ibirarane by’imanza byakomeje kugabanuka n’umubare w’imanza zicibwa buri mwaka ukagenda wiyongera ndetse hari na gahunda ziteganyijwe zo kwihutisha izo manza zidacibwa.

Yagize ati “Turi mu nzira nziza, ariko nanone hari aho usanga hari aho twakongeramo imbaraga.”

Yavuze ko hari nk’abakozi bo mu nzego z’ubucamanza usanga bagikurikirana inyungu zabo bwite kandi n’abagana inkiko bakaba babizi ku buryo bahitamo kunyura ku bacamanza cyangwa abashinjacyaha, ibyo bikaba binyuranye n’imikorere isanzwe, bigasiga ubucamanza isura mbi.

Yakomeje agira ati “Nubwo navuga ngo ntabwo biri mu nkiko gusa, ariko abari mu nkiko ni ngombwa kubirwanya.”

Perezida Kagame yavuze ko ubucamanza bukwiye kuba urwego rukora neza kurusha izindi, kuko aho ariho hose iyo binaniranye nibwo bwitabazwa.

Perezida w’Urukiko Rw’Ikirenga, Prof Sam Rugege, yavuze ko muri uyu mwaka urangiye baharaniye gutanga ubutabera bunoze kandi bwihuse, aho mu kwihutisha imanza no kugabanya ibirarane, ubushize byari 31%, uyu mwaka hakaba hasigaye 23%.

Yakomeje agira ati “Ibyo byanyuze mu kugabanya umubare w’imanza zinjira mu nkiko, kugabanya isubikwa ry’imanza, no gusuzuma imanza zicibwa buri kwezi za buri mucamanza.”

Prof Rugege yavuze ko mu byatumye ibirarane bigabanuka harimo no kuba abacamanza barahawe ububasha bwo kumvikanisha ababuranyi babyifuza, bitanyuze mu buryo bw’imanza, ndetse umucamanza akaba yaragiye aca imanza 23 buri kwezi, ugereranyije n’imanza 20 bari biyemeje.

Ibyo kandi ngo byajyanye no kuba imanza ziba ziboneye, kuko imanza zagiye mu bujurire zari 8% mu gihe mu mwaka wabanje zari 10.7%.

Perezida Kagame yabwiye abakora mu nzego z'ubutabera ko bukwiye kugaragarira buri wese ko butabogamye
Perezida Kagame n'abayobozi mu nzego za leta n'abo mu nzego z'ubutabera
Perezida Kagame ageza ijambo ku bitabiriye umuhango wo gutangiza umwaka w'ubucamanza nyuma y'irahira ry'abayobozi bashya batari barahiriye rimwe n'abandi
Umushinjacyaha wa Repubulika, Mutangana Jean Bosco
Perezida w’Urukiko Rw’Ikirenga, Prof Sam Rugege, yavuze ko muri uyu mwaka urangiye baharaniye gutanga ubutabera bunoze kandi bwihuse

Amafoto: Moses Niyonzima/Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza